នាយឧត្តមសេនីយ៍ ម៉ឹង សំផន អញ្ជើញចុះពិនិត្យដោយផ្ទាល់ ស្ថានភាពទឹកជំនន់ ដែលបណ្តាលឲ្យផ្ទះពលរដ្ឋបាក់ស្រុតចូលក្នុងព្រែក នៅសង្កាត់រការខ្ពស់ ក្រុងតាខ្មៅ
នាយឧត្តមសេនីយ៍ ម៉ឹង សំផន រដ្ឋលេខាធិកាក្រសួងការពារជាតិ និងជាប្រធានក្រុមការងារជួយសង្គ្រោះ គ្រោះមហន្តរាយនៃក្រសួងការពារជាតិ នៅព្រឹកថ្ងៃអង្គារ៍ ១១រោច ខែបុស្ស ឆ្នាំខាល ចត្វាស័ក ពស២៥៦៦ ត្រូវនឹងថ្ងៃទី១៧ ខែមករា ឆ្នាំ២០២៣នេះ បានអញ្ជើញចុះពិនិត្យដោយផ្ទាល់ ស្ថានភាពទឹកជំនន់ ដែលបានបណ្តាលឲ្យផ្ទះប្រជាពលរដ្ឋបាក់ស្រុតចូលក្នុងព្រែក ស្ថិតនៅភូមិព្រែកថៅ សង្កាត់រការខ្ពស់ក្រុងតាខ្មៅ ភូមិព្រែកខ្សេវ និងភូមិព្រែកសំរោង ស្រុកស្អាង ខេត្តកណ្តាល ។
សូមបញ្ជាក់ថា គិតត្រឹមថ្ងៃទី១៧ ខែមករានេះ ផ្ទះប្រជាពលរដ្ឋបានបាត់ស្រុតទាំងស្រុង ៦ខ្នង មាន៧គ្រួសារ មនុស្ស៣១នាក់ ប៉ះពាល់ធ្ងន់ធ្ងរ៦១ខ្នង មាន៦៥គ្រួសារ មនុស្ស២៤៤នាក់។
ខណៈចុះពិនិត្យស្ថានភាពផ្ទាល់ នាយឧត្តមសេនីយ៍ ម៉ឹង សំផន បានមានប្រសាសន៍ថា រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា តែងតែយកចិត្តទុកដាក់ ចំពោះសុខទុក្ខ និងការលំបាករបស់ប្រជាពលរដ្ឋក្នុងហេតុការណ៍គ្រោះមហន្តរាយ ជាក់ស្តែងនាថ្ងៃនេះដើម្បីឆ្លើយតបនិងសភាពការណ៍ភ្លាមៗក្រសួងការពារជាតិបានបញ្ជូនកម្លាំងសរុបចំនួន៦០០នាក់ ដែលមកពីកងពលតូចដឹកជញ្ជូនលេខ៩៩ ២០០នាក់ កងពលតូចទ័ពពិសេសឆ័ត្រយោង ៩១១ ចំនួន២០០នាក់ និងបញ្ជាការដ្ឋានអង្គរក្សចំនួន២០០នាក់ សហការណ៍ជាមួយអាជ្ញាធរមូលដ្ឋាន ជួយប្រជាពលរដ្ឋក្នុងរុះរើផ្ទះសំបែង ។
ជាមួយគ្នានោះដែរ នាយឧត្តមសេនីយ៍ ម៉ឹង សំផន ក៏បាននាំយកអំណោយមនុស្សធម៍ សម្ភារៈដែលចាំបាច់មួយចំនួន និងថវិការក្នុង១គ្រួសារចំនួន ២០០០០០រៀល របស់សម្តេចតេជោ និងសម្តេចកិត្តិព្រឹទ្ធបណ្ឌិត ចែកជូនគ្រួសារប្រជាពលរដ្ឋដែលរងផលប៉ះពាល់ដោយហេតុការណ៍បាត់ស្រុតផ្ទះដោយកម្លាំងទឹកហូរ នៅព្រែកថី ក្នុងសង្កាត់រការខ្ពស់ ក្រុងតាខ្មៅ និងសង្កាត់ព្រែកសំរោង ស្រុកស្អាងខេត្តកណ្តាល ៕
