ចិនជឿជាក់លើការដឹកនាំរបស់គណបក្សប្រជាជនកម្ពុជា នឹងធ្វើឱ្យជីវភាពរបស់ប្រជាពលរដ្ឋកម្ពុជា កាន់តែល្អប្រសើរ
ភ្នំពេញ៖ រដ្ឋាភិបាលចិន តាមរយៈឯកអគ្គរដ្ឋទូតរបស់ខ្លួន បានបង្ហាញការជឿជាក់លើការដឹកនាំរបស់គណបក្សប្រជាជនកម្ពុជា នឹងធ្វើឱ្យជីវភាពរបស់ប្រជាពលរដ្ឋកម្ពុជា កាន់តែល្អប្រសើរ។
នៅព្រឹកថ្ងៃចន្ទ ទី២២ ខែឧសភា ឆ្នាំ២០២៣ ក្នុងពិធីសំណេះសំណាលជាមួយកម្មករ និយោជិតនៅតំបន់សេដ្ឋកិច្ចពិសេសក្រុងព្រះសីហនុ ដែលជាទីតាំងវិនិយោគដោយអ្នកវិនិយោគរបស់ចិននោះ ឯកឧត្ដម វ៉ាង វិនធាន ឯកអគ្គរដ្ឋទូតចិន ប្រចាំនៅកម្ពុជា បានគូសរំលេចថា រដ្ឋាភិបាលចិន មានក្តីសោមនស្សរីករាយ ដែលបានឃើញកម្ពុជា ក្រោមការដឹកនាំរបស់សម្តេចតេជោនាយករដ្ឋមន្ត្រី ហ៊ុន សែន រាជរដ្ឋាភិបាលកម្ពុជាអាណត្តិទី៦ សម្រេចបានដោយជោគជ័យនូវស្ថេរភាពនយោបាយ សង្គម រក្សាបាននូវកំណើនសេដ្ឋកិច្ចយ៉ាងឆាប់រហ័សក្នុងរយៈពេលច្រើនឆ្នាំជាប់ៗគ្នា។
បន្ថែមពីលើនោះ ការដឹកនាំរបស់សម្តេចតេជោ បានធ្វើឱ្យជោគលើសមិទ្ធធំៗ មានដូចជាការប្រយុទ្ធប្រឆាំងនឹងកូវីដ១៩, ការធ្វើជាប្រធានអាស៊ានឆ្នាំ២០២២ ប្រកបដោយកម្រិតខ្ពស់ និងរៀបចំព្រឹត្តិការណ៍ប្រកួតស៊ីហ្គេមលើកទី៣២ ឆ្នាំ២០២៣ ប្រកបដោយជោគជ័យយ៉ាងពេញលេញ។
ឯកឧត្ដម វ៉ាង វិនធាន បានគូសរំលេចទៀតថា សព្វថ្ងៃទំនុកចិត្ត និងកម្លាំងចិត្តប្រជាពលរដ្ឋកម្ពុជា កំពុងកើនឡើងឥតឈប់ឈរ ធ្វើឱ្យឥទ្ធិពលក្នុងតំបន់ និងឆាកអន្តរជាតិ ត្រូវបានលើកកម្ពស់យ៉ាងខ្លាំង។
ដោយសារតែឆ្នាំនេះជាឆ្នាំកម្ពុជារៀបចំការបោះឆ្នោតជ្រើសរើសតំណាងរាស្ត្រនីតិកាលទី៧ ឯកឧត្ដម វ៉ាង វិនធាន ក្នុងនាមរដ្ឋាភិបាលចិន បានបង្ហាញការជឿជាក់លើការដឹកនាំរបស់គណបក្សប្រជាជនកម្ពុជាយ៉ាងដូច្នេះ «យើងជឿជាក់ថា ដរាបណាមានការដឹកនាំរបស់គណបក្សប្រជាជនកម្ពុជាយូរអង្វែងនោះ ជីវភាពរស់នៅរបស់ប្រជាពលរដ្ឋកម្ពុជា នឹងកាន់តែល្អប្រសើរឡើងពីមួយថ្ងៃទៅមួយថ្ងៃ»។
រដ្ឋាភិបាលចិន ក៏ដូចជាបក្សកុម្មុយនិស្តចិន បានក្លាយទៅជាដៃគូសហប្រតិបត្តិការដ៏ស្អិតល្មួតជាមួយរាជរដ្ឋាភិបាល ក៏ដូចជាគណបក្សប្រជាជនកម្ពុជា ក្រោមការដឹកនាំរបស់សម្តេចតេជោ ហ៊ុន សែន នៅចុងទសវត្សរ៍៩០ ពោលក្រោយពេលគណបក្សប្រជាជនកម្ពុជាឈ្នះឆ្នោតដឹកនាំប្រទេសឆ្នាំ១៩៩៨។
ទំនាក់ទំនងកម្ពុជា និងចិន ក៏ត្រូវបានលើកកម្ពស់ជាបន្តបន្ទាប់ រហូតក្លាយជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំ២០១០។ ទំនាក់ទំនង ក៏ត្រូវបានពូនជ្រុំកាន់តែរឹងមាំដូចដែកថែបមកដល់ពេលបច្ចុប្បន្ន។ រដ្ឋាភិបាលកម្ពុជា និងចិន ក៏ដូចជាក្របខណ្ឌបក្សប្រជាជនកម្ពុជា និងបក្សកុម្មុយនិស្តចិន តែងតែបានបង្ហាញនូវការគាំទ្រគ្នាយ៉ាងមុតមាំក្នុងក្របខណ្ឌទ្វេភាគី បញ្ហាតំបន់ និងអន្តរជាតិ។
ក្នុងពិធីនាព្រឹកមិញនេះ សម្តេចតេជោ ហ៊ុន សែន បានរំលឹកជាថ្មីម្តងទៀតនូវតួនាទីដ៏សំខាន់របស់ចិន ក្នុងការចូលរួមចំណែកកសាង និងអភិវឌ្ឍន៍ប្រទេសកម្ពុជា ឱ្យមានការរីកចម្រើន។ សម្តេចតេជោ បន្តរំលឹកនូវសំណួរដែលសម្តេចតែងតែលើកឡើងរឿយៗថា បើមិនឱ្យសម្តេច ពឹងចិន តើឱ្យពឹងនរណា?
កម្មវិធីនាព្រឹកមិញនេះ ជាកម្មវិធីមួយអបអរសាទរខួប១០ឆ្នាំ នៃគំនិតផ្តួចផ្តើម «ខ្សែក្រវាត់ និងផ្លូវ» ដែលដាក់ចេញដោយលោក ស៊ី ជិនពីង ប្រធានាធិបតីចិននោះ សម្តេចតេជោនាយករដ្ឋមន្ត្រី ក៏បានសរសើរដល់គំនិតផ្តួចផ្តើមនេះ គឺជាគំនិតផ្តួចផ្តើមដ៏ល្អ ជួយអភិវឌ្ឍន៍ប្រទេសកម្ពុជា នាំឱ្យវត្តមានពហុកីឡដ្ឋានជាតិមរតកតេជោ, ផ្លូវល្បឿនលឿនភ្នំពេញ-ព្រះសីហនុ, ផ្លូវថ្នល់ និងស្ពានឆ្លងទន្លេជាច្រើនខ្សែ។
តាមរយៈអ្វីដែលសម្តេចតេជោ ហ៊ុន សែន និងលោក វ៉ាង វិនធាន លើកឡើងក្នុងវេទិ កានាព្រឹកមិញនេះ គឺជាការបង្ហាញឱ្យឃើញនូវជំហររក្សានូវការគាំទ្រគ្នាដ៏មុតមាំមួយ រវាងរាជរដ្ឋាភិបាលកម្ពុជា និងរដ្ឋាភិបាលចិន ក៏ដូចជារវាងបក្សប្រជាជនកម្ពុជា និងបក្សកុម្មុយនិស្តចិន៕
