ឯកឧត្តម ប៉ាន សូរស័ក្តិ និងលោកជំទាវ ចម និម្មល អញ្ជើញសំណេះសំណាល ជាមួយថ្នាក់ដឹកនាំ និងមន្ត្រីរាជការ នៃក្រសួងពាណិជ្ជកម្ម

ភ្នំពេញ៖ នាព្រឹកថ្ងៃទី២៥ ខែសីហា ឆ្នាំ២០២៣ នៅទីស្តីការក្រសួងពាណិជ្ជកម្ម បានរៀបចំពិធីថ្លែងអំណរគុណ និងសំណេះសំណាលជាមួយថ្នាក់ដឹកនាំ និងមន្ត្រីរាជការក្រសួងពាណិជ្ជកម្ម ដែលពិធីនេះបានប្រព្រឹត្តទៅស្ថិតក្រោមអធិបតីភាព ឯកឧត្តម ប៉ាន សូរស័ក្តិ សមាជិករដ្ឋសភា និងជាអតីតរដ្ឋមន្ត្រីក្រសួងពាណិជ្ជកម្ម និងលោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម និងមានការអញ្ជើញចូលរួមពីថ្នាក់ដឹកនាំ និងមន្ត្រីរាជការក្រសួងផងដែរ។

នៅក្នុងឱកាសនេះ លោកជំទាវរដ្ឋមន្ត្រី បានមានមតិស្វាគមន៍ថ្លែងអំណរគុណ និងសម្តែងការអបអរសាទរដ៏ស្មោះស្ម័គ្រជូនចំពោះ ឯកឧត្តម ប៉ាន សូរស័ក្តិ សមាជិករដ្ឋសភា និងទទួលយកគំរូវីរភាព តាមរយៈស្នាដៃ និងសមិទ្ធផលដ៏ថ្លៃថ្លាដែលសម្រេចបានក្នុងអាណត្តិកន្លងមក ដែលសមិទ្ធផលទាំងនេះបានក្លាយជាមូលដ្ឋានគ្រឹះ និងផែនទីបង្ហាញផ្លូវដ៏រឹងមាំ សម្រាប់ក្រសួងពាណិជ្ជកម្ម យកទៅត្រងត្រាប់និងអនុវត្តបន្ត ដើម្បីអាចសម្រេចបាននូវសមិទ្ធផលធំៗថ្មីបន្ថែមទៀតជូនដល់រាជរដ្ឋាភិបាលកម្ពុជា ក្នុងនីតិកាលទី៧ នៃរដ្ឋសភា។

ឯកឧត្តម កឹម ស៊ីថន រដ្ឋលេខាធិការប្រចាំការ បានថ្លែងចំណាប់អារម្មណ៍កោតសរសើរអស់ពីដួងចិត្ត លេីការខិតខំលើកកម្ពស់ប្រសិទ្ធភាព និង គុណភាព នៃបរិយាកាសធុរកិច្ច ព្រមទាំងបានរំលេចនូវស្នាដៃការងារនិងសមិទ្ធផលសំខាន់ៗមួយចំនួនក្នុងវិស័យពាណិជ្ជកម្ម ដែលសម្រេចបានក្នុងអាណត្តិកន្លងទៅ​ រួមទាំងយន្តការវិមជ្ឈការការងារទៅឱ្យមន្ទីរពាណិជ្ជកម្មខេត្តជាប់ព្រំដែនផងដែរ។

ជាកិច្ចបន្ត ឯកឧត្តម ប៉ាន សូរស័ក្តិ បានថ្លែងអំណរគុណយ៉ាងជ្រាលជ្រៅចំពោះការលះបង់ និងកិច្ចខិតខំប្រឹងប្រែងរបស់ថ្នាក់ដឹកនាំ និងមន្ត្រីរាជការទាំងអស់នៃក្រសួងពាណិជ្ជកម្ម ព្រមទាំងក្រសួង/ស្ថាប័នពាក់ព័ន្ធ ដែលបានរួមចំណែកសម្រេចបាននូវជោគជ័យទាំងនេះ ក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន ដែលជាប្រមុខដឹកនាំដ៏ឆ្នើមរបស់យើង នាអាណត្តិរាជរដ្ឋាភិបាលកម្ពុជាកន្លងមក។

ជាទីបញ្ចប់ លោកជំទាវរដ្ឋមន្ត្រី បានសម្តែងនូវទឹកចិត្តប្រកបដោយក្តីកតញ្ញូកតវេទីតាធម៌ ការដឹងគុណជូនចំពោះ ឯកឧត្តម ប៉ាន សូរស័ក្តិ និងបានសន្យាបន្តដឹកនាំថែរក្សា “ក្រុមគ្រួសារពាណិជ្ជកម្មជាធ្លុងមួយ នៅគ្រប់កាលៈទេសៈ មានសំឡេងតែមួយ” នៅលើគ្រប់សមរភូមិពាណិជ្ជកម្ម ទោះត្រជាក់ ទោះក្តៅ ទោះសមរភូមិធំឬតូច ក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់របស់ ឯកឧត្តមកិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ៕