លោក Wang Yi ថ្លែងអំពីកិច្ចជំនួបរវាងប្រមុខរដ្ឋចិននិងអាមេរិកទៅកាន់ប្រព័ន្ធសារព័ត៌មាន ព្រមទាំងឆ្លើយសំណួរពាក់ព័ន្ធ

ថ្ងៃទី ១៤ ខែវិច្ឆិកា លោក Xi Jinping ប្រធានរដ្ឋចិនបានជួបសន្ទនាជាមួយលោកបៃដិនប្រធានាធិបតីអាមេរិកនៅកោះបាលីប្រទេសឥណ្ឌូណេស៊ី។ បន្ទាប់ពីកិច្ចជំនួប លោក Wang Yi សមាជិកក្រុមប្រឹក្សាកិច្ចការរដ្ឋនិងជារដ្ឋមន្ត្រីការបរទេសចិនបានថ្លែងអំពីកិច្ចជំនួបនេះទៅកាន់ប្រព័ន្ធសារព័ត៌មាន ព្រមទាំងឆ្លើយសំណួរពាក់ព័ន្ធ។
លោក Wang Yi បានថ្លែងថា កិច្ចជំនួបប្រមុខរដ្ឋលើកនេះមិនត្រឹមតែប្រកបដោយអត្ថន័យណែនាំជាក់ស្តែងនោះទេ ថែមទាំងក៏នឹងមានឥទ្ធិផលយ៉ាងសំខាន់និងវែងឆ្ងាយចំពោះទំនាក់ទំនងចិននិងអាមេរិកក្នុងដំណាក់កាលក្រោយរហូតដល់រយៈពេលកាន់តែយូរផងដែរ។
ទីមួយគឺបានកំណត់នូវទិសដៅមួយ ពោលគឺត្រូវបង្ការកុំឱ្យទំនាក់ទំនងចិននិងអាមេរិកដើរ ខុសគន្លងនិងបាត់បង់ការគ្រប់គ្រង រកឱ្យឃើញវិធីសាស្រ្តរួមរស់នៅដ៏ត្រឹមត្រូវរវាងប្រទេសធំទាំងពីរ។ ទីពីរគឺបានកំណត់ក្របខណ្ឌមួយ ពោលគឺត្រូវរួមគ្នាពិគ្រោះពិភាក្សាដើម្បីកំណត់គោលការណ៍ណែនាំ ទំនាក់ទំនងចិននិងអាមេរិក ឬមួយក៏អាចនិយាយថាក្របខណ្ឌយុទ្ធសាស្ត្រ។ ទីបីចាប់ដំណើរការនូវដំណើរមួយ គឺត្រូវអនុវត្តជាក់ស្តែងនូវគំនិតឯកភាពរួមរបស់ប្រមុខរដ្ឋនៃប្រទេសទាំងពីរ គ្រប់គ្រងនិងលំនឹងឱ្យបានល្អនូវទំនាក់ទំងងចិននិងអាមេរិក។
គួររំលឹកថា ភាគីចិនមានគោលការណ៍និងខ្សែបន្ទាត់ក្រហមដែលខ្លួនបានប្រកាន់ខ្ជាប់តាំងពីដើមមក ចាំបាច់ត្រូវគាំពារយ៉ាងមុតមាំនូវសិទ្ធិនិងផលប្រយោជន៍ស្របច្បាប់និងត្រឹមត្រូវ មិនចុះញ៉មចំពោះអំពើអនុវត្តរភាពនិងការជិះជាន់ណាមួយនោះទេ។ ភាគីអាមេរិកត្រូវអនុវត្តតាមការសម្តែងឥរិយាបថជាវិជ្ជមានរបស់លោកប្រធានាធិបតីបៃដិនតាមរយៈការដាក់ចេញគោលនយោបាយនិងប្រតិបត្តិការជាក់ស្តែង បញ្ឈប់ការទប់ស្កាត់និងរារាំងលើប្រទេសចិន បញ្ឈប់ការជ្រៀតជ្រែកកិច្ចការផ្ទៃក្នុងរបស់ចិន បញ្ឈប់ការបំផ្លាញអធិបតេយ្យភាព សន្តិសុខ ការអភិវឌ្ឍនិងផលប្រយោជន៍របស់ចិន ហើយងាកមកដើរស្របតាមទិសដៅរួមជាមួយចិនដើម្បីពង្រឹងគ្រឹះមូលដ្ឋានដ៏រឹងមាំនៃទំនាក់ទំនងចិននិងអាមេរិកឱ្យអភិវឌ្ឍប្រកបដោយស្ថិរភាពនិងយូរអង្វែង៕