ឯកឧត្ដម គង់ ភោគ អ្នកនាំពាក្យថា អេស្ប៉ាញ​យឺតយ៉ាវក្នុងការរៀបចំឯកសារផ្ទៃក្នុង ទើបមិនបានចុះហត្ថលេខាចូលជាសមាជិក TAC នៅពេលនេះ

ភ្នំពេញ៖ ប្រទេសអេស្ប៉ាញ មិនទាន់បានចុះហត្ថលេខា ចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៉ីអាគ្នេយ៍ [TAC] នៅឡើយទេ នៅថ្ងៃទី១០ ខែវិច្ឆិកា ឆ្នាំ២០២២នេះ។ នេះបើតាមការបញ្ជាក់របស់ ឯកឧត្ដម គង់ ភោគ អ្នកនាំពាក្យកិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ នៅល្ងាចថ្ងៃទី១០ ខែវិច្ឆិកា ឆ្នាំ២០២២។

ឯកឧត្ដម គង់ ភោគ បញ្ជាក់ថា ពាក់ព័ន្ធនឹងការសម្រេចរបស់អាស៊ាន ដើម្បីឱ្យអេស្ប៉ាញ ក្លាយជា High contracting parties ទៅនឹង សន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៉ីអាគ្នេយ៍ [TAC] ខាងអាស៊ាន គឺយើងបានរួចរាល់ ប៉ុន្តែខាងអេស្ប៉ាញមានភាពយឺតយ៉ាវ។

ឯកឧត្ដមបញ្ជាក់ដូច្នេះថា៖ [ប៉ុន្តែដោយសារខាងអេស្ប៉ាញ មានដំណើរការផ្ទៃក្នុងមួយចំនួនដែលត្រូវបំពេញបន្ថែម ដូច្នេះមានភាពយឺតយ៉ាវ ដែលថ្ងៃនេះ យើងឃើញមានតែអ៊ុយក្រែនទេ ដែលបានចុះហត្ថលេខា]។

ឯកឧត្ដមសង្ឃឹមថា នៅថ្ងៃខាងមុខនេះ អេស្ប៉ាញនឹងអាចចូលរួមជាមួយអាស៊ាន ក្នុងការក្លាយខ្លួនជា សមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៉ីអាគ្នេយ៍ [TAC]។

នាថ្ងៃទី១០ ខែវិចិ្ឆកា ឆ្នាំ២០២២ រដ្ឋមន្រ្តីការបរទេស និងអគ្គលេខាធិការអាស៊ាន បានអញ្ជើញធ្វើជាសាក្សី ការចុះហត្ថលេខាលើលិខិតុបករណ៍ នៃការចូលជាសមាជិកនៃសន្ធិសញ្ញាមិត្តភាព និងកិច្ចសហប្រតិបត្តិការនៅក្នុងតំបន់អាស៉ីអាគ្នេយ៍ [TAC] ដោយប្រទេសអ៊ុយក្រែន និងអេស្ប៉ាញ។

[TAC] គឺជាសន្ធិសញ្ញាសន្តិភាពដែលបានចុះហត្ថលេខាក្នុងឆ្នាំ១៩៧៦ រវាងបណ្ដាប្រទេសជាសមាជិកអាស៊ាន សំដៅបង្កើតក្រមប្រតិបត្តិស្តីពីទំនាក់ទំនងរវាងបណ្ដាប្រទេសក្នុងតំបន់ ជំរុញសន្តិភាព ទំនាក់ទំនងមិត្តភាព និងកិច្ចសហប្រតិបត្តិការជាអចិន្ត្រៃយ៍ដោយឈរលើមូលដ្ឋាននៃការគោរពគ្នាទៅវិញទៅមក គោលការណ៍មិនជ្រៀតជ្រែក និងដោះស្រាយជម្លោះដោយសន្តិវិធី។

សូមបញ្ជាក់ថា សមាជិកសន្ធិសញ្ញានេះមានចំនួន ៥០ប្រទេសហើយ ដោយបូកទាំងអ៊ុយក្រែន ដែលបានចុះហត្ថលេខា នៅថ្ងៃទី១០ ខែវិច្ឆិកា ឆ្នាំ២០២២។

សូមបញ្ជាក់ថា នាកិច្ចប្រជុំរដ្ឋមន្ត្រីការបរទេសអាស៊ាន លើកទី៥៥ និងកិច្ចប្រជុំពាក់ព័ន្ធ កន្លងទៅ កម្ពុជា.ដាណឺម៉ាក. សាធារណរដ្ឋក្រិក. ព្រះរាជាណាចក្រហូឡង់.ប្រទេសអូម៉ង់. រដ្ឋកាតា និងអារ៉ាប់រួមអេមីរ៉ាត់ ក៏ក្លាយជាសមាជិក [TAC] ផងដែរ។។