លោកជំទាវ តោ ពិឡា៖ ជាសមាជិកគណបក្សប្រជាជនកម្ពុជា គឺត្រូវបោះឆ្នោតជូនគណបក្សប្រជាជនកម្ពុជា លេខរៀងទី១៨

ភ្នំពេញ៖ លោកជំទាវ តោ ពិឡា អនុប្រធានក្រុមការងារគណបក្សចុះមូលដ្ឋានស្រុកព្រៃឈរ ទទួលបន្ទុកឃុំបឹងណាយ តំណាងដ៏ខ្ពង់ខ្អស់ ឯកឧត្តម ប៉ាន សូរស័ក្តិ សមាជិកគណៈកម្មាធិការកណ្តាល និងជាប្រធានក្រុមការងារគណបក្សចុះមូលដ្ឋានស្រុកព្រៃឈរ និងស្រុកបាធាយ បានអញ្ជើញជាអធិបតីក្នុងពិធីប្រកាសបញ្ចូល និងទទួលស្គាល់សមាជិកថ្មី គណបក្សប្រជាជនកម្ពុជា ឃុំបឹងណាយ ចំនួន ១.៥២៧នាក់ នៅស្នាក់ការគណបក្សឃុំបឹងណាយ នាព្រឹកថ្ងៃទី២៥ ខែមិថុនា ឆ្នាំ២០២៣។

ក្នុងពិធីនេះក៏មានការចូលរួមពីសំណាក់ លោក លោកស្រី ជាថ្នាក់ដឹកនាំក្រុមកាងារចុះមូលដ្ឋាន ស្រុក និងបណ្តាភូមិ ក្នុងឃុំបឹងណាយផងដែរ។

ជាកិច្ចចាប់ផ្តើម លោកជំទាវ តោ ពិឡា បានគូសបញ្ជាក់ថា ពិធីប្រកាសទទួលស្គាល់ និងបញ្ចូលសមាជិកថ្មីគណបក្សប្រជាជនកម្ពុជានាថ្ងែនេះ ប្រៀបដូចជាបុណ្យប្រចាំជីវិតរបស់យើង ក្រោមម្លប់សន្តិភាព និងការអភិវឌ្ឍដែលយើងទាំងអស់គ្នាពិតជាមានសំណាងដ៏ធំធេងដែលមានសម្តេចអគ្គមហាសេនាបតីតេជោ ហ៊ុន សែន ជាប្រធានគណបក្សប្រជាជនកម្ពុជា។

ក្នុងឱកាសនោះ លោកជំទាវ បានថ្លែងនូវសារដឹងគុណដ៏ជ្រាលជ្រៅបំផុតចំពោះស្ថាបនិកមគ្គទេសក៍ឯកគឺ សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានជួយសង្រ្គោះអាយុជីវិតប្រជាជនឱ្យរួចផុតពីរបបប្រល័យពូជសាសន៍ ប៉ុល ពត ដ៏យង់ឃ្នង និងបានដឹកនាំប្រទេសពីគំនរផេះផង់រហូតមានការរីកចម្រើនលើគ្រប់វិស័យដូចសព្វថ្ងៃនេះ។

លោកជំទាវ តោ ពិឡា អនុប្រធានក្រុមការងារគណបក្សចុះមូលដ្ឋានស្រុកព្រៃឈរ ទទួលបន្ទុកឃុំបឹងណាយ បានបន្ថែមទៀតថា សម្តេចតេជោ ហ៊ុន សែន ប្រធានគណបក្សប្រជាជនកម្ពុជា ជាប្រតិបត្តិករ នយោបាយ ឈ្នះ ឈ្នះ ដែលបាននាំមកនូវសន្តិភាព ឯកភាពជាតិពេញលេញគ្របដណ្តប់ទូទាំងព្រះរាជាណាចក្រកម្ពុជា។ ជាពិសេស ថ្មីៗនេះ សម្តេចតេជោ ហ៊ុន សែន បានជួយសង្រ្គោះអាយុជីវិតប្រជាជនកម្ពុជាពីគ្រោះភ័យជាលើកទី២ ដោយអនុលោមតាមអភិក្រមផ្ការីកក្នុងយុទ្ធនាការចាក់វ៉ាក់សាំងទូទាំងប្រទេស មិនគិតថ្លៃ ដោយមិនប្រកាន់ពណ៌សម្បុរ បក្សនយោបាយ សាសនា និងមិនបែងចែកតំបន់ឡើយ ដែលឆ្លុះបញ្ចាំងពីគុណធម៌ដ៏ធំធេងរបស់សម្តេចតេជោជូនប្រជាជនកម្ពុជានៅទូទាំងប្រទេសផងដែរ។

លោកជំទាវ បានបន្តថ្លែងថា “មានតែគណបក្សប្រជានជនកម្ពុជាតែមួយគត់ ដែលជាទីពឹងដ៏ប្រសើរឧត្តុងឧត្តម” ហើយក្នុងនាមជាសមាជិកថ្មីត្រូវគោរពតាមលក្ខន្តិកៈ និងបទបញ្ជាផ្ទៃក្នុងបក្ស ហើយត្រូវមានភាពស្មោះត្រង់ និងមិនមានបក្សផ្សេងនៅក្នុងបេះដូងឡើយ។

លោកជំទាវ បានបញ្ជាក់បន្ថែមថា ជាសមាជិកគណបក្សប្រជាជនកម្ពុជា ត្រូវរៀបចំត្រៀមខ្លួនសម្រាប់ការបោះឆ្នោត ដោយត្រូវមានឈ្មោះក្នុងបញ្ជីបោះឆ្នោត មានឯកសារអត្តសញ្ញាណប័ណ្ណ និងទៅបោះឆ្នោត ព្រមទាំងគៀរគរបងប្អួន និងក្រុមគ្រួសារបោះឆ្នោតជូនគណបក្សប្រជាជនកម្ពុជា។

លោកជំទាវ ប្រធានគណៈអធិបតី បានកោតសរសើរ និងវាយតម្លៃខ្ពស់ ចំពោះការប្តេជ្ញាចិត្តរបស់តំណាងសមាជិកថ្មីគណបក្សប្រជាជនកម្ពុជាដែរ ដែលបានគាំទ្របេក្ខភាព សម្តេចអគ្គមហាសេនាបតីតេជោ ហ៊ុន សែន ជាបេក្ខភាពនាយករដ្ឋមន្រ្តី និងគាំទ្រ ឯកឧត្តម ហ៊ុន ម៉ាណែត ជាបេក្ខភាព នាយករដ្ឋមន្រ្តី នាពេលអនាគត។

ជាចុងបញ្ចប់ លោកជំទាវ តោ ពិឡា អនុប្រធានក្រុមការងារគណបក្សចុះមូលដ្ឋានស្រុកព្រៃឈរ ទទួលបន្ទុកឃុំបឹងណាយ បានអំពាវនាវដល់សមាជិកអង្គពិធីទាំងមូល ឱ្យចូលរួមទប់ស្កាត់រាល់ល្បិចកលទុច្ចរិតរបស់ក្រុមប្រឆាំងក្រៅច្បាប់ទាំងក្នុង និងក្រៅប្រទេស ដែលបំផ្លើសពីការពិតនៅកម្ពុជា និងបានអំពាវនាវឱ្យសមាជិកគណបក្សប្រជាជនកម្ពុជា ទៅចូលរួមបោះឆ្នោតឱ្យបានគ្រប់ៗគ្នា និងបោះឆ្នោតជូនគណបក្សប្រជាជនកម្ពុជា បានទទួលលេខរៀងទី១៨ សម្រាប់ការប្រកួតប្រជែង ក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ ឆ្នាំ២០២៣ នៅថ្ងៃទី២៣ ខែកក្កដា ឆ្នាំ២០២៣ ខាងមុខនេះ និងបានឧបត្ថម្ភថវិកាជូនសមាជិកថ្មី ១.៥២៧ ក្នុងមួយនាក់ៗ ថវិកា ២០.០០០រៀល។

បន្ទាប់មក លោកជំទាវ តោ ពិឡា បានចុះជួបសំណេះសំណាល ជាមួយប្រជាពលរដ្ឋតាមខ្នងផ្ទះ និងសមាជិកសមាជិការគណបក្សប្រជាជនកម្ពុជា តាមខ្នងផ្ទះចំនួន១ភូមិ គឺភូមិវត្តចាស់ ៦០ក្រុមបក្ស ១៣៤ខ្នងផ្ទះ ១៥៣គ្រួសាបក្ស ក្នុងឃុំបឹងណាយ ស្រុកព្រៃឈរ ខេត្តកំពង់ចាម៕