ឧត្តមសេនីយ៍ទោ សិទ្ធិ ឡោះ ជួបសំណេះសំណាលសួរសុខទុក្ខ និងប្រគល់អំណោយឯកឧត្តម កែ គឹមយ៉ាន ជូនអតីតស្នងការ ស្នងការរង ចូលនិវត្តន៍ក្នុងឱកាសបុណ្យចូលឆ្នាំថ្មី

ភ្នំពេញ៖ ដោយក្តីគោរព ស្រឡាញ់រាប់អាន និងក្តីនឹករលឹកអតីត ជាស្នងការ ស្នងការរង នៃស្នងការដ្ឋាននគរបាលខេត្តបន្ទាយមានជ័យ ចូលនិវត្តន៍ ក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ ជារៀងរាល់ឆ្នាំ លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្ត បន្ទាយមានជ័យ ជំនាន់ទី១១នេះ គឺតែងតែប្រារព្ធធ្វើពិធីជួបសំណេះសំណាលជាមួយអតីតស្នងការ ស្នងការរង ចូលនិវត្តន៍ និងចែកជូនវត្ថុអនុស្សាវរីយ៍ រួមទាំងថវិកាផងដែរ ។ជាក់ស្តែងចូលឆ្នាំថ្មីប្រពៃណីជាតិ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី១៤-១៥-១៦ ខែមេសា ឆ្នាំ ២០២៣ នឹងឈានចូលមកដល់ខាងមុខដ៏ខ្លីនេះ និងដើម្បីអបអរសាទរទេវតាឆ្នាំថ្មីព្រះនាម«កិមិរាទេវី» នៅរសៀលថ្ងៃទី១០ ខែមេសា ឆ្នាំ២០២៣ នេះ លោកឧត្តមសេនីយ៍ទោ សិទ្ធិ ឡោះ បានរៀបចំពិធីជួបសំណេះសំណាលសួរសុខទុក្ខ និងប្រគល់ជូនអំណោយរបស់ឯកឧត្តម ឧបនាយករដ្ឋមន្ត្រី កែ គឹមយ៉ាន ប្រធានអាជ្ញាធរជាតិប្រយុទ្ធប្រឆាំងគ្រឿងញៀន ជាប្រធានក្រមការងារថ្នាក់កណ្តាល ចុះមូលដ្ឋានខេត្តបន្ទាយមានជ័យ និងលោកជំទាវ ក្នុង១០នាក់ទទួលបាន ភេសជ្ជៈ០១កន្ត្រក កន្សែងពោះគោ០១និងថវិកាចំនួន៣៦ម៉ឺនរៀល ដល់អតីតស្នងការ ស្នងការរង ចំនួន០៨រូប នៅសាលប្រជុំ(ក) ស្នងការដ្ឋាន នគរបាលខេត្តបន្ទាយមានជ័យ ដោយការចូលរួមពី លោកឧត្តមសេនីយ៍ វរសេនីយ៍ ស្នងការរង លោកនាយការិយាល័យ លោកអធិការ ទាំង០៩ ស្រុក ក្រុង លោកមេបញ្ជាការវរសេនាតូចការពារព្រំដែនគោកទាំង០៤ ។

ក្នុងពិធីសំណេះសំណាលនោះ លោឧត្តមសេនីយ៍ទោ សិទ្ធិ ឡោះ បានរំលឹកអំពីពីស្នាដៃ និងកិច្ចខិតខំប្រឹងប្រែងរបស់អតីតថ្នាក់នាំនៃស្នងការដ្ឋាននគរបាលខេត្តបន្ទាយមានជ័យជំនាន់មុន ដែលបានយកអស់ស្មារតី ទទួលខុសត្រូវថែរក្សាសន្តិសុខ សណ្តាប់ធ្នាប់ សុវត្ថិភាព ជូនប្រជាពលរដ្ឋនិងប្រទេសជាតិ និងបានចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជាក្នុងការថែរក្សាការពារសុខសន្តិភាពនិងរួមចំណែកអភិវឌ្ឍន៍ប្រទេសឲ្យមានការជឿនលឿនដូចសព្វថ្ងៃនេះ ក្រោមការដឹកនាំ ដ៏ឈ្លាសវ៉ៃ ប្រកបដោយគតិបណ្ឌិត សម្តេចតេជោហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ។

លោកឧត្តមសេនីយ៍ទោ សិទ្ធិ ឡោះ បានបញ្ជាក់ថា៖ក្នុងនាមលោកតំណាងឲ្យថ្នាក់ដឹកនាំស្នងការដ្ឋាននគរបាលខេត្ត បន្ទាយមានជ័យជំនាន់ក្រោយ និងក្នុងនាមលោកផ្ទាល់ តែងតែអនុវត្តតាមគំរូល្អៗនិងយកបទពិសោធន៍ពី លោកពូ បងៗ ដែលជាថ្នាក់ដឹកនាំជំនាន់មុន ដើម្បីបន្តអនុវត្តភារកិច្ចរបស់ខ្លួនឲ្យបានល្អនិងទទួលបានទំនុកទុកចិត្តពីប្រជាពលរដ្ឋនៅមូលដ្ឋាន ពីបញ្ហាសន្តិសុខ សុវត្ថិភាពរបស់ពួកគាត់ ។

លោកឧត្តមសេនីយ៍ ស្នងការបានជំរាបជូនទៀតថា៖ដើម្បីមានបរិស្ថានល្អ នៅក្នុងបរិវេណស្នងការដ្ឋាននេះ លោក បានដឹកនាំនិងប្រមូលកៀងគរ ថវិកាពីសប្បុរសជនមួយចំនួននិងថវិការបស់លោកផ្ទាល់ផងនោះ បានចាក់បេតុង កម្រាស់១៥តឹក ក្នុងបរិវេណស្នងការដ្ឋាន រៀបចំសួនច្បារ ដាក់ភ្លើងបំភ្លឺពេលយប់ ។

មួយវិញទៀត លោកក៏បានកសាងអាគារបណ្ណាល័យ០១ខ្នង នៅខាងមុខ សម្រាប់តំកល់រាល់ឯកសារ ច្បាប់ផ្សេងៗពីមុន ទុកសម្រាប់មន្ត្រីនគរបាលជំនាន់ក្រោយបានចូលសិក្សាឈ្វេងយល់ផងដែរ។ ពិសេសជាងនេះទៀតនោះ ដើម្បីវឌ្ឍនភាពការងារបានជោគជ័យនូវ រាល់ភារកិច្ចរបស់ថ្នាក់លើបានប្រគល់ជូន លោកតែងតែណែនាំដល់មន្ត្រីនគរបាលគ្រប់ជាន់ថ្នាក់ត្រូវខិតំប្រែងបំពេញភារកិច្ចរបស់ខ្លួនបានល្អតាមតួនាទីរៀងៗខ្លួន និងត្រូវគោរពវិន័យលេខ០០៦ របស់នគរបាលជាតិឲ្យបានខ្ជាប់ខ្ជួន ស្លៀកពាក់ឲ្យត្រឹមត្រូវ អាកប្បកិរិយាសុភាពរាបសារជាមួយប្រជាពលរដ្ឋ មានសុជីវធម៌ ក្រមសីលធម៌ វិជ្ជាជីវៈ ជាកងកម្លាំងនគរបាលជាតិ មានឆន្ទៈបំរើប្រទេសជាតិនិងប្រជាជន និងកត្តាសាមគ្គីភាពផ្ទៃក្នុងជាធំផងដែរ៕