ប្អូនស្រីរបស់មេដឹកនាំកូរ៉េខាងជើង រិះគន់កិច្ចប្រជុំ UN លើការបាញ់បង្ហោះផ្កាយរណបចារកម្ម

បរទេស៖ សារព័ត៌មានរដ្ឋ KCNA បានរាយការណ៍ថា ប្អូនស្រីរបស់មេដឹកនាំកូរ៉េខាងជើងលោក Kim Jong Un គឺលោកស្រី Kim Yo Jong បានបរិហារកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិ ស្តីពីការបាញ់បង្ហោះផ្កាយរណបនាពេលថ្មីៗនេះរបស់ប្រទេសកូរ៉េខាងជើង លើ “ការទាមទារប្លន់” ពីសហរដ្ឋអាមេរិក នេះបើយោងតាមសារព័ត៌មានរដ្ឋ KCNA រាយការណ៍កាលពីថ្ងៃអាទិត្យ (ទី៤ ខែមិថុនា)។ លោកស្រីក៏បានហៅកិច្ចប្រជុំនេះថា “អយុត្តិធម៌បំផុត” ខណៈពេលដែលបដិសេធការដាក់ទណ្ឌកម្ម និងបានប្តេជ្ញាចាត់វិធានការ “ការពារខ្លួនឯង”។

ប្អូនស្រីរបស់មេដឹកនាំកូរ៉េខាងជើង ដូចដែលទីភ្នាក់ងារសារព័ត៌មានកណ្តាលកូរ៉េ (KCNA) បានរាយការណ៍ថា កិច្ចប្រជុំអង្គការសហប្រជាជាតិកាលពីសប្តាហ៍មុន គឺជាការរំលឹកមួយទៀតថា ក្រុមប្រឹក្សានេះកំពុងដើរតួជា “ឧបសម្ព័ន្ធផ្នែកនយោបាយ” ដល់ទីក្រុងវ៉ាស៊ីនតោន។ លោកស្រីក៏បានឲ្យដឹងបន្តទៀតថា UNSC ដោយទទួលយក “ការទាមទារប្លន់” របស់សហរដ្ឋអាមេរិក គឺជាការមិនអើពើសិទ្ធិរបស់កូរ៉េខាងជើងក្នុងការអភិវឌ្ឍន៍អវកាស។

លោកស្រី Kim Yo Jong បានឲ្យដឹងថា ខ្ញុំមានការអាក់អន់ចិត្តយ៉ាងខ្លាំងដែល UNSC តែងតែរិះគន់ការអនុវត្តសិទ្ធិអធិបតេយ្យភាពរបស់យើង ដូចដែលសហរដ្ឋអាមេរិកចង់បាន ហើយថ្កោលទោសយ៉ាងខ្លាំង និងច្រានចោលនេះជាទង្វើអយុត្តិធម៌បំផុតក្នុងការជ្រៀតជ្រែកចូលកិច្ចការផ្ទៃក្នុង និងរំលោភលើអធិបតេយ្យភាពរបស់យើង។

លោកស្រីក៏បានហៅការបាញ់បង្ហោះផ្កាយរណបរបស់កូរ៉េខាងជើងថាជា “វិធានការប្រឆាំងការពារខ្លួនឯងស្របច្បាប់” ចំពេលមានការគំរាមកំហែងពីសហរដ្ឋអាមេរិក និងសម្ព័ន្ធមិត្តរបស់ខ្លួន។ ទីក្រុងព្យុងយ៉ាងក៏ធ្លាប់បានចោទប្រកាន់ក្រុងវ៉ាស៊ីនតោនផងដែរ ពីការបង្កើនភាពតានតឹងនៅក្នុងតំបន់ ជាមួយនឹងសមយុទ្ធយោធាប្រចាំឆ្នាំថ្មីៗរបស់ពួកគេ។

ប្អូនស្រីរបស់មេដឹកនាំកូរ៉េខាងជើងក៏បានប្តេជ្ញាបន្តបាញ់បង្ហោះផ្កាយរណបចារកម្ម ដែលប្រទេសនេះហៅថាចាំបាច់ ដើម្បីទប់ទល់នឹងវត្តមានយោធាអាមេរិកដែលកំពុងកើនឡើងរបស់ទីក្រុងវ៉ាស៊ីនតោននៅក្នុងតំបន់។

លោកស្រី គីម យ៉ូជុង បានបញ្ជាក់ដោយសំដៅលើកូរ៉េខាងជើងតាមឈ្មោះផ្លូវការរបស់ខ្លួនថា សាធារណរដ្ឋប្រជាធិបតេយ្យប្រជាមានិតកូរ៉េថា “កូរ៉េខាងជើងនឹងបន្តចាត់វិធានការសកម្ម ដើម្បីអនុវត្តសិទ្ធិស្របច្បាប់ទាំងអស់នៃរដ្ឋអធិបតេយ្យ រួមទាំងការបាញ់បង្ហោះផ្កាយរណបឈ្លបយកការណ៍យោធា” ។ បន្ថែមពីលើនេះ លោកស្រីបានឲ្យដឹងថា ទីក្រុងព្យុងយ៉ាងនឹងមិនទទួលស្គាល់ដំណោះស្រាយទណ្ឌកម្មរបស់អង្គការសហប្រជាជាតិឡើយ។

កិច្ចប្រជុំ UNSC ជុំវិញការបរាជ័យនៃការបាញ់បង្ហោះផ្កាយរណបចារកម្មរបស់ខ្លួនត្រូវបានសហរដ្ឋអាមេរិកហៅកាលពីសប្តាហ៍មុន។ ចាប់តាំងពីពេលនោះមក ការបាញ់បង្ហោះត្រូវបានរិះគន់ដោយសហរដ្ឋអាមេរិក កូរ៉េខាងត្បូង និងជប៉ុន ដែលបានបញ្ជាក់ថា ខ្លួនបានរំលោភលើដំណោះស្រាយរបស់អង្គការសហប្រជាជាតិ ដែលរារាំងប្រទេសដែលមានអាវុធនុយក្លេអ៊ែរពីការសាកល្បងណាមួយដោយប្រើបច្ចេកវិទ្យាមីស៊ីលផ្លោង។

ប្រការនេះបាននាំឱ្យអគ្គលេខាធិការរងនៃអង្គការសហប្រជាជាតិទទួលបន្ទុកកិច្ចការនយោបាយ និងសន្តិភាព លោក Rosemary DiCarlo កាលពីថ្ងៃសុក្រដើម្បីទទួលបន្ទុក UNSC ជុំវិញ “ការខ្វះឯកភាព និងសកម្មភាព” លើការសាកល្បងរបស់កូរ៉េខាងជើង។ ទន្ទឹមនឹងនេះ អ្នកវិភាគបានព្រមានថា ប្រសិនបើទីក្រុងព្យុងយ៉ាងជោគជ័យក្នុងការដាក់ពង្រាយផ្កាយរណបរបស់ខ្លួន សមត្ថភាពឃ្លាំមើលនឹងអនុញ្ញាតឱ្យកូរ៉េខាងជើងកំណត់គោលដៅអាមេរិក និងសម្ព័ន្ធមិត្តកូរ៉េខាងត្បូងកាន់តែត្រឹមត្រូវ។

នៅថ្ងៃទី ៣១ ខែឧសភា ប្រទេសកូរ៉េខាងជើងបានបាញ់បង្ហោះគ្រាប់រ៉ុក្កែត Chollima-១ របស់ខ្លួន ដែលប៉ុន្មាននាទីក្រោយមកបានបាត់បង់កម្លាំង និងបានធ្លាក់ចូលទៅក្នុងសមុទ្រជាមួយនឹងបន្ទុកផ្កាយរណបរបស់ខ្លួន។ ក្រោយមក នៅក្នុងការប្រកាសដ៏កម្រមួយនៅថ្ងៃដដែលនោះ ទីក្រុងព្យុងយ៉ាងបានឲ្យដឹងថា ខ្លួននឹងធ្វើការសាកល្បងមួយផ្សេងទៀតឱ្យបានឆាប់តាមដែលអាចធ្វើទៅបាន។

ប្រភព៖ WION

ប្រែសម្រួលដោយ៖ [ឡាយ លីហួ]