រដ្ឋមន្រ្តីបរិស្ថាន អនុញ្ញាតជូនលោកជំទាវ ពេជ្រ ចន្ទមុន្នី អគ្គស្នងការនៃសមាគមកាយឬទ្ធិនារីកម្ពុជា និងសហការី ជួបសំណេះសំណាល និងពិភាក្សាការងារ
ភ្នំពេញ៖ ឯកឧត្តម សាយ សំអាល់ រដ្ឋមន្រ្តីក្រសួងបរិស្ថាន នៅថ្ងៃទី១៩ ខែតុលា ឆ្នាំ២០២២ បានអនុញ្ញាតជូនលោកជំទាវ ពេជ្រ ចន្ទមុន្នី អគ្គស្នងការនៃសមាគមកាយឬទ្ធិនារីកម្ពុជា និងសហការី ទទួលជួបសំណេះសំណាលនិងពិភាក្សាការងារ នៅទីស្តីការក្រសួងបរិស្ថាន។
នៅក្នុងជំនួបខាងលើលោកជំទាវ ពេជ្រ ចន្ទមុន្នី បានលើកឡើងអំពីគំនិតផ្តួចផ្តើមជំរុញសកម្មភាពកាយឬទ្ធិនារីកម្ពុជា ដោយក្នុងនោះមានសកម្មភាពបណ្តុះស្មារតីយុវនារី និងក្មេងតូចៗឱ្យចេះស្រឡាញ់ និងចូលរួមចំណែកលើកកម្ពស់ការយល់ដឹងអំពីបរិស្ថាន តាមរយៈការចូលរួមដាំកូនឈើការដាំស្តារព្រៃ ការទុកដាក់សំរាម និងការដើរកំសាន្តតាមព្រៃក្នុងតំបន់ការពារធម្មជាតិ ដើម្បីពង្រឹងកាយសម្បទា ក៏ដូចជាលើកកម្ពស់ជីវភាពប្រជាជនមូលដ្ឋាន។
ឆ្លៀតក្នុងឱកាសនោះ ឯកឧត្តម សាយ សំអាល់ បានថ្លែងស្វាគមន៍សមាគមកាយឬទ្ធិនារីកម្ពុជា មកកាន់អគារមរតកតេជោ ទីស្តីការក្រសួងបរិស្ថាន ជាពិសេសក្រសួងនឹងគាំទ្រលើសំណើសុំសហការខាងលើ ដែលជាសកម្មភាពនឹងបណ្តុះស្មារតី និងភាពជាគំរូដល់យុវជន យុវនារី ឱ្យបន្តការចូលរួមចំណែកលើកកម្ពស់ការអប់រំផ្សព្វផ្សាយបរិស្ថានទៅកាន់ស្រទាប់យុវជន ការបញ្រ្ជាប់ការយល់ដឹងអំពីកិច្ចគាំពារបរិស្ថាន ការអភិរក្សជីវចម្រុះ និងការគ្រប់គ្រងធនធានធម្មជាតិប្រកបដោយចីរភាពផងដែរ៕
