ឯកឧត្ដម គង់ ភោគ៖ ទោះបីគ្មានមីយ៉ាន់ម៉ា ក្នុងកិច្ចប្រជុំកំពូលអាស៊ាន ក៏មិនប៉ះពាល់ដល់កុងសង់សុីសដែរ
ភ្នំពេញ៖ ឯកឧត្ដមបណ្ឌិត គង់ ភោគ អ្នកនាំពាក្យផ្លូវការ នៃកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ ឆ្នាំ២០២២នេះ បានលើកឡើងថា ទោះបីគ្មានមីយ៉ាន់ម៉ា នៅក្នុងកិច្ចប្រជុំកំពូលអាស៊ាន ក៏មិនប៉ះពាល់ដល់គោលការណ៍កុងសង់សុីសដែរ។
ពេលធ្វើសន្និសីទសារព័ត៌មានប្រចាំថ្ងៃ នាល្ងាចថ្ងៃទី១០ ខែវិច្ឆិកា ឆ្នាំ២០២២នេះ ឯកឧត្ដមបណ្ឌិត គង់ ភោគ បានពន្យល់ថា មិនប៉ះពាល់គោលការណ៍កុងសង់ស៉ី ទោះគ្មានវត្តមានមីយ៉ាន់ម៉ា ដោយសារអាស៊ានបានអញ្ជើញតំណាងមិនមែនកម្រិតនយោបាយ មកចូលរួមប្រជុំ តែមីយ៉ាន់ម៉ាខ្លួនឯងជាអ្នកពហិការ។
ឯកឧត្ដមបន្តថា ការអញ្ជើញកម្រិតមិនមែននយោបាយ ដោយសារប្រទេសសមាជិកអាស៊ាន យល់ឃើញថា វឌ្ឍនភាពនៃការអនុវត្តកិច្ចព្រមព្រៀង ៥ចំណុច របស់មីយ៉ាន់ម៉ា នៅមានកម្រិតតិចតួច។
ឯកឧត្ដម គង់ ភោគ បានបញ្ជាក់យ៉ាងដូច្នេះថា ពាក់ព័ន្ធនឹងបញ្ហាតំណាងមិនមែនមីយ៉ាន់ម៉ា ដោយសារតែមិនមើលឃើញពីការរីកចម្រើនទៅដល់កម្រិត ដែលធ្វើឲ្យប្រទេសសមាជិកផ្សេងទៀត គាត់មានអារម្មណ៍ថា តំណាងនយោបាយគួរតែចូល យើងបន្តអញ្ជើញតំណាងមិនមែននយោបាយពីមីយ៉ាន់ម៉ា។ ដោយសារតែយើងអញ្ជើញកម្រិតមិនមែននយោបាយ គាត់ក៏សម្រេចចិត្តមិនបញ្ជូននរណា មកចូលរួមក្នុងកិច្ចប្រជុំនេះដែរ៕
