សម្ដេច ស ខេង៖ ការអប់រំបណ្ដុះបណ្ដាល បង្កើនចំណេះដឹង និងពង្រឹងសមត្ថភាព ត្រូវធ្វើប្រកបដោយនិរន្តរភាព ដើម្បីឱ្យនគរបាល មានចំណេះដឹង ជំនាញបទពិសោធន៍គ្រប់គ្រាន់ និងមានក្រមសីលធម៌វិជ្ជាជីវៈ

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា ការអប់រំបណ្ដុះបណ្ដាល ដើម្បីបង្កើនចំណេះដឹង និងពង្រឹងសមត្ថភាព គឺជាការងារដែលត្រូវធ្វើប្រកបដោយនិរន្តរភាព ដើម្បីធ្វើឱ្យកងកម្លាំងនគរបាលជាតិ និងមន្រ្តីពន្ធនាគារ មានចំណេះដឹង ជំនាញបទពិសោធន៍គ្រប់គ្រាន់ និងមានក្រមសីលធម៌វិជ្ជាជីវៈ ក្នុងការបំពេញភារកិច្ចទទួលខុសត្រូវ ឆ្លើយតបទៅនឹងតម្រូវការនៃអង្គភាពប្រើប្រាស់កងកម្លាំង ផែនការអភិវឌ្ឍធនធានមនុស្សរបស់ក្រសួងមហាផ្ទៃ និងគោលនយោបាយរបស់រាជរដ្ឋាភិបាល។

ក្នុងឱកាសអញ្ជើញ សម្ពោធដាក់ឱ្យប្រើប្រាស់ជាផ្លូវការ នូវអគារទំនើបហ្វឹកហាត់បាញ់គ្រាប់ពិតអាវុធខ្លី និងជួបសំណេះសំណាលជាមួយថ្នាក់ដឹកនាំ គ្រូនគរបាលជាតិ និងមន្ដ្រី នៃបណ្ឌិត្យសភានគរបាលកម្ពុជា នាថ្ងៃទី១៩ តុលា សម្ដេចក្រឡាហោម ស ខេង បានកោតសរសើរដល់ថ្នាក់ដឹកនាំ និងមន្ត្រី លោកគ្រូ-អ្នកគ្រូ ជានគរបាលជាតិគ្រប់ផ្នែកទាំងអស់ នៃបណ្ឌិត្យសភានគរបាលកម្ពុជា ដែលបានបំពេញការងារលើកកម្ពស់គុណភាពអប់រំ និងបណ្តុះបណ្តាលសិស្ស និស្សិត សិក្ខាកាម ជាមន្ត្រីនគរបាល និងមន្ត្រីពន្ធនាគារ និងចូលរួមត្រេកអរជាមួយបណ្ឌិត្យសភានគរបាលកម្ពុជា ដែលសម្រេចបានក្នុងការអភិវឌ្ឍហេដ្ឋារចនាសម្ព័ន្ធរឹងស្របតាមផែនការយុទ្ធសាស្រ្ត របស់ខ្លួន នៅពេលប្រទេសកម្ពុជាក៏ដូចជាពិភពលោក ជួបនូវវិបត្តិជំងឺកូវីដ-១៩ និងវិបត្តិសេដ្ឋកិច្ចសកល។

ឆ្លៀតឱកាសនោះដែរ សម្ដេចក្រឡាហោម ស ខេង បានឱ្យដឹងថា ក្នុងរយៈពេលដែលសម្តេចចុះពិនិត្យផ្ទាល់ តាមសាលានគរបាលទាំងអស់ឃើញថា កំពុងមានការអភិវឌ្ឍន៍គួរឱ្យកត់សម្គាល់តាមរយៈការសិក្សារៀនសូត្រ និងការកសាងហេដ្ឋារចនាសម្ព័ន្ធ ដូចជា៖ អាគារសិក្សា អាគារស្នាក់នៅ ផ្លូវជាដើម ដែលជាឧបត្ថម្ភរបស់អភិបាលរាជធានីខេត្តដែលពាក់ព័ន្ធ ហើយនេះអាចចាត់ទុកថាជាការរួមចំណែកដ៏សំខាន់ និងជាឧត្តមប្រយោជន៍ជាតិ ជួយសម្រាលបន្ទុករបស់រដ្ឋ ក្នុងដំណាក់កាលដែលប្រទេសទើបឆ្លងផុតពីវិបត្តិកូវីដ១៩ ។

ជាមួយគ្នានេះ សម្តេចក្រឡាហោម បានអរគុណដល់សប្បុរសជនទាំងអស់ដែលចូលរួមចំណែកក្នុងបុព្វហេតជាតិ និងសូមអរគុណចំពោះកិច្ចខិតខំប្រឹងប្រែងបំពេញការងារប្រកបដោយស្មារតីទទួលខុសត្រូវខ្ពស់ដល់ការបណ្តុះបណ្តាលគ្រប់កម្រិត សាស្ត្រចារ្យ គ្រូនគរបាល និងមន្ត្រីពាក់ព័ន្ធក្នុងបណ្ឌិតសភា ព្រមទាំងផ្តល់ការឧបត្ថម្ភផ្នែកទន់ និងរឹងដើម្បីឱ្យបណ្ឌិតសភា ក្លាយជាគ្រឹះស្ថានបណ្តុះបណ្តាលកងកម្លាំងនគរបាលមានលក្ខណៈសម្បត្តិតាមស្តងដារជាតិ និងអន្តរជាតិ៕