ឯកឧត្តម អ៊ូច ភា អញ្ជើញសំណេះសំណាល ជាមួយលោកគ្រូអ្នកគ្រូ និងផ្ដល់ថវិកាលើកទឹកចិត្ត ដល់សិស្សជ័យលាភី និទ្ទេស A ចំនួន ៧០នាក់ នៅទូទាំងខេត្តតាកែវ

ខេត្តតាកែវ៖ ឯកឧត្តម អ៊ូច ភា អភិបាលខេត្តតាកែវ ព្រមទាំង លោក លោកស្រី អភិបាលរងខេត្ត នៅព្រឹកថ្ងៃសៅរ៍ ទី២១ ខែមករា ឆ្នាំ២០២៣ បានអញ្ជើញជួបសំណេះសំណាលជាមួយ លោកគ្រូ អ្នកគ្រូ អាណាព្យាបាល និងសិស្សជ័យលាភីនិទ្ទេស A ចំនួន ៧០នាក់ សម័យប្រលង ថ្ងៃទី ០៥ – ០៦ ខែធ្នូ ឆ្នាំ២០២២។

ពិធីនេះក៏មានការអញ្ជើញចូលរួមដោយ លោក ឡោ វីរិទ្ធ ប្រធានមន្ទីរអប់រំ យុវជន និងកីឡាខេត្ត លោក លោកស្រី អនុប្រធានមន្ទីរ លោកគ្រូ អ្នកគ្រូ លោក នាយកវិទ្យាល័យ និងអាណាព្យាបាលចូលរួមផងដែរ។

មានប្រសាសន៍សំណេះសំណាលនាឱកាសនោះដែរ ឯកឧត្តម អ៊ូច ភា អភិបាលខេត្តបានសម្ដែងនូវការ អបអរសាទរ ចំពោះក្មួយៗទាំងអស់ ដែលបានខិតខំប្រឹងប្រែងរៀនសូត្រ រហូតទទួលបានជោគជ័យ ជូនដល់គ្រួសារ និងសង្គមជាតិ ហើយក៏បាន ផ្តាំផ្ញើដល់ក្មួយៗ ដែលពុំបានប្រលងជាប់ ត្រូវធ្វើការសិក្សារៀនសូត្រ ឲ្យបានខ្លាំងក្លាបន្ថែមទៀត ដើម្បីទទួលបានជោគជ័យ នៅឆ្នាំក្រោយទៀត ព្រោះក្មួយៗទាំងអស់ គឺជា ទំពាំងស្នងឫស្សីសម្រាប់ប្រទេសជាតិ និងជាធនធានមនុស្សដ៏សំខាន់ នាថ្ងៃខាងមុខ ក្មួយៗមិនត្រឹមតែរៀន ឲបានតែជាប់ប៉ុណ្ណោះទេ ត្រូវរៀនឲចេះសម្រាប់ខ្លួនឯង ហើយក្មួយៗ អាចមានឱកាសសិក្សា និងប្រលងជាប់នៅពេលនេះ ក៏ដោយសារប្រទេសយើងមានសន្តិភាព ដូចនេះយើងទាំងអស់គ្នាសូមអរគុណសន្តិភាព។

ឆ្លៀតក្នុងឱកាសជួបសំណេះសំណាលនាពេលនេះដែរ សិស្សជ័យលាភីនិទ្ទេស A ចំនួន ៧០នាក់ ដោយក្នុងម្នាក់ៗ ទទួលបានថវិកាលើកទឹកចិត្ត ចំនួន ៥០០ដុល្លារ ក្នុងនោះ ឯកឧត្តម កិត្តិនីតិកោសលបណ្ឌិត ប៊ិន ឈិន ឧបនាយករដ្ឋមន្រ្តីប្រចាំការ រដ្ឋមន្រ្តីទីស្ដីការគណៈរដ្ឋមន្រ្តី ថវិកា ២០០ដុល្លារ និង ឯកឧត្តម អ៊ូច ភា អភិបាល នៃគណៈអភិបាលខេត្តតាកែវ និងលោកជំទាវ ស្រី ប៉ុណ្ណាដាវី ថវិកា ៣០០ដុល្លារ និងជូនថវិកាលើកទឹកចិត្តដល់ លោកគ្រូ អ្នកគ្រូ នាយកសាលាវិទ្យាល័យ ចំនួន ៣៣នាក់ ម្នាក់ៗ ថវិកា ១០០,០០០រៀលផងដែរ។

សូមរម្លឹកផងដែរថា កាលពីសម័យប្រឡងថ្ងៃទី ០៥-០៦ ខែធ្នូ ឆ្នាំ២០២២នេះ នៅទូទាំងខេត្តតាកែវ មានមណ្ឌលប្រឡងចំនួន ១៧មណ្ឌល ក្នុងនោះ ថ្នាក់វិទ្យាសាស្ត្រ មាន ០៥មណ្ឌល និងថ្នាក់វិទ្យាសាស្រ្តសង្គម ១២មណ្ឌល ស្មើនឹងបន្ទប់ប្រឡង ៣៨៩បន្ទប់ និងមានបេក្ខជនសរុប ៩៥៧១នាក់ និងស្រី ៥០២២នាក់ ដោយឡែកបេក្ខជន ចំណេះទូទៅសរុប ចំនួន ៨១៥៩នាក់ បេក្ខជនស្វៃរិនចំណេះទូទៅ ចំនួន ១១៦១នាក់ បេក្ខជនបំពេញវិជ្ជា ចំនួន ១៨៦នាក់ និងបេក្ខជនស្វៃបំពេញវិជ្ជា ចំនួន ៦៥នាក់។

ដោយឡែកលទ្ធផល ប្រលងសញ្ញាប័ត្រមធ្យមសិក្សាទុតិយភូមិ (បាក់ឌុប) សម័យប្រលង នៅទូទាំងខេត្តតាកែវ មាន៖សិស្សនិទ្ទេស A សរុបចំនួន ៧០នាក់ ស្រី ៣៣នាក់សិស្សនិទ្ទេស B សរុបចំនួន ៥៤២នាក់ ស្រី ៣៤២នាក់សិស្សនិទ្ទេស C សរុបចំនួន ១៤២៤នាក់ ស្រី ៨៧៥នាក់សិស្សនិទ្ទេស D សរុបចំនួន ២២២៨នាក់ ស្រី ១៣០២នាក់សិស្សនិទ្ទេស E សរុបចំនួន ២៤៦៧នាក់ ស្រី ១២៩៨នាក់៕