រដ្ឋបាលខេត្តរតនគិរី បើកកិច្ចប្រជុំដើម្បីពិភាក្សាអំពីបញ្ហាស្ថានភាពសុខមាលភាពរបស់កម្មករនៅក្រុមហ៊ុនថាកូស្រុកកូនមុំ ខណៈចំនួនកម្មករស្លាប់កើនឡើងដល់៩នាក់
ភ្នំពេញ៖ រដ្ឋបាលខេត្តរតនគិរី នាព្រឹកថ្ងៃទី២ ខែកក្កដា ឆ្នាំ២០២៣ បានបើកកិច្ចប្រជុំដើម្បីពិភាក្សាអំពីបញ្ហាស្ថានភាពសុខមាលភាពរបស់កម្មករនៅក្រុមហ៊ុនថាកូស្រុកកូនមុំ ខណៈចំនួនកម្មករស្លាប់កើនឡើងដល់០៩នាក់ នៅសាលប្រជុំសាលាខេត្ត ក្រោមអធិបតីភាព ឯកឧត្តម ញ៉ែម សំអឿន អភិបាល នៃគណៈអភិបាលខេត្តរតនគិរី និងមានការអញ្ជើញចូលរួមពីសំណាក់មន្ទីរជំនាញពាក់ព័ន្ធជាច្រើនរូប។
ថ្លែងនៅក្នុងកិច្ចប្រជុំ ឯកឧត្តម ញ៉ែម សំអឿន អភិបាលខេត្ត បានលើកឡើងថា គិតចាប់ពីថ្ងៃទី១៦មិថុនា ដល់ថ្ងៃទី១កក្កដាឆ្នាំ២០២៣ សរុបកម្មករក្នុងក្រុមហ៊ុន ថាកូ (ចំការចេក) ដែលបានបាត់បង់ជីវិតមានចំនួន ០៩នាក់ហើយ។ ដូច្នេះឯកឧត្តមអភិបាលខេត្ត ស្នើឲ្យមន្ទីរជំនាញពាក់ព័ន្ធរាយការណ៍ពីករណីនេះថាតើមកពីមូលហេតុអ្វីអោយពិតប្រាក។
ក្នុងឱកាសនេះលោកវេជ្ជបណ្ឌិត អ៊ុង រតនា ប្រធានមន្ទីរសុខាភិបាលខេត្ត បានលើកឡើងថា បន្ទាប់ពីទទួលបានព័ត៌មានករណីកម្មករនៅក្រុមហ៊ុនខាងលើស្លាប់ជាបន្តបន្ទាប់ភ្លាម មន្ទីរបានបានចាត់ក្រុមការងារជំនាញចុះស្រាវជ្រាវករណីនេះភ្លាមផងដែរដោយលទ្ធផលបានបង្ហាញថា មុនពេលស្លាប់អ្នកជំងឺដែលមកទទួលសេវានៅមណ្ឌលសុខភាពស្រែអង្គ្រង ស្ថិតក្នុងស្រុកកូនមុំ គឺមានសភាពធ្ងន់ធ្ងរដូចជា សន្លប់ ប្រកាច់ សញ្ញាជីវិតខ្សោយ ជួនកាលស្ទើរគ្មានសញ្ញាជីវិត។ ហើយតាមការ សាកសួរប្រវត្តិអ្នកជំងឺមានរោគសញ្ញាចុកពោះ ក្អួត ហត់ អស់កម្លាំង ស្រវាំងភ្នែក ភាគច្រើនពួកគាត់បានទទួលទានស្រាជាប្រចាំ ហើយគឺគ្មានប្រវត្តិជំងឺប្រចាំកាយទេ។ ជាទូទៅមុនពេលចេញរោគសញ្ញាអ្នកជំងឺមានសុខភាពធម្មតា ក្រោយចេញរោគសញ្ញាចន្លោះពី៤ទៅ៦ម៉ោង បណ្តាលអោយអ្នកជំងឺស្លាប់។ លោកវេជ្ជបណ្ឌិតបន្តថាតាមការសន្និដ្ឋានបឋមអាចបណ្តាលមកពីការពុលសារធាតុគីមី (ថ្នាំបាញ់ស្មៅនិងថ្នាំបាញ់សម្លាប់សត្វល្អិត) រួមផ្សំនឹការរស់នៅមិនមានអនាម័យស្អាតផងដែរ។
ឯកឧត្តម ញ៉ែម សំអឿន ក៏បានជម្រុញឲ្យមន្ទីរជំនាញពាក់ព័ន្ធត្រូវបន្តស្រាវជ្រាវករណីនេះបន្តទៀតពិសេសមន្ទីរត្រូវយកសំណាកវិភាគទៅធ្វើការវិភាគនៅរាជធានីភ្នំពេញដើម្បីបានលទ្ធផលមួយជាក់លាក់ពីករណីនេះ ៕
