ពលរដ្ឋក្រីក្រ គ្រួសារអតីតយុទ្ធជន ដែលរងផលប៉ះពាល់ដោយគ្រោះទឹកជំនន់ នៅស្រុកស្ទោង បានទទួលអំណោយ របស់ឧត្ដមសេនីយ៍ឯង ហ៊ុន ម៉ាណែត និងលោកជំទាវ
ភ្នំពេញ៖ ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំ ប្រធានសមាគមអតីតយុទ្ធជនកម្ពុជាខេត្តកំពង់ធំ នាថ្ងៃទី៩ ខែតុលា ឆ្នាំ២០២២ បានដឹកនាំសហការីរួមជាមួយអជ្ញាធរដែនដី នាំយកអំណោយរបស់ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការកងទ័ពជើងគោកនិងលោកជំទាវ ពេជ ចន្ទមុន្នី ទៅឧបត្ថម្ភជូនប្រជាពលរដ្ឋក្រីក្រ និងក្រុមគ្រួសារអតីតយុទ្ធជន ចំនួន ២០គ្រួសារ នៅភូមិឈើទាល និងភូមិស្រោមដៃក ដែលពិធីនេះប្រព្រឹត្តទៅនៅវត្តបន្ទាយស្ទោង ឃុំបន្ទាយស្ទោង ស្រុកស្ទោង ខេត្តកំពង់ធំ ។
ឧត្តមសេនីយ៍ទោ សោម ស៊ុន បានពាំនាំនូវការផ្ដាំផ្ញើសាកសួរសុខទុក្ខ ពីសំណាក់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានិងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលជានិច្ចកាលសម្ដេចតែងតែយកចិត្តទុកដាក់គ្រប់បែបយ៉ាងពីសុខទុក្ខនិងជីវភាពរស់នៅរបស់ប្រជាពលរដ្ឋនិងបងប្អូនអតីតយុទ្ធជន ពិសេសក្នុងកាលៈទេសៈដែលភូមិឃុំយើងកំពុងរកផលប៉ះពាល់ដោយជំនន់ទឹកភ្លៀងធ្វើឲ្យខូចខាតផលដំណាំ និងលិចលង់ផ្ទះសម្បែងមួយចំនួន។
ឧត្តមសេនីយ៍ទោ សោម ស៊ុន បានណែនាំដល់បងប្អូនប្រជាពលរដ្ឋនិងក្រុមគ្រួសារអតីតយុទ្ធជន ត្រូវខិតខំថែរក្សាសុខភាពឱ្យបានល្អ ដោយត្រូវហូបស្អាត រស់នៅស្អាត បង្ការជំងឺដង្កាត់ផ្សេងៗ នឹងត្រូវយកចិត្តទុកដាក់បង្កបង្កើតផលពិសេសដំណាំស្រូវ ក្នុងពេលរដូវទឹកសម្រកខាងមុខនេះ ។
ឧត្តមសេនីយ៍ទោ សោម ស៊ុន បានជម្រាបជូនថា អំណោយដែលបានឧបត្ថម្ភជូនប្រជាពលរដ្ឋក្រីក្រ និងក្រុមគ្រួសារអតីតយុទ្ធជន ដែលមានជីវភាពខ្វះខាត និងរងផលប៉ះពាល់ដោយគ្រោះធម្មជាតិជំនន់ទឹកភ្លៀងនៅពេលនេះ គឺជាអំណោយរបស់ឯកឧត្តម ហ៊ុន ម៉ាណែត និងលោកជំទាវ ពេជ ចន្ទមុន្នី ដោយក្នុងមួយគ្រួសារទទួលបាននូវអង្ករ គ្រឿងឧបភោគបរិភោគជាច្រើនទៀត ៕
