លោកជំទាវ ពេជ ចន្ទមុន្នី៖ កត្តាដែលនាំឲ្យកម្ពុជាទទួលបានជោគជ័យជាម្ចាស់ផ្ទះរៀបចំសន្និបាតពិភពលោក លើកទី៣៩ របស់សមាគមកាយឬទ្ធិនារីពិភពលោក គឺផ្តើមចេញពីឆន្ទៈ និងសមត្ថភាព

ភ្នំពេញ៖ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អគ្គស្នងការសមាគមកាយឫទ្ធិនារីកម្ពុជា បានមានប្រសាសន៍ថា កត្តាដែលនាំឲ្យកម្ពុជាទទួលបានជោគជ័យនៅក្នុងការរៀបចំជាធ្វើជាម្ចាស់ផ្ទះរៀបចំសន្និបាតពិភពលោក លើកទី៣៩ ឆ្នាំ២០២៦ របស់សមាគមកាយឬទ្ធិនារីពិភពលោក (39th WAGGGS Conference) គឺផ្តើមចេញពីឆន្ទៈ សមត្ថភាពនិងការត្រៀមរៀបចំទុកជាមុនបានត្រឹមត្រូវ ច្បាស់លាស់ ជាមួយក្រុមការងារដែលមានវិជ្ជាជីវៈ ទឹកចិត្តស្រលាញ់ជាតិ ការគាំទ្រពីសមាជិកា-សមាជិក និងជាពិសេស គឺកម្លាំងមហាជនដែលបានគាំទ្រ និងជឿជាក់លើការដឹកនាំរបស់សមាគមកាយឫទ្ធិនារីកម្ពុជាកន្លងមក។

លោកជំទាវមានប្រសាសន៍បែបនេះជាមួយអ្នកសារព័ត៌មាន ក្នុងពេលអញ្ជើញដឹកនាំគណៈប្រតិភូជាន់ខ្ពស់សមាគមកាយឫទ្ធិនារីកម្ពុជា ធ្វើមាតុភូមិនិវត្តន៍មកកាន់ប្រទេសកម្ពុជាវិញ បន្ទាប់ពីទទួលជោគជ័យយ៉ាងត្រចេះត្រចង់ នូវការទទួលបានសិទ្ធិធ្វើជាម្ចាស់ផ្ទះរៀបចំសន្និបាតកាយឫទ្ធិនារីពិភពលោក លើកទី៣៩ (WAGGGS 39th) នៅឆ្នាំ២០២៦ នៅប្រទេសកម្ពុជា កាលពីថ្ងៃទី៣១កក្កដា នៅល្ងាចថ្ងៃទី០២ ខែសីហា ឆ្នាំ២០២៣នេះ។

លោកជំទាវបណ្ឌិត បន្តថា ពេលទទួលបានសិទ្ធិរៀបចំម្ចាស់ផ្ទះសន្និបាតពិភពលោក លើកទី៣៩ ឆ្នាំ២០២៦ របស់សមាគមកាយប្ញទ្ធិនារីពិភពលោក (39th WAGGGS Conference) កម្ពុជានឹងទទួលបានអត្ថប្រយោជន៍សម្រាប់ប្រទេសជាតិ គឺសំខាន់ណាស់ ព្រោះកេរ្តិ៍ឈ្មោះរបស់កម្ពុជា ត្រូវបានផ្សព្វផ្សាយ និងជ្រួតជ្រាបដល់អង្គសន្និបាត សម្រាប់សមាគម ចូលរួមគាំទ្រសន្និបាតពិភពលោក និងដើម្បីលើកទឹកចិត្តដល់សមាជិកា-សមាជិកយើងឱ្យទទួលបានបទពិសោធន៍គ្រប់ៗគ្នា ជាអតិបរិមាពីសន្និបាតពិភពលោកនេះ ព្រោះកម្ពុជាបានចូលរួមចលនានេះ តាំងពីជាង៧០ឆ្នាំមុនមកម្ល៉េះ។

បន្ថែមលើនេះ លោកជំទាវបណ្ឌិត បានគូសបញ្ជាក់ពីការអញ្ជើញទៅចូលរួមសន្និសីទកាយឫទ្ធិនារីពិភពលោក WAGGGS លើកទី៣៨ ដែលបានប្រព្រឹត្តទៅនៅសាកលវិទ្យាល័យអ៊ឺរ៉ុប ប្រទេសស៊ីប(Cyprus) ថា ជាជោគជ័យមួយដែលនឹកស្មានមិនដល់ ព្រោះគណៈប្រតិភូសមាគមកាយឫទ្ធិនារីកម្ពុជា ទទួលបានការកោតសរសើរពីសំណាក់ប្រទេសជាសមាជិកស្ទើរតែគ្រប់ប្រទេស ដែលបានចូលរួមក្នុងអង្គសន្និបាតលើកនេះ។

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត បន្តថា ពួកគេទទួលស្គាល់ពីការខិតខំប្រឹងប្រែងរបស់យើង ការត្រៀមលក្ខណៈបានល្អ និងភាពជាអ្នកដឹកនាំរបស់សមាគម។ ក្រៅពីនេះ ឯកសារផ្សព្វផ្សាយ និងសម្ភារបរិក្ខា សម្រាប់ចែកជូនអង្គសន្និបាតបានរៀបចំបានត្រឹមត្រូវ។ យើងបានបង្ហាញពីគោលបំណងរបស់យើងបាន ច្បាស់លាស់ ព្រមទាំងការទទួលស្គាល់ពីសមត្ថភាពនៃការរៀបចំរបស់ក្រុមការងារយើង។

លោកជំទាវបណ្ឌិតបញ្ជាក់យ៉ាងដូច្នេះថា “សមាជិកភាគ ច្រើនជឿទុកចិត្តលើសន្តិសុខ សុវត្តិភាព និងជាពិសេស[ខ្ញុំ]គិតថា មូលដ្ឋានដែលប្រទេសយើងមានសុខសន្តិភាពយូរឆ្នាំនេះហើយ ដែលគេមានជំនឿលើសន្តិសុខ និងសណ្ដាប់ធ្នាប់សង្គមរបស់ប្រទេសរហូតដល់គេផ្តល់សេចក្តីទុកចិត្ត»។ នៅពេលសួរថា តើមានការលំបាក ឬមានបញ្ហាប្រឈមអ្វីខ្លះ នៅក្នុងការបញ្ចុះបញ្ចូល(Convince) ដើម្បីឱ្យកម្ពុជាទទួលបានសិទ្ធិធ្វើជាម្ចាស់ផ្ទះរៀបចំសន្និបាតពិភពលោក លើកទី៣៩ ឆ្នាំ២០២៦ របស់សមាគមកាយឬទ្ធិនារីពិភពលោក?

លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត មានប្រសាសន៍ថា “បើនិយាយពីការលំបាក និងបញ្ហាប្រឈម ស្ទើរតែគ្មានពាក្យមកប្រដូច។ ប៉ុន្តែខ្ញុំសូមរៀបរាប់ត្រួសៗថា យើងត្រូវប្រើប្រាស់សមត្ថភាព និងសិល្បះនៃការបញ្ចុះបញ្ចូលប្រកបដោយភាពទាក់ទាញ ដែលខ្ញុំគិតថា វាជាប្រពៃណីនៃរាល់ការរៀបចំបោះឆ្នោតបែបនេះ។ សមត្ថភាព និងធនធានរបស់ប្រទេសដែលចូលរួមប្រកួតជាមួយយើង សុទ្ធតែប្រទេសល្អៗ និងមានបទពិសោធន៍យូរឆ្នាំ។ សមាគមយើងពិតមែនថាមានភាពចំណាស់ (ព្រោះយើងបានចាប់ផ្តើមភ្ជាប់ខ្លួនជាមួយកាយឫទ្ធិនារីពិភពលោកឡើងវិញនៅឆ្នាំ១៩៩៦) ប៉ុន្តែនៅពេលដែលខ្ញុំដឹកនាំសមាគមនេះ ខ្ញុំបានរៀបចំ និងពង្រឹងឡើងវិញដើម្បីបម្រើចលនាជាច្រើនក្នុងបុព្វហេតុស្ត្រី និងយុវតីកម្ពុជានាប៉ុន្មានឆ្នាំចុងក្រោយនេះ។ ដូចនេះ សមាជិកាសកម្មរបស់យើងមួយចំនួនធំ ក៏ថ្មី ហើយត្រូវការស្វែងយល់ពីកិច្ចការអន្តរជាតិនេះឱ្យបានច្បាស់លាស់”។

លោកជំទាវបន្ថែមទៀតថា ជាងនេះផងដែរ កម្ពុជាបានប្រកួតប្រជែងយ៉ាងលំបាកជាមួយប្រទេស២ផ្សេងទៀត គឺហ្កាណា និងទុយណេស៊ី ដែលជាប្រទេសមានប្រៀបជាងកម្ពុជា។ ប៉ុន្តែយ៉ាងណា យើងបានសំឡេងស្មើជាមួយប្រទេសហ្កាណា នៅក្នុងការបោះឆ្នោត៣ប្រទេសចុងក្រោយ បន្ទាប់ពីឆ្លងផុតវគ្គជម្រុះកន្លងមក ហើយគណៈកម្មការបានតម្រូវឱ្យមានការបោះឆ្នោតជាលើកទីពីររវាងកម្ពុជា និងហ្កាណា និងនៅទីបំផុតជ័យជម្នះត្រូវបានប្រកាសឈ្មោះប្រទេសរបស់យើងដោយគណៈកម្មការវិនិឆ័យ ដែលនេះជាលទ្ធផលប្រវត្តិសាស្ត្រ និងមហាកិត្តិយសដ៏ខ្ពង់ខ្ពស់បំផុត ដែលព្រះរាជាណាចក្រកម្ពុជាយើង ត្រូវបានជ្រើសរើសឱ្យធ្វើជាម្ចាស់ផ្ទះរៀបចំសន្និបាតពិភពលោក លើកទី៣៩ ឆ្នាំ២០២៦ របស់សមាគមកាយប្ញទ្ធិនារីពិភពលោក (39th WAGGGS Conference)នៅពេលនេះ៕