ស្នងការខេត្ដកំពង់ស្ពឺ ផ្តាំផ្ញើដល់សិក្ខាកាមទាំងអស់ ត្រូវយកចំណេះដឹង និងជំនាញ ដែលបានសិក្សា យកទៅអនុវត្ដការងារជាមន្រ្ដីនគរបាលមូលដ្ឋាន អោយមានគុណភាពខ្ពស់
ភ្នំពេញ៖ លោកឧត្ដមសេនីយ៍ទោ សម សាមួន ស្នងការនគរបាលខេត្ដកំពង់ស្ពឺ នារសៀលថៃ្ងទី៣០ ខែមិថុនា ឆ្នាំ២០២៣ បានអញ្ជើញជាអធិបតីក្នុងពិធីបិទវគ្គបណ្ដុះបណ្ដាលស្ដីពី “តួនាទី ភារកិច្ចរបស់ប៉ុស្តិ៍នគរបាលរដ្ឋបាល” ជូនមន្រ្ដីនគរបាលតាមបណ្ដាអធិការដ្ឋាននគរបាលកក្រុង-ស្រុកទាំង០៨ នៅសាលប្រជុំស្នងការដ្ឋាននគរបាលខេត្ដ។ ដោយមានការអញ្ជេីញចូលរួមពីសំណាក់ លោក លោកស្រី ស្នងការរង លោក លោកស្រី នាយការិយាល័យជំនាញ ជនបង្គោលស្នងការដ្ឋាននគរបាលខេត្ដ និងមន្រ្ដីប៉ុស្ដិ៍ ដែលមកពីតាមបណ្ដាអធិការក្រុង-ស្រុកទាំង០៨។
ក្នុងឱកាសនោះ លោកឧត្តមសេនីយ៍ទោ ស្នងការ បានផ្តាំផ្ញើដល់សិក្ខាកាមទាំងអស់ ដែលបានបញ្ចប់វគ្គបណ្ដុះបណ្ដាលនេះ ត្រូវយកចំណេះដឹង និងជំនាញ ដែលបានសិក្សា យកទៅអនុវត្ដការងារជាមន្រ្ដីនគរបាលមូលដ្ឋាន អោយមានគុណភាពខ្ពស់ សម្រាប់បម្រេីការងារជូនអង្គភាព និងបម្រេីសេវាប្រជាពលរដ្ឋតាមមូលដ្ឋានរបស់ខ្លួន។
ជាកិច្ចបញ្ចប់ លោកឧត្តសេនីយ៍ទោ សម សាមួន ស្នងការ ក៏បានប្រគល់លិខិតសរសើរ ប័ណ្ណសរសើរ ដល់គ្រូបង្គោល និងវិញ្ញាបនបត្របញ្ជាក់ការសិក្សាជូនដល់សិក្ខាកាមបញ្ចប់វគ្គបណ្តុះបណ្តាលនេះផងដែរ ៕
