ឯកឧត្តម គឹម សន្តិភាព៖ គណបក្សប្រជាជនកម្ពុជា មិនស្កប់ស្កល់និងជ័យជន្នះនោះទេ យើងនៅតែពង្រឹង និងពង្រីកប្រៀបឈ្នះបន្ថែមទៀត

ភ្នំពេញ៖ ឯកឧត្តមបណ្ឌិត គឹម សន្តិភាព សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាអនុប្រធានក្រុមការងារគណបក្សប្រជាជនកម្ពុជា ចុះមូលដ្ឋានស្រុកពញាក្រែក ខេត្តត្បូងឃ្មុំ ទទួលបន្ទុកលើការងារយុវជន បានលើកឡើងថា គណបក្សប្រជាជនកម្ពុជា មិនស្កប់ស្កល់និងជ័យជន្នះនោះទេ យើងនៅតែពង្រឹង និងពង្រីកប្រៀបឈ្នះបន្ថែមទៀត។

នៅថ្ងៃទី៥ ខែកុម្ភៈ ឆ្នាំ២០២៣ ឯកឧត្តមបណ្ឌិត គឹម សន្តិភាព បានអញ្ជើញជួបសំណេះសំណាលជាមួយសកម្មជននិងយុវជនគណបក្សប្រជាជនកម្ពុជា ក្នុងឃុំត្រពាំងផ្លុង ស្រុកពញាក្រែក ខេត្តត្បូងឃ្មុំ។

ពិធីនេះ ក៏មានការចូលរួមជាគណៈអធិបតី ឯកឧត្តម កែវ ពិសិដ្ឋ សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានក្រុមការងារគណបក្សប្រជាជនកម្ពុជា ចុះមូលដ្ឋានឃុំពពេល  រួមទាំងឯកឧត្តម លោកជំទាវ លោក លោកស្រី ជាអនុប្រធានក្រុមការងារគណបក្សប្រជាជនកម្ពុជាចុះជួយមូលដ្ឋានឃុំពពេល និងក្រុមការងារថ្នាក់ស្រុក-ឃុំ មេភូមិ យុវជនភូមិ-ឃុំ និងប្រជាការពារ។

ថ្លែងក្នុងពិធីនេះ ឯកឧត្តមបណ្ឌិត គឹម សន្តិភាព បានសង្កត់ធ្ងន់ថា “គណបក្សប្រជាជនកម្ពុជា មិនស្កប់ស្កល់នឹងជ័យជន្នះនោះទេ យើងនៅតែពង្រឹង និងពង្រីកប្រៀបឈ្នះបន្ថែមលើមូលដ្ឋានជ័យជម្នះនេះ ដោយការខិតខំបម្រើប្រជាពលរដ្ឋបន្ថែមទៀត”។

ជាមួយនឹងការសំណោះសំណាល  ឯកឧត្តមបណ្ឌិត គឹម សន្តិភាព និងក្រុមការងារក៏បានផ្តល់នូវអំណោយរបស់ឯកឧត្តមបណ្ឌិត ហ៊ុន ម៉ាណែត និងលោកជំទាវ ជូនដល់ក្រុមការងារយុវជនគណបក្សឃុំ ដើម្បីពង្រឹងសកម្មភាពគណបក្សក្នុងមូលដ្ឋានផងដែរ៕