លោកជំទាវ ពុំ ចន្ទីនី ណែនាំដល់និស្សិតជ័យលាភី ត្រូវនាំយកកេរ្តិ៍ឈ្មោះដ៏ល្អរបស់កាកបាទក្រហមកម្ពុជា ទៅផ្សព្វផ្សាយឱ្យពិភពលោកបានដឹង
ភ្នំពេញ៖ កាលពីរសៀលថ្ងៃទី៧ ខែសីហា ឆ្នាំ២០២៣ លោកជំទាវ ពុំ ចន្ទីនី អគ្គលេខាធិការកាកបាទក្រហមកម្ពុជា និងសហការី បានអនុញ្ញាតឲ្យក្រុមនិស្សិតជ័យលាភីអាហារូបករណ៍រដ្ឋាភិបាលសាធារណរដ្ឋឆេក ឆ្នាំ២០២៣ ចំនួន១៤នាក់ ចូលជួបសំណេះសំណាលសម្តែងការគួរសម និងទទួលនូវអនុសាសន៍សម្រាប់បន្តការសិក្សានៅសាធារណរដ្ឋឆេក ។
ក្នុងឱកាសនោះដែរ លោកជំទាវអគ្គលេខាធិការកាកបាទក្រហមកម្ពុជា បានពាំនាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ផ្តាំផ្ញើសួរសុខទុក្ខ កោតសរសើរចំពោះក្រុមនិស្សិតទាំងអស់ដែលមានសមត្ថភាពទទួលបានអាហារូបករណ៍ទៅសិក្សានៅក្រៅប្រទេសនាឱកាសនេះ។
ជាមួយគ្នានេះ លោកជំទាវ បានណែនាំដល់និស្សិតជ័យលាភីទាំងអស់ ត្រូវខិតខំរៀនសូត្រ ថែរក្សាសុខភាពឱ្យបានល្អ នឹងត្រូវនាំយកនូវកេរ្តិ៍ឈ្មោះដ៏ល្អរបស់កាកបាទក្រហមកម្ពុជា ព្រមទាំងវប្បធម៌ និងអរិយធម៌ដ៏សម្បូរបែបរបស់កម្ពុជាទៅផ្សព្វផ្សាយទៅកាន់ពិភពលោកឱ្យបានដឹង បានឃើញ ក្រោមការដឹកនាំរបស់រដ្ឋាភិបាលកម្ពុជានាពេលកន្លងមក។
បន្ថែមលើនេះ លោកជំទាវ បានផ្តល់បទពិសោធន៍ការងារល្អៗដែលបានអនុវត្តស្របតាមយុទ្ធសាស្ត្ររបស់កាកបាទក្រហមកម្ពុជា ដែលមានវិស័យអាទិភាពចំនួន៤ គឺ ការគ្រប់គ្រងគ្រោះមហន្តរាយ វិបត្តិភ័យ និងការប្រែប្រួលអាកាសធាតុ, សុខភាព និងការថែទាំសុខភាពក្នុងសហគមន៍, ការលើកកម្ពស់គោលការណ៍គ្រឹះ និងតម្លៃមនុស្សធម៌ និងការអភិវឌ្ឍស្ថាប័ន។ លើសពីនេះទៀត កាកបាទក្រហមកម្ពុជា មានលក្ខន្តិកៈ កម្រងច្បាប់ និងព្រះរាជក្រឹត្យទទួលស្គាល់ជាសមាគមជាតិតែមួយគត់ក្នុងប្រទេសកម្ពុជា ដែលជាជំនួយការឱ្យអាជ្ញាធរសាធារណៈលើវិស័យមនុស្សធម៌ មិនមែនជាអង្គការរដ្ឋាភិបាលឬ អង្គការក្រៅរដ្ឋាភិបាលណាមួយឡើយ។
ទន្ទឹមនឹងនេះដែរ លោកជំទាវ ម៉ែន នារីសោភ័គ អគ្គលេខាធិការរងទី១ បានមានប្រសាសន៍ជូនក្រុមនិស្សិតជ័យលាភីទាំងអស់ ឱ្យបានដឹងអំពីប្រវត្តិនៃការបង្កើតកាកបាទក្រហម និងអឌ្ឍចន្ទក្រហម បទប្បញ្ញត្តិស្តីពីការប្រើប្រាស់បដិរូប ប្រវត្តិនៃការបង្កើតអនុសញ្ញាទីក្រុងហ្សឺណែវទាំង៤ និងការបង្កើតឱ្យមានកាកបាទក្រហមកម្ពុជា នៅថ្ងៃទី១៨ ខែកុម្ភៈ ឆ្នាំ១៩៥៥។
លោកជំទាវបានបញ្ជាក់ថា “ដើម្បីបង្កើតសមាគមជាតិក្នុងប្រទេសមួយបានលុះត្រាតែគោរពតាមលក្ខណៈវិនិច្ច័យទាំង១០យ៉ាង និងអនុវត្តការងារមនុស្សធម៌តាមគោលការណ៍គ្រឹះទាំង៧របស់ចលនាអន្តរជាតិកាកបាទក្រហម និងអឌ្ឍចន្ទក្រហម និងត្រូវទទួលស្គាល់ដោយរាជរដ្ឋាភិបាលរបស់ខ្លួន បន្ទាប់មកត្រូវទទួលស្គាល់ដោយ អាយ.ស៊ី.អរ.ស៊ី នៅថ្ងៃទី៦ ខែតុលា ឆ្នាំ១៩៦០ និងចូលជាសមាជិកទី៨៥របស់សហព័ន្ធអន្តរជាតិផងដែរ”។
ជាមួយគ្នានេះ កញ្ញា ឆាយ វួចអុីម តំណាងក្រុមនិស្សិតជ័យលាភី បានសម្តែងនូវក្តីរីករាយ និងបានថ្លែងអំណរគុណចំពោះសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ព្រមទាំងថ្នាក់ដឹកនាំគ្រប់ថ្នាក់ ដែលបានគិតគូរដល់និស្សិតគ្រប់រូប ជាពិសេស ជួយដល់ប្រជាជនគ្រប់ស្រទាប់វណ្ណៈ ដោយមិនប្រកាន់និន្នាការ និងបានអប់រំយុវជន សិស្ស និស្សិត ឱ្យយល់ដឹងពីបញ្ហាសុខភាព អនាម័យ វិជ្ជាសង្គ្រោះបឋម និងច្បាប់ចរាចរណ៍ជាដើម។
ជាចុងក្រោយ កញ្ញា និងមិត្តនិស្សិតជ័យលាភីទាំងអស់ បានប្តេជ្ញាចិត្ត ខិតខំរៀនសូត្រ ស្រូបយកចំណេះដឹងថ្មីៗ និងបទពិសិធន៍ល្អៗ ដើម្បីយកមកជួយអភិវឌ្ឍប្រទេសជាតិឱ្យមានភាពរីកចម្រើន ប្រកបដោយសុខសន្តិភាព៕
