ឯកឧត្តម ជា ប៉ោ៖ មានតែគណបក្សប្រជាជនកម្ពុជាតែប៉ុណ្ណោះ ដែលជាអ្នករក្សាការពារសុខសន្តិភាព ជូនប្រជាពលរដ្ឋ
ភ្នំពេញ៖ ឯកឧត្តម ជា ប៉ោ ប្រធានក្រុមការងារគណបក្សចុះមូលដ្ឋានឃុំស្វាយរំពារ នាព្រឹកថ្ងៃអាទិត្យ ៧រោច ខែមាឃ ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែកុម្ភៈ ឆ្នាំ២០២៣ បានអញ្ជើញជាអធិបតីក្នុងកិច្ចប្រជុំផ្សព្វផ្សាយសេចក្តីសម្រេចនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា ថ្ងៃទី២៨-២៩ ខែមករា ឆ្នាំ២០២៣ ។ កិច្ចប្រជុំនេះក៏មានការចូលរួមពី ឯកឧត្តមបណ្ឌិត ស៊ន ពិសិដ្ឋ អនុប្រធានទី១ លោក កេត ជុន ប្រធានគណៈកម្មាធិការគណបក្សឃុំ ព្រមទាំងលោក លោកស្រី នាងកញ្ញា ជា សមាជិកក្រុមការងារគណបក្ស សមាជិកអចិន្ត្រៃយ៍គណបក្សឃុំ ភូមិ និងសមាជិកគណបក្សប្រមាណ២៥៦នាក់។
បន្ទាប់ពីប្រកាសហេតុ និងគណៈអធិបតី លោក កេត ជុន បានឡើងអានសេចក្តីសម្រេចនៃមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជនកម្ពុជា ថ្ងៃទី២៨-២៩ ខែមករា ឆ្នាំ២០២៣ ជូនកិច្ចប្រជុំ។
មានប្រសាសន៍ទៅកាន់សមាជិកកិច្ចប្រជុំ ឯកឧត្តម ជា ប៉ោ បានលើកឡើងថា សមិទ្ធផលរាជរដ្ឋាភិបាលក្រោមការដឹកនាំរបស់សម្តេច តេជោ ហ៊ុន សែន ប្រធានគណបក្សប្រជាជនកម្ពុជារួមមាន៖
១- ការពាររឹងមាំនូវសុខសន្តិភាពជូនប្រជាពលរដ្ឋ រក្សាស្ថិរភាពនយោបាយ។
២- ភាពជោគជ័យនៃការកម្ចាត់កូវីដ-១៩ ជាការគិតគូរពីសុខភាពប្រជាពលរដ្ឋ ចាក់វ៉ាក់សាំងជូនដោយមិនគិតថ្លៃ និងបន្តការចាក់ជារៀងរាល់៦ខែម្តង។
៣- ជោគជ័យនៃលទ្ធិប្រជាធិបតេយ្យ និងនីតិរដ្ឋ ដែលត្រូវបានពង្រឹង
៤- ការកែទម្រង់លើគ្រប់វិស័យ និងការលើកកម្ពស់អភិបាលកិច្ចល្អ ដើម្បីធានាភាពជាម្ចាស់ប្រទេស។
៥- ការរក្សាលំនឹងសេដ្ឋកិច្ចក្រោយវិបត្តិកូវីដ-១៩ ដូចជាការឧបត្ថម្ភសាច់ប្រាក់ជូនងាយរងគ្រោះ។
៦- ការអនុវត្តនយោបាយការបរទេសឯករាជ្យ ផ្អែកលើគោលការណ៍ច្បាប់អន្តរជាតិ ប្រឆាំងនឹងការឈ្លានពានរបស់រុស្ស៊ីលើអ៊ុយក្រែន
៧- ការរៀបចំកិច្ចប្រជុំកំពូលអាស៊ានលើកទី៤០ និង៤១ដោយជោគជ័យ។
នៅទីបញ្ចប់ឯកឧត្តមប្រធានជម្រាបជូនអង្គប្រជុំថាមានតែគណបក្សប្រជាជនកម្ពុជាប៉ុណ្ណោះ ដែលជាអ្នករក្សាការពារសុខសន្តិភាព ដូច្នេះសូមសមាជិក សមាជិកាយេីងអញ្ជើញទៅបោះឆ្នោតជូនគណបក្សប្រជាជនកម្ពុជាឲ្យបានទាំងអស់គ្នា នៅថ្ងៃទី២៣ ខែកក្កដា ឆ្នាំ២០២៣ ដើម្បីបន្តដឹកនាំរក្សាសុខសន្តិភាព និងការអភិវឌ្ឍ ៕
