ឯកឧត្តម សាយ សំអាល់៖ មានតែគណបក្សប្រជាជនកម្ពុជាមួយគត់ ដែលអាចនាំនាវា កម្ពុជាឆ្ពោះទៅដល់ត្រើយសុភមង្គល
ភ្នំពេញ៖ ឯកឧត្តម សាយ សំអាល់ សមាជិកគណៈកម្មាធិការកណ្តាល និងជាប្រធានក្រុមការងារ គណបក្សចុះជួយមូលដ្ឋានខេត្តព្រះសីហនុបានលើកឡើងថា មានតែគណបក្សប្រជាជនកម្ពុជាមួយគត់ ដែលអាចនាំនាវាកម្ពុជាឆ្ពោះទៅដល់ត្រើយសុភមង្គល។
ក្នុងឱកាសអញ្ជើញជាអធិបតីក្នុងពិធីបញ្ចូលសមាជិកថ្មីគណបក្សប្រជាជនកម្ពុជា សង្កាត់កោះរ៉ុង សង្កាត់កោះរ៉ុងសន្លឹម ក្រុងកោះរ៉ុង ខេត្តព្រះសីហនុ នៅរសៀលថ្ងៃទី១១ ខែមីនា ឆ្នាំ២០២៣ឯកឧត្តម សាយ សំអាល់បានលើកឡើងទៀតថា ការស្ម័គ្រចិត្តចូលរួមជីវភាពនយោបាយរបស់បងប្អូន ទាំងអស់គ្នាជាមួយគណបក្សប្រជាជនកម្ពុជានៅពេលនេះ គឺជាការសម្រេចចិត្តមួយដ៏ត្រឹមត្រូវ ហើយជាពិសេស គឺការបង្ហាញពីភាពជឿជាក់របស់បងប្អូន មកលើគណបក្សប្រជាជនកម្ពុជា និងសម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានគណបក្ស ប្រជាជនកម្ពុជា ក្នុងការដឹកនាំប្រទេសបន្តទៅមុខទៀត។
ឯកឧត្តមបានគូសបញ្ជាក់ថា ឆ្លងកាត់ដំណើរនយោបាយរបស់ប្រទេសកម្ពុជា មិនមានចលនា នយោបាយណា មានធនធានក្នុងការដឹកនាំ និង កសាងមាតុភូមិដ៏កំសត់របស់យើងក្រៅពី គណបក្សប្រជាជនកម្ពុជាឡើយ ។
ឯកឧត្តមបានសង្កត់ធ្ងន់ថា ការបញ្ចូលសមាជិកថ្មីនាឱកាសនេះ ជាចំនុចពិសេសមិនត្រឹមតែដើម្បី ដណ្តើមប្រៀបឈ្នះសម្រាប់ការបោះឆ្នោតប៉ុណ្ណោះទេ តែជាការឆ្លុះបញ្ជាក់អោយឃើញ «ការកសាងអនាគតរួមគ្នា»។
គួរបញ្ជាក់ឱ្យដឹងថា ក្នុងពិធីបញ្ចូលសមាជិកគណបក្សប្រជាជនកម្ពុជាថ្មី ចំនួន២៩៤នាក់ នៅសង្កាត់កោះរ៉ុង និង សង្កាត់កោះរ៉ុងសន្លឹម ក្រុងកោះរ៉ុង ក៏មានការអញ្ជើញចូលរួមពីឯកឧត្តម គួច ចំរើន សមាជិកគណៈកម្មាធិការកណ្តាល និងជាប្រធានគណៈកម្មាធិការគណបក្សខេត្ត ព្រះសីហនុ ព្រមទាំងថ្នាក់ដឹកនាំ សមាជិក សមាជិកាក្រុមការងារគណបក្សចុះមូលដ្ឋានខេត្ត ក្រុង សង្កាត់ ឃុំ នៃខេត្តព្រះសីហនុ ផងដែរ៕
