សាខាកាកបាទក្រហមកម្ពុជាខេត្តស្វាយរៀង ប្រារព្ធពិធីអបអរសាទរព្រះរាជពិធីចម្រើនព្រះជន្មវស្សាសម្តេចម៉ែ ព្រះប្រធានកិត្តិយសកាកបាទក្រហមកម្ពុជា គម្រប់ខួប ៨៧ យាងចូល ៨៨ ព្រះវស្សា

ភ្នំពេញ៖ ដើម្បីអបអរសាទរព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ព្រះប្រធានកិត្តិយសកាកបាទក្រហមកម្ពុជា គម្រប់ខួប ៨៧ យាងចូល ៨៨ ព្រះវស្សា នៅទីស្នាក់ការសាខាកាកបាទក្រហមកម្ពុជាខេត្តស្វាយរៀង នាព្រឹកថ្ងៃទី ១៨ ខែ មិថុនា ឆ្នាំ ២០២៣ បានរៀបចំពិធីសូត្រមន្តចម្រើនព្រះបរិត្ត និងប្រគេនចង្ហាន់ ទេយ្យទានដល់ព្រះសង្ឃចំនួន ៤អង្គ ក្រោមអធិបតីភាពលោកជំទាវ ដួង វណ្ណា ប្រធានកិត្តិយសសាខាកាកបាទក្រហមកម្ពុជាខេត្តស្វាយរៀង និងឯកឧត្តម ម៉ែន វិបុល ប្រធានគណៈកម្មាធិការសាខាកាកបាទក្រហមកម្ពុជាខេត្ត ព្រមទាំង ឯកឧត្តម លោកជំទាវ គណៈកិត្តិយស គណៈកម្មាធិការសាខា និង ក្រុមប្រតិបត្តិសាខាជាច្រើនរូបទៀត។

ក្នុងឱកាសនេះ ឯកឧត្តម ម៉ែន វិបុល ប្រធានគណៈកម្មាធិការសាខាកាកបាទក្រហមកម្ពុជាខេត្ត បានអាននូវសារថ្វាយព្រះពរសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ក្នុងឱកាសព្រះរាជពិធីចម្រើនព្រះជន្មវស្សា ៨៧ យាងចូល ៨៨ ព្រះវស្សា។

ក្នុងឱកាសដ៏មហានក្ខត្តឫក្សដ៏ឧត្តុង្គឧត្តមនេះ យើងទាំងអស់គ្នាជាកូនចៅ ចៅទួតរបស់ព្រះអង្គ សូមសំដែងនូវការគោរព និងចងចាំគ្មានថ្ងៃបំភ្លេចបាន នូវស្នាព្រះហស្តព្រះរាជសកម្មភាពសម្ដេចម៉ែ សម្ដេចយាយជាអម្ចាស់ក្នុងព្រះរាជបេសកកម្មបម្រើប្រទេសជាតិមាតុភូមិ ក្នុងវិស័យមនុស្សធម៌ ព្រមទាំងបានបួងសួងថ្វាយព្រះពរជ័យមហាប្រសើរថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សូមព្រះអង្គរមានព្រះរាជសុខភាពល្អបរិបូរណ៌ ព្រះកាយពលមាំមួន ព្រះជន្មាយុយឺនយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់របស់ប្រជារាស្ត្រជា កូនចៅ ចៅទួតរបស់ព្រះអង្គតរៀងទៅ។

ទេយ្យវត្ថុវេរប្រគេនដល់ព្រះសង្ឃទាំង ៤ អង្គ (៤វត្ត) ក្នុង ១អង្គប្រគេន៖ ចង្ហាន់ ១ស្រាក់, អង្ករ ៥០គីឡូក្រាម, មី ២កេស, ត្រីខ ២០កំប៉ុង, ទឹកក្រូច ១កេស, ទឹកសុទ្ធ ១កេស, ទេយ្យទាន ១កញ្ចប់, ស្លាដក់១, បច្ច័យ ២០ម៉ឺនរៀល គ្រូអាចារ្យ ១នាក់ ទេយ្យទាន ១កញ្ចប់ បច្ច័យ ២០ម៉ឺនរៀល សម្តេចកិត្តិសង្គហបណ្ឌិត ម៉ែន សំអន បានចូលរួមបច្ច័យកសាងវត្តក្នុង ១វត្ត ៤០ម៉ឺនរៀល លោកជំទាវ ហៅ ចន្ទ័សិរីទេពី ចៅ ភិរុណ ឧបត្ថម្ភបន្ថែមបច្ច័យក្នុង ១អង្គ ២៥ម៉ឺនរៀល យាយជី តាជី ១០នាក់ ក្នុងម្នាក់ៗ បច្ច័យ ៥ម៉ឺនរៀល យុវជនកាកបាទក្រហមកម្ពុជា ៦នាក់ ក្នុងម្នាក់ៗ ថវិកា ៥ម៉ឺនរៀល ៕