ថ្នាក់ដឹកនាំរដ្ឋបាលខេត្តតាកែវ នាំយកទៀនវស្សា ទេយ្យវត្ថុ និងគ្រឿងឧបភោគបរិភោគ ប្រគេនព្រះសង្ឃគង់ចាំព្រះវស្សានៅវត្តចំនួន ៥ ក្នុងស្រុកបូរីជលសារ
ភ្នំពេញ៖ ឯកឧត្តម ស្រី បេន សមាជិកព្រឹទ្ធសភា និង ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងលោកជំទាវ ស្រី ប៊ុណ្ណាដាវី នៅព្រឹកថ្ងៃពុធ ទី៩ ខែសីហា ឆ្នាំ២០២៣ បានដឹកនាំ លោក លោកស្រី អភិបាលរងខេត្ត ប្រធានមន្ទីរអង្គភាពជុំវិញខេត្ត កងកម្លាំងប្រដាប់អាវុធ លោកអភិបាលស្រុកបូរីជលសារ បានអញ្ជើញនាំយកទៀនចំណាំព្រះវស្សា ទេយ្យវត្ថុ និងគ្រឿងឧបភោគ បរិភោគមួយចំនួន ប្រគេនព្រះសង្ឃគង់ចាំវស្សាចំនួន ០៥វត្ត ក្នុងឃុំគោកពោធិ៍ ស្រុកបូរីជលសារ ។
មានប្រសាសន៍នាឱកាសនោះដែរ ឯកឧត្តម ស្រី បេន សមាជិកព្រឹទ្ធសភាព បានលើកឡើងថា ទំនៀមបូជាទៀនវស្សា គឺជាផ្នែកមួយនៃការគោរពរបស់ពុទ្ធបរិស័ទ រំលឹកនឹកទៅដល់គុណូបការៈ នៃព្រះសម្មាសម្ពុទ្ធសមណគោតម ដោយធ្វើការបូជាគ្រឿងសក្ការៈ ផ្គត់ផ្គង់ចង្ហាន់បិណ្ឌបាត និងគ្រឿងបរិក្ខារផ្សេងៗ ដល់ព្រះសង្ឃគង់ចាំវស្សា។ ជាពិសេស នេះជាទំនៀមមួយដែលបង្ហាញ ពីការរួមសាមគ្គីគ្នារបស់ពុទ្ធបរិស័ទខ្មែរ ក្នុងការហែទេយ្យទាន ទៅប្រគេនព្រះសង្ឃនៅតាមទីអារាមនានា និងរួបរួមគ្នាបរិច្ចាគធនធាន ទៅតាមសទ្ធាជ្រះថ្លា ក្នុងជំនឿចាប់យកនូវមគ្គផលកុសលផលបុណ្យ។
សម្ភារៈដែល ឯកឧត្តម ស្រី បេន និង ឯកឧត្តម អ៊ូច ភា អភិបាលខេត្តតាកែវ និងលោកជំទាវ ព្រមទាំងសហការី បាននាំយកមកនាពេលនោះរួមមាន៖ អង្ករ ៥០គីឡូក្រាម, ទៀនវស្សា ០១គូរ, ទឹកសុទ្ធ ២កេះ, ទឹកក្រូច ២កេះ, មី២កេះ, ត្រីខ ២យួរ, ទឹកត្រី ១យួរ, ស្លាដក១ បច្ច័យ១០ម៉ឺន ប្រគេនព្រះសង្ឃ ៥អង្គ បច្ច័យកសាងវត្ត ចំនួន ៥វត្ត ក្នុងមួយវត្តៗ បច្ច័យ ១.០០០.០០០រៀល និងប្រគេនព្រះសង្ឃ ចំនួន ៥អង្គ បច្ច័យ ១០ម៉ឺនរៀលផងដែរ ៕
