បុគ្គលស្វ័យនិយោជន៍ជាង ១ម៉ឺននាក់ បានមកចុះឈ្មោះជាសមាជិក ប.ស.ស. នៅគ្រប់សាខា ប.ស.ស. ទូទាំងប្រទេស
ភ្នំពេញ៖ នាថ្ងៃទី៩ ខែសីហា ឆ្នាំ២០២៣ យោងតាមរបាយការណ៍របស់នាយកដ្ឋានបញ្ជិកា និងភាគទាននៃ ប.ស.ស. បានបង្ហាញឱ្យឃើញថា មានបងប្អូនដែលជាបុគ្គលស្វ័យនិយោជន៍យ៉ាងច្រើនលើសលប់ បានមកចុះឈ្មោះចូលជាសមាជិក ប.ស.ស. ដើម្បីទទួលបានការប្រើប្រាស់សេវាព្យាបាលជំងឺ សម្រាលមាតុភាព និងប្រាក់បំណាច់មាតុភាព ដោយគិតត្រឹមខែកក្កដា ឆ្នាំ២០២៣ នេះ មានបងប្អូនដែលជាបុគ្គលស្វ័យនិយោជន៍ចុះឈ្មោះសរុប ១២ ៤៩៦នាក់។
របាយការណ៍ខាងលើនេះ បង្ហាញក្នុងឱកាសដែលឯកឧត្តម ប៉ែន នរៈវុធ អគ្គនាយករង ប.ស.ស.
អញ្ជើញដឹកនាំកិច្ចប្រជុំត្រួតពិនិត្យលទ្ធផលការងារសម្រេចបាន របស់នាយកដ្ឋានបញ្ជិកា និងភាគទាន នៃ ប.ស.ស. ប្រចាំខែកក្កដា ដើម្បីពិនិត្យលទ្ធផលនៃការអនុវត្តការងារជាក់ស្តែង និងដោះស្រាយបញ្ហាប្រឈមនានា ដើម្បីឱ្យការអនុវត្តការងារកាន់តែល្អប្រសើរបន្ថែមទៀត។
ក្នុងឱកាសដឹកនាំកិច្ចប្រជុំនេះ ឯកឧត្តមអគ្គនាយករង ប.ស.ស. បានលើកឡើងថា៖ បច្ចុប្បន្នការកំណត់អត្តសញ្ញាណបងប្អូនបុគ្គលស្វ័យនិយោជន៍ មានការមមាញឹកយ៉ាងខ្លាំង បើទោះជាមានជួបឧបសគ្គច្រើនយ៉ាងណាក៏ដោយ យើងទាំងអស់គ្នាត្រូវខិតខំបន្តរក្សាជំហរឹងមាំ ដើម្បីបម្រើសេវាសាធារណៈមួយនេះ ជូនបងប្អូនប្រជាពលរដ្ឋប្រកបដោយការពេញចិត្ត និងត្រូវយកចិត្តទុកដាក់ខ្ពស់ ជាមួយនឹងភាពទន់ភ្លន់ ម៉ឺងមាត់ក្នុងការងារ ធ្វើយ៉ាងណាឱ្យការអនុវត្តការងារ កាន់តែមានប្រសិទ្ធភាព និងទទួលបានលទ្ធផលខ្ពស់។
ទន្ទឹមជាមួយគ្នានេះ ឯកឧត្តមអគ្គនាយករង ប.ស.ស. ក៏បានអំពាវនាវសូមការយោគយល់អធ្យាស្រ័យចំពោះបងប្អូនប្រជាពលរដ្ឋដែលបានអញ្ជើញមកដោយផ្ទាល់ ក្នុងការទទួលសេវាមួយនេះ ចំពោះការយឺតយ៉ាវ មានការរង់ចាំយូ ប៉ុន្តែបើទោះបីជាយ៉ាងណាក៏ដោយ ថ្នាក់ដឹកនាំ បុគ្គលិកជំនាញ និងខិតខំប្រឹងប្រែងអស់ពីលទ្ធភាព ដើម្បីបំពេញការងារមួយនេះបន្ថែមឱ្យទាន់ពេលវេលា។
សូមបញ្ជាក់ថា៖ កិច្ចប្រជុំខាងលើប្រព្រឹត្តទៅនៅសាលប្រជុំ ករុណា នៃ ប.ស.ស. ស្នាក់ការកណ្តាល រាជធានីភ្នំពេញដោយមានការអញ្ជើញចូលរួមពីថ្នាក់ដឹកនាំនាយកដ្ឋាន លោក/លោកស្រីអនុប្រធាននាយកដ្ឋាន លោក/ លោកស្រីប្រធានការិយាល័យ លោក/លោកស្រីអនុប្រធានការិយាល័យ សរុប ៣០រូប៕
