សម្តេចតេជោ៖ ជីវិតខ្ញុំពិតជាគ្រោះថ្នាក់ និងផុយស្រួយ លើការធ្វើកំណែទម្រង់ខាងនយោបាយ និងសេដ្ឋកិច្ច

ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងថា ជីវិតរបស់ពិតជាគ្រោះថ្នាក់និងផុយស្រួយ លើការធ្វើកំណែទម្រង់ខាងនយោបាយ និងសេដ្ឋកិច្ច ។

ក្នុងឱកាសអញ្ជើញប្រកាសដាក់ឱ្យអនុវត្តកម្មវិធី កែទម្រង់គ្រប់គ្រង​ហិរញាវត្ថុសាធារណៈដំណាក់កាលទី៤ នៅថ្ងៃទី២០​ ខែមីនា ឆ្នាំ២០២៣ សម្តេចតេជោ បានឲ្យដឹងថា ការធ្វើកំណែទម្រង់របស់សម្តេចទាំង ២វិស័យនោះ រួមមាន ទី១ កំណែទម្រង់ខាងនយោបាយ គឺត្រូវដោះស្រាយជម្លោះកម្ពុជាតាមរយៈការចរចា និងទី២ កំណែទម្រង់ខាងសេដ្ឋកិច្ច។ សម្តេចលើកឡើងថា បញ្ហាផ្ទៃក្នុងមិនយល់គ្នាជាគ្រោះថ្នាក់ធំណាស់ ក្នុងការធ្វើកំណែទម្រង់របស់ប្រទេសជាតិ។

ប្រមុខដឹកនាំកំពូលរាជរដ្ឋាភិបាលកម្ពុជា បានបញ្ជាក់យ៉ាងដូច្នេះ «ខ្ញុំអាចនិយាយបានថា ជីវិតរបស់ខ្ញុំនេះ គឺជាជីវិតប្រឈមជាមួយគ្រោះថ្នាក់គ្រប់ពេល មិនមែនគ្រាន់តែបញ្ហាយកក្បាលខ្ញុំទៅដោះដូរ ជាមួយនឹងការរស់រានមានជីវិតចេញពីរបបខ្មែរក្រហមនោះទេ ហើយក៏មិនមែនការរយកក្បាលរបស់ខ្ញុំទៅដោះដូរជាមួយសន្តិភាពដែលអ៊ុនតាក់មិនអាចសម្រេចបាននោះដែរ។ ប៉ុន្តែ ក្បាលរបស់ខ្ញុំក៏បានដោះដូរជាមួយនឹងកំណែទម្រង់ដែលត្រូវបានធ្វើ នៅពេលដែលខ្ញុំចាប់ផ្តើមតំណែងជាផ្លូវការជានាយករដ្ឋមន្ត្រី។ ពេលនោះជាជីវិតខ្ញុំ ពិតជាគ្រោះថ្នាក់និងផុយស្រួយ នៅពេលថា នៅពេលចូលកាន់តំណែងជានាយករដ្ឋមន្ត្រី ខ្ញុំដាក់ចេញនូវកញ្ចប់កែទម្រង់ ២ ដើរទន្ទឹមជាមួយគ្នា។ ទី១ កំណែទម្រង់ខាងនយោបាយ គឺត្រូវដោះស្រាយបញ្ហាជម្លោះកម្ពុជា តាមរយៈនៃការចរចា។ ចំណុចនេះ ក៏ជាគ្រោះថ្នាក់នៃគ្រោះថ្នាក់របស់ខ្ញុំ។ ទី២ គឺកំណែទម្រង់ខាងសេដ្ឋកិច្ចនោះឯង» ៕