ភ្នំពេញ៖ ជនសង្ស័យមួយក្រុម ខឹងប្រើឲ្យក្មេងៗ ៣នាក់ឲ្យទៅទិញគ្រឿងញៀនឲ្យខ្លួន ប៉ុន្តែត្រូវក្មេងៗទាំង៣បដិសេធ ក៏បានដកកាំភ្លើងបាញ់ដីដើម្បីគំរាម ប៉ុន្តែប្លាតដី ខ្ទាតត្រូវមនុស្ស ៦នាក់ ក្នុងនោះត្រូវក្មេងតូចអាយុជាង ១ខួបផងដែរ បណ្តាលឲ្យរងរបួសធ្ងន់ស្រាល។
ហេតុការណ៍នេះបានកើតឡើងកាលពីវេលាម៉ោងជាង ៩៖៣០នាទីយប់ ថ្ងៃទី៣ ខែមករា ឆ្នាំ២០២៣ស្ថិតនៅ ភូមិអណ្តូង៣ សង្កាត់គោករកា ខណ្ឌព្រែកព្នៅ រាជធានីភ្នំពេញ។
ប្រភពព័ត៌មានពីប្រជាពលរដ្ឋបានឲ្យដឹងថា មុនពេលកើតហេតុ ក្មេងៗមួយក្រុមកំពុងអង្គុយលេងជុំគ្នា ស្រាប់តែមានជនសង្ស័យមួយក្រុមដើរមកជិត រួចប្រើឲ្យទៅទិញគ្រឿងញៀនឲ្យពួកគេ ប៉ុន្តែត្រូវក្មេងៗបដិសេធ ស្រាប់តែក្រុមជនសង្ស័យខឹងបង្កជាជម្លោះ រហូតដកកាំភ្លើងបាញ់ភ្ជុចដី ក៏ផ្លាតត្រូវក្មេងៗ រួមជាមួយអ្នកនៅក្បែរនោះរបួសធ្ងន់៣នាក់ ស្រាល ៣នាក់។
ក្រុមជនរងគ្រោះរបួសធ្ងន់ទាំង ៣នាក់រួមមាន ១ឈ្មោះ សុខ ទិត្យ ភេទប្រុស អាយុ១៨ឆ្នាំ ទី២ឈ្មោះ ចៅ ម៉េងហេង ភេទប្រុស អាយុ ១៨ឆ្នាំ មុខរបរនៅផ្ទះ រងរបួសភ្លៅ និងទី៣ឈ្មោះថុល គីមលី អាយុ១៤ឆ្នាំ មុខរបរ លាងរថយន្ត រងរបួសជង្គង់ បៀមជាប់គ្រាប់កាំភ្លើង ។
បើតាមសម្តីជនរងគ្រោះបានឲ្យដឹង កន្លងមកក្រុមជនសង្ស័យក៏ធ្លាប់បានដកកាំភ្លើងភ្ជង់គេម្តងរួចមកហើយ ដែលបង្កការភិតភ័យដល់ប្រជាពលរដ្ឋជាខ្លាំង។
ក្រោយកើតហេតុសមត្ថកិច្ចបានឃាត់ខ្លួនជនសង្ស័យដែលជាខ្មាន់កាំភ្លើងបានម្នាក់ និងជនរងគ្រោះ ៣នាក់ដើម្បីធ្វើការសួរនាំ ហើយក៏មានវត្តមានក្រុមគ្រួសារនិងអាណាព្យាបាលជនរងគ្រោះជាច្រើន មកទាមទារយុត្តិធម៌នៅប៉ុស្តិ៍នគរបាលផងដែរ៕
