បុណ្យចូលឆ្នាំថ្មីប្រពៃណីខ្មែរឆ្នាំនេះ រាជរដ្ឋាភិបាលបំផុសឱ្យបន្តថែរក្សាវប្បធម៌ជាតិ និងបង្កភាពសប្បាយ រីករាយនៅទូទាំងប្រទេស
ភ្នំពេញ៖បុណ្យចូលឆ្នាំថ្មីប្រពៃណីខ្មែរឆ្នាំនេះ រាជរដ្ឋាភិបាលបំផុសឱ្យបន្តថែរក្សាវប្បធម៌ជាតិ និងបង្កភាពសប្បាយរីករាយនៅទូទាំងប្រទេស តាមរយៈការបង្កើតឱ្យការលេង ល្បែងប្រជាប្រិយខ្មែរ និងកម្មវិធីសង្ក្រាន្តតាមស្ថាប័ន និងតាមភូមិឃុំនានាជាដើម។
ឯកឧត្តម ម៉ម ប៊ុននាង សមាជិកអចិន្ត្រៃយ៍ព្រឹទ្ធសភាបានមើល ឃើញថា នៅទូទាំងប្រទេសប្រជាពលរដ្ឋខ្មែរមានការជួបជុំ និងរៀបចំកម្មវិធីសប្បាយៗជាច្រើនបន្ទាប់ពីប្រទេសជាតិយើងបានទប់ស្កាត់នូវជំងឺកូវីដ១៩ ប្រកប ដោយភាពជោគជ័យ។
ឯកឧត្តមបានបន្តថា ភាពសប្បាយរីករាយរបស់ប្រជាពលរដ្ឋក្នុងឱកាសបុណ្យចូលឆ្នាំប្រពៃណីខ្មែរឆ្នាំនេះ បានកើតចេញពីការដឹក នាំដ៏ត្រឹមត្រូវរបស់សម្តេចអគ្គមហា សេនាបតីតេជោហ៊ុនសែន នាយករដ្ឋមន្ត្រី នៃព្រះរាជាណាចក្រកម្ពុជាដែលបានថែរក្សាសន្តិភាព ការអភិវឌ្ឍ និងទប់ស្កាត់បាននូវជំងឺកូវីដ១៩បានជោគជ័យតាមរយៈការខិតខំស្វែងរកវ៉ាក់សាំងការពារកូវីដ ១៩មកចាក់ជូនប្រជាពលរដ្ឋបានគ្រប់ៗគ្នា។
សំឡេង៖ « យើងទាំងអស់គ្នាបានមើលឃើញទាំងអស់គ្នា តាមបណ្តាវត្តអារាម និងស្ថាប័នជាតិ ដូចជាក្រសួងមន្ទីរ សាលាខេត្តស្រុក ភូមិ បានរៀបចំសង្ក្រាន្ត ការរៀបចំត្រៀមទទួលទេវតា យ៉ាងគគ្រឹកគគ្រេង ប្រជាពលរដ្ឋយើងមានទឹកមុខរីករាយ សប្បាយទាំងអស់គ្នា នេះហើយគឺការទទួលយកសុខសន្តិភាពរបស់រាជរដ្ឋាភិបាលដែលបាននាំមកដោយសម្តេចអគ្គមហាសេនាបតីតេជោ ហ៊ុនសែន នាយករដ្ឋមន្ត្រី ដែលបានបូជាសាច់ស្រស់ឈាមស្រស់នាំមកសុខសន្តិភាពមកជូនប្រជាពលរដ្ឋ។ ដូច្នេះហើយទើបថ្ងៃនេះ យើងឃើញប្រជាពលរដ្ឋទាំងអស់បានចូលរួមយ៉ាងរីករាយក្រោមដំបូលសន្តិភាពដែលនាំមកដោយសម្តេចតេជោ ជូនប្រជាពលរដ្ឋ»។
ជាមួយគ្នានេះដែរ លោកគង់ សិរីរ័ត្នអ្នកតាមដានផ្នែកសង្គមបានវាយ តម្លៃថា បុណ្យចូលឆ្នាំប្រពៃណីខ្មែរ ឆ្នាំនេះ ពិតជាមានលក្ខណៈសប្បាយជាងឆ្នាំមុនៗ ។
សំឡេង៖ «នៅមុនចូលឆ្នាំខ្មែរយើងឃើញក្រសួងស្ថាប័នទាំងថ្នាក់ជាតិ និងក្រោមជាតិ សាលារៀនជាច្រើន គឺមានលក្ខណៈផុលផុសជាងឆ្នាំមុនៗ ក្នុងការរៀបចំកម្មវិធីសប្បាយតាមបែបប្រពៃណី ។ ទាំងនេះ ដោយ សារតែប្រជាពលរដ្ឋខ្មែរយើងលែងព្រួយបារម្ភពីជំងឺកូវីដ១៩ ។ តែពួកគាត់នៅតែចូលរួមទប់ស្កាត់ និងអនុវត្តតាមវិធានសុខាភិបាល។ ខ្ញុំបានកត់សម្គាល់ឃើញថា មិនថាតែក្រសួងស្ថាប័នផ្សេងទេ សូម្បីតែតាមផ្ទះ តាមភូមិនានា ក៏មានការតុបតែ រៀបចំជាសង្ក្រាន្ត មានការលេង ល្បែងប្រជាប្រិយខ្មែរ មានចោល ឈូង ទាញព្រ័ត្រ លាក់កន្សែង បោះអង្គុញហូរហែតាមបែបប្រពៃណីរបស់ខ្មែរយើង ទាំងនេះបង្ហាញថា ប្រទេសជាតិយើងមានសុខសន្តិភាពល្អ ប្រជាពលរដ្ឋអាចសប្បាយគ្រប់ទិសគ្រប់ទីទាំងអស់»។
ក្រៅពីការរៀបចំឱ្យមានការកម្សាន្តសប្បាយនៅតាមគ្រប់ភូមិស្រុក ទីវត្តអារាមនានាទូទាំងប្រទេស រាជរដ្ឋា ភិបាល ក៏បានរៀបចំឱ្យមាន អង្គរសង្ក្រាន្ត នៅខេត្តសៀមរាប ដោយបានលើកយកនូវកេរដំណែល អរិយធម៌ វប្បធម៌ ទំនៀមទម្លាប់ និងស្នាដៃរបស់បុព្វបុរសខ្មែរមករំលេចឡើងជាផ្ទាំងទស្សនីយភាពវប្បធម៌ជាច្រើន ដូចជា៖ ល្បែងប្រជាប្រិយ របាំបុរាណ របាំប្រពៃណី របាំប្រជាប្រិយ ការបង្ហាញពីជីវភាព រស់នៅរបស់ប្រជាជនកម្ពុជានៅតាមតំបន់ និងសិល្បៈទស្សនីយភាពជាច្រើនទៀត។
សូមបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរឆ្នាំនេះ ចាប់ផ្តើមនៅថ្ងៃសុក្រ៩រោច ខែចេត្រ ឆ្នាំថោះចត្វាស័ក ពុទ្ធសករាជ២៥៦៦ ត្រូវនឹងថ្ងៃទី១៤ខែមេសា ឆ្នាំ២០២៣៕
