ឧត្តមសេនីយ៍ឯក សាយ ម៉េងឈាង៖ ប្រជាពលរដ្ឋត្រូវមានឯកសារផ្ទាល់ខ្លួន ដើម្បីជៀសវាងពេលចាំបាច់ត្រូវការប្រើ

ភ្នំពេញ៖ ឯកឧត្តម ឧត្តមសេនីយ៍ឯក សាយ ម៉េងឈាង អគ្គនាយករង នៃអគ្គនាយកដ្ឋានអត្តសញ្ញាណកម្ម បានបញ្ជាក់ថា ឯកសារអត្តសញ្ញាណកម្មគ្រប់ប្រភេទរួមមាន៖ សំបុត្រអត្រានុកូលដ្ឋាន សេចក្តីចម្លងសំបុត្រអត្រានុកូលដ្ឋាន (សំបុត្រកំណើត សំបុត្រអាពាហ៍ពិពាហ៍ សំបុត្រមរណភាព) សៀវភៅស្នាក់នៅ សៀវភៅគ្រួសារ អត្តសញ្ញាណប័ណ្ណសញ្ជាតិខ្មែរ លិខិតឆ្លងដែន ។ល។

ឯកឧត្តម ឧត្តមសេនីយ៍ឯក បានបន្តថា ប្រជាពលរដ្ឋគួរត្រូវស្នើសុំឱ្យមានស្រាប់សម្រាប់ទុកប្រើប្រាស់ កុំរង់ចាំមន្ត្រីកោះហៅ ឬអញ្ជើញឱ្យមកធ្វើ ដើម្បីជៀសវាងពេលចាំបាច់ត្រូវការ ទើបមកស្នើសុំ ដែលអាចយឺតយ៉ាវ និងប្រឈមនឹងបញ្ហាផ្សេងៗ។

ឯកឧត្តម ឧត្តមសេនីយ៍ឯក បានបន្ថែមថា សម្រាប់ព័ត៌មានបន្ថែមសូមលោកអ្នក Download កម្មវិធី GDI eServices ដើម្បីមើល ឬសាកសួរព័ត៌មាន ឬទំនាក់ទំនងលេខ ១២៧១ / ០១៧ ៨៩៨ ៩១៥ រៀងរាល់ថ្ងៃច័ន្ទដល់សុក្រ ក្នុងម៉ោងធ្វើការ។ មន្ត្រីជំនាញរង់ចាំទទួល ផ្តល់ព័ត៌មាន និងដោះស្រាយជូន ៕