ឧបនាយករដ្ឋមន្ត្រី កែ គឹមយ៉ាន ពាំនាំការផ្ដាំផ្ញើសួរសុខទុក្ខ និងជូនពរជ័យ ពីថ្នាក់ដឹកនាំកំពូលនៃព្រះរាជាណាចក្រកម្ពុជា ក្នុងពិធីបើកព្រឹត្តិការណ៍ ចូលឆ្នាំបន្ទាយឆ្មារ ឆ្នាំ២០២៣

ភ្នំពេញ៖ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរខាងមុខនេះឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ និងលោកជំទាវឧកញ៉ាហេមចិត្តាអគ្គមហាឧបាសិកាពុទ្ធសាសនូបត្ថម្ភបណ្ឌិត ម៉ៅ ម៉ាល័យ  បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធីបើកព្រឹត្តិការណ៍ ចូលឆ្នាំបន្ទាយឆ្មារ ឆ្នាំ២០២៣ ក្រោមប្រធានបទ “ជួបជុំគ្រួសារ ចូលឆ្នាំបន្ទាយឆ្មារ ក្រោមម្លប់សន្តិភាព” ព្រឹកថ្ងៃព្រហស្បតិ៍ ទី១៣ ខែមេសា ឆ្នាំ២០២៣ នៅបរិវេណប្រាសាទបន្ទាយឆ្មារ ឃុំបន្ទាយឆ្មារ ស្រុកថ្មពួក  ខេត្តបន្ទាយមានជ័យ ។

ថ្លែងក្នុងឱកាសនោះ ឯកឧត្តម ឧបនាយករដ្ឋមន្ត្រី កែ គឹមយ៉ាន បានពាំនាំការផ្ដាំផ្ញើសួរសុខទុក្ខ និងជូនពរជ័យ ពីថ្នាក់ដឹកនាំកំពូលនៃព្រះរាជាណាចក្រកម្ពុជា និងកោតសរសើរដល់អាជ្ញាធរដែនដីគ្រប់ថ្នាក់ នៃខេត្តបន្ទាយមានជ័យ ដែលតែងតែជឿជាក់ និងគាំទ្រយ៉ាងធំធេងចំពោះការដឹកនាំរបស់គណបក្សប្រជាជនកម្ពុជានៅគ្រប់នីតិកាលនៃការបោះឆ្នោត ដើម្បីបន្តដឹកនាំ និងអភិវឌ្ឍន៍ប្រទេស។ ជាក់ស្តែងក្រោយថ្ងៃជ័យជំនះ៧មករា១៩៧៩ និងបានបន្តខិតខំតស៊ូគ្រប់ដំណាក់កាលយកជិវិតធ្វើដើមទុនរហូតទទួលបានសន្តិភាពពេញលេញក្រោមនយោបាយឈ្នះ ឈ្នះ ដឹកនាំដោយសម្តេចតេជោ ហ៊ុន សែន ទទួលបានសន្តិភាពប្រជាពលរដ្ឋយើងមានឱកាសជួបជុំសប្បាយធ្វើបុណ្យទាន។

ជាមួយនោះ ឯកឧត្តម ឧបនាយករដ្ឋមន្ត្រី បានអំពាវនាវបងប្អូនប្រជាពលរដ្ឋកុំបន្តបាញ់បោកក្រុមប្រឆាំងនៅក្រៅប្រទេសតាមប្រព័ន្ធផ្សព្វផ្សាយសង្គម។អាជ្ញាធរដែនដីសូមជួយសម្រួលតាមនីតិវិធីដល់គណបក្សនយោបាយផ្សេងៗទៀតដែលមានឈ្មោះក្នុងបញ្ជីបោះឆ្នោត។ សូមបងប្អូនប្រជាពលរដ្ឋដែលមានឈ្មោះក្នុងបញ្ជីអញ្ជើញទៅបោះឆ្នោតអោយបានគ្រប់គ្នា ហើយបោះឆ្នោតជូនបក្សប្រជាជនកម្ពុជាដើម្បីគាំទ្រសម្ដេចតេជោ ហ៊ុន សែន បន្តដឹកនាំប្រទេស និងបន្តគាំទ្របេក្ខភាពឯកឧត្តម ហ៊ុន ម៉ាណែត ជានាយករដ្ឋមន្ត្រីនាពេលអនាគត។

ក្នុងឱកាសនោះឯកឧត្តម ឧបនាយករដ្ឋមន្ត្រី កែ គឹមយ៉ាន និងលោកជំទាវ បានធ្វើការបួងសួងដល់ទេវតាឆ្នាំថ្មី ព្រះនាមកិមិរាទេវី បុត្រីទី៦ នៃកបិលមហាព្រហ្ម ដែលនឹងយាងមកគ្រប់គ្រងអភិបាលមនុស្សលោកយើងនៅចាប់ពីថ្ងៃទី១៤ ខែមេសា ឆ្នាំ២០២៣ សូមប្រោសព្រំប្រទានពរជ័យបវរមហាប្រសើរជូនដល់ប្រជាពលរដ្ឋទូទាំងព្រះរាជណាចក្រកម្ពុជាសូមជួបប្រទះតែពុទ្ធពរ និងពរប្រាំប្រការ គឺអាយុ វណ្ណ: សុខ: ពល: និងបដិភាណ: កុំបីឃ្លៀងឃ្លាតឡើយ៕