អគារមន្ទីរពិសោធន៍ថ្មី នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ ត្រូវបានសម្ពោធដាក់ឱ្យប្រើប្រាស់ជាផ្លូវការ
នាថ្ងៃទី៦ ខែមករា ឆ្នាំ២០២៣ អគារមន្ទីរពិសោធន៍ថ្មីនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ «ក.ប.ប.» នៃក្រសួងពាណិជ្ជកម្ម ត្រូវបានសម្ពោធដាក់ឱ្យប្រើប្រាស់ជាផ្លូវការ ក្រោមអធិបតីភាព ឯកឧត្ដម ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងមានការអញ្ជើញចូលរួមពី ឯកឧត្ដម លោកជំទាវ រដ្ឋលេខាធិការ អនុរដ្ឋលេខាធិការ ប្រតិភូរាជរដ្ឋាភិបាល អគ្គនាយក អគ្គាធិការ ព្រមទាំងមន្រ្តីរាជការនៃអគ្គនាយកដ្ឋាន ក.ប.ប. ជាច្រើនរូប។
ក្នុងឱកាសនោះ ឯកឧត្ដម ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. បានធ្វើរបាយការណ៍សង្ខេបជូន ឯកឧត្ដមរដ្ឋមន្រ្តី និងថ្នាក់ដឹកនាំក្រសួងពាណិជ្ជកម្ម អំពីដំណើរការនៃការសាងសង់អគារមន្ទីរពិសោធន៍ថា អគារថ្មីនេះបានបើកការដ្ឋានសាងសង់ចាប់តាំងពីថ្ងៃទី៥ ខែមិថុនា ឆ្នាំ២០២១ និងបញ្ចប់ការសាងសង់ទាំងស្រុងនៅថ្ងៃទី១៥ ខែវិច្ឆិកា ឆ្នាំ២០២២ ដែលចំណាយពេលវេលាសាងសង់ប្រមាណ ១៧ខែ (ក្នុងដំណាក់កាលដ៏លំបាកនៃការឆ្លងរាលដាលនៃជំងឺកូវីដ១៩)។
ឯកឧត្ដមប្រតិភូ បន្តថា អគារនេះមានបណ្តោយ ២៥ម៉ែត្រ ទទឹង ៨ម៉ែត្រ និងកម្ពស់ ៥ជាន់ សាងសង់នៅផ្នែកខាងកើត នៃស្នាក់ការកណ្តាល ក.ប.ប. និងមានជាន់ផ្ទាល់ដីជាចំណតសម្រាប់ចតរថយន្ត ដោយមានបំពាក់ជណ្តើរយន្តពីជាន់ផ្ទាល់ដី ដល់ជាន់ទី៥។ ជាន់ទី១ និងជាន់ទី២ មានបន្ទប់ការិយាល័យចំនួន ៧ និងបន្ទប់ទឹកចំនួន ១, ជាន់ទី៣ និងជាន់ទី៤ ពុំទាន់រៀបចំខណ្ឌជាបន្ទប់នៅឡើយ (ទីធ្លាវាល) ដែលក្នុងគម្រោងសម្រាប់ អនាគតនឹងត្រូវរៀបចំជាមន្ទីរពិសោធន៍វិភាគមីក្រូជីវសាស្ត្រ សម្រាប់ជាន់ទី៣ និងអាចរៀបចំជាមន្ទីរវិភាគគីមីសាស្ត្រម្ហូបអាហារ សម្រាប់ជាន់ទី៤។ អគារមន្ទីរពិសោធន៍នេះ ក៏បានបំពាក់ផងដែរនូវសម្ភារៈពិសោធន៍មួយចំនួន និងបានរៀបចំការិយាល័យ មានតុ កៅអី កុំព្យូរទ័រ ម៉ាស៊ីព្រីន ម៉ាស៊ីកូពី និងសម្ភារៈការិយាល័យផ្សេងៗ សម្រាប់មន្ត្រីមន្ទីរពិសោធន៍ បំពេញការងារប្រចាំថ្ងៃ។
ថ្លែងក្នុងពិធីដ៏មានអត្ថន័យនេះ ឯកឧត្ដមរដ្ឋមន្រ្តី បានធ្វើការកោតសរសើរចំពោះថ្នាក់ដឹកនាំ និងមន្រ្តីគ្រប់លំដាប់ថ្នាក់នៃក្រសួងពាណិជ្ជកម្ម ពិសេសក្រុមការងារសាងសង់ ដែលបានខិតខំប្រឹងប្រែងរៀបចំគម្រោង និងដំណើរការសាងសង់ រហូតសម្រេចបានអគារមន្ទីរពិសោធន៍ដ៏ស្រស់ស្អាតនេះ ដែលនេះគឺជាសមិទ្ធផលថ្មីមួយទៀតរបស់ក្រសួងពាណិជ្ជកម្ម ពិសេសអគ្គនាយកដ្ឋាន ក.ប.ប. ទទួលបាននាដើមឆ្នាំ២០២៣ នេះ។
ឯកឧត្ដមរដ្ឋមន្រ្តី បន្តថា ដើម្បីអនុវត្តបានដោយជោគជ័យ នូវគោលដៅយុទ្ធសាស្ត្ររបស់រាជរដ្ឋាភិបាល ចាំបាច់យើងត្រូវ មាន និងបន្តអភិវឌ្ឍនូវកត្តា៣ សំខាន់គឺ៖ រចនាសម្ព័ន្ធរឹង រចនាសម្ព័ន្ធទន់ និងធនធានមនុស្ស។ ពាក់ព័ន្ធនឹងរចនាសម្ព័ន្ធរឹង ឯកឧត្ដមរដ្ឋមន្រ្តី បញ្ជាក់ថា ក្រសួងពាណិជ្ជកម្មបានយកចិត្តទុកដាក់និងប្រឹងប្រែងធ្វើការអភិវឌ្ឍតាមរយៈការកសាងបាននូវអគាររដ្ឋបាលនិងមន្ទីរពិសោធន៍នៅថ្នាក់កណ្តាល និងអគាររដ្ឋបាលនិងមន្ទីរពិសោធន៍ខ្នាតតូចនៅតាមបណ្តាខេត្ត ដែលរហូតមកដល់បច្ចុប្បន្ននេះ ខេត្តចំនួន១៦ មានអគារដែលទើបសាងសង់ថ្មីសម្រាប់បំពេញការងាររួចហើយ។ ក្រៅពីនេះ យើងនៅបំពាក់រថយន្តពិសោធន៍ចល័តផ្នែកប្រេងឥន្ធនៈនិងម្ហូបអាហារចំនួន៩គ្រឿង និងឧបករណ៍សម្រាប់បម្រើឱ្យការងារត្រួតពិនិត្យនិងវិភាគក្នុងមន្ទីរពិសោធន៍ មួយចំនួនទៀត។
ពាក់ព័ន្ធនឹងរចនាសម្ព័ន្ធទន់ ឯកឧត្ដមរដ្ឋមន្រ្តី បន្ថែមថា ក្រសួងពាណិជ្ជកម្ម ពិសេសអគ្គនាយកដ្ឋាន ក.ប.ប. បានកសាងនូវបទប្បញ្ញត្តិជាច្រើន ក្នុងនោះមានច្បាប់ចំនួន៤ (ច្បាប់ស្តីពីការគ្រប់គ្រងគុណភាព សុវត្ថិភាពលើផលិតផលទំនិញនិងសេវា, ច្បាប់ស្តីពីកិច្ចការពារអ្នកប្រើប្រាស់, ច្បាប់ស្តីពីការប្រកួតប្រជែង និងច្បាប់ស្តីពី សុវត្ថិភាពម្ហូបអាហារ)។ ក្រៅពីនេះ នៅបានកសាងឯកសារគតិយុត្ត ដូចជាអនុក្រឹត្យ សេចក្តីសម្រេច ប្រកាសអន្តរក្រសួង ប្រកាស គោលការណ៍ណែនាំ និងនីតិវិធីប្រតិបត្តិស្តង់ដារ ជាច្រើនទៀត ដែលនេះ គឺជា មូលដ្ឋានគ្រឹះដ៏មានតម្លៃបំផុត សម្រាប់មន្រ្តីយកទៅអនុវត្តក្នុងបេសកកម្មការពារផលប្រយោជន៍អ្នកប្រើប្រាស់ និងជម្រុញការពារធុរកិច្ចឱ្យមានការប្រកួតប្រជែងដោយយុត្តិធម៌។
ចំពោះធនធានមនុស្សវិញ ឯកឧត្ដមរដ្ឋមន្រ្តី បានគូសបញ្ជាក់ថា ក្រសួងពាណិជ្ជកម្មបានផ្តល់ការយកចិត្តទុកដាក់បំពាក់បំប៉នជំនាញបច្ចេកទេស ដល់មន្រ្តីរាជការគ្រប់លំដាប់ថ្នាក់ តាមរយៈការបញ្ជូនទៅចូលរួមបណ្តុះបណ្តាលនៅក្នុងនិងក្រៅ ការរៀបចំវគ្គ បណ្តុះបណ្តាលជំនាញ និងសិក្ខាសាលាផ្ទៃក្នុងអង្គភាព និងអន្តរស្ថាប័នជាដើម ៕
