សម្តេចតេជោ ណែនាំរដ្ឋមន្ត្រីក្រសួងអប់រំ ជជែកជាមួយឡាវ ឱ្យផ្តល់ថ្លៃអាហារូបករណ៍ជូននិស្សិតជាប្រាក់ដុល្លារ
ភ្នំពេញ៖ នាយករដ្ឋមន្ត្រីនៃកម្ពុជាសម្តេចតេជោ ហ៊ុន សែន បានណែនាំឱ្យឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា ធ្វើការងារជាមួយនឹងក្រសួងអប់រំនៅប្រទេសឡាវ ឱ្យផ្តល់ថ្លៃអាហារូបករណ៍ជូននិស្សិតជាប្រាក់ដុល្លារ ដើម្បីឆ្លើយតបការប្រែប្រួលអត្រាប្តូរប្រាក់។
ការណែនាំរបស់សម្ដេចបែបនេះ ក្រោយសម្ដេចជួបសំណោះសំណាលជាមួយនិស្សិតអាហាររូបករណ៍របស់កម្ពុជា ទៅសិក្សានៅប្រទេសឡាវ និងបានស្តាប់នូវបញ្ហាប្រឈមផ្សេងៗរបស់និស្សិតដែលទៅសិក្សានៅទីនោះនាពេលកន្លងមក។
នៅក្នុងឱកាសអញ្ជើញជាអធិបតីភាពប្រគល់សញ្ញាបត្រ ជូននិស្សិត សាកលវិទ្យាល័យ ភូមិន្ទ ភ្នំពេញ ជាង៧ពាន់នាក់ នៅព្រឹកថ្ងៃទី២៤ ខែកុម្ភៈ សម្តេចតេជោ ហ៊ុន សែនបានមានប្រសាសន៍ថា “សុំបញ្ជាក់ជូនឯកឧត្តម ហង់ ជួនណារ៉ុន ផងដែរ បន្តធ្វើការងារជាមួយនឹងក្រសួងអប់រំឡាវ ព្រោះនៅពេលដែលខ្ញុំបានជួបនិស្សិតយើង ដែលកំពុងសិក្សានៅឡាវនោះ គឺខ្ញុំស្តាប់នូវការលំបាករបស់ពួកគាត់យ៉ាងមិច ហើយអ្វីដែលជាការលំបាករបស់ពួកគាត់ នៅត្រង់ថាយើងមានគោលការណ៍បដិការផ្គត់ផ្គង់ឱ្យនិស្សិតរបស់យើង គឺនិស្សិតឡាវ និងយើង គឺដូចគ្នា ១៨០$ដូចគ្នា ប៉ុន្តែឥលូវនេះ ១៨០$នៅឡាវ គេបើកចេញជាប្រាក់គីប ហើយប្រាក់គីបដែលបានប្តូរនៅតាមធនាគារ និងប្តូរនៅតាមទីផ្សារគឺខុសគ្នា ចឹងតម្លៃប្រាក់នេះនៅសល់ត្រឹមតែ ៩០ទេ ដោយសារប្រាក់គីបចុះថ្លៃ ហើយសម្រាប់កម្ពុជា គឺគ្មានអ្វីជាចំណោទនោះទេ”។
សម្តេចតេជោ ហ៊ុន សែន ក៏បានគូសបញ្ជាក់ដែរថា ពាក់ព័ន្ធនិងរឿងប្រាក់ឧបត្ថម្ភសម្រាប់និស្សិតអាហាររូបរណ៍នេះ សម្តេចក៏បានស្នើនាយករដ្ឋមន្ត្រីឡាវដែរថា ដើម្បីកុំឱ្យមានការលំបាកទៅលើបញ្ហាការប្តូរប្រាក់ គឺគួរតែស្រុះស្រួលគ្នា ផ្តល់ជាប្រាក់ដុល្លារដល់និស្សិតតែម្តងទៅ យើងផ្តល់ប្រាក់ដុល្លារឱ្យនិស្សិតឡាវនៅកម្ពុជា ហើយឡាវផ្តល់ប្រាក់ដុល្លារឱ្យនិស្សិតកម្ពុជានៅឡាវតែម្តងទៅ សំដៅធ្វើយ៉ាងណាជួយកាត់បន្ថយការលំបាកសម្រាប់និស្សិតដែលកំពុងសិក្សា៕
