នាយឧត្តមសេនីយ៍ ណឹម សុវត្ថិ អញ្ជើញបើកសិក្ខាសាលាប្រវត្តិសាស្រ្តយោធា អនុវត្តនយោបាយឈ្នះឈ្នះ និងសមិទ្ធផល ទិសយោធភូមិភាគទី៥
ភ្នំពេញ៖ ឯកឧត្ដម នាយឧត្តមសេនីយ៍ ណឹម សុវត្ថិ ទីប្រឹក្សាពិសេសសម្តេចពិជ័យសេនា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ អគ្គនាយក អគ្គនាយកដ្ឋាននយោបាយ និងកិច្ចការបរទេស និងជា ប្រធានក្រុមការងារសិក្សាស្រាវជ្រាវ និងសាងសង់ វិមានឈ្នះ ឈ្នះ នាថ្ងៃទី៥ ខែតុលា ឆ្នាំ២០២២ បានអញ្ជើញជាអធិបតីក្នុងអង្គសិក្ខាសាលាប្រវត្តិសាស្រ្តយោធា អនុវត្តនយោបាយឈ្នះឈ្នះ និងសមិទ្ធផល ទិសយោធភូមិភាគទី៥ ក្រោមប្រធានបទ “ចូលរួមចែករំលែក ដើម្បីសន្តិភាព និងសុខដុមភាព”ត្រូវបានបិទបញ្ជប់ ។
ឯកឧត្តម នាយឧត្តមសេនីយ៍ ណឹម សុវត្ថិ បានមានប្រសាសន៍ថា ការរៀបចំអង្គសិក្ខាសាលានេះឡើងដើម្បីបូកសរុបវាយតម្លៃពីការសិក្សាស្រាវជ្រាវ និងការរៀបចំចងក្រងឯកសារជាប្រវត្តិសាស្ត្រ ការកសាងស្តូបអនុស្សាវរីយ៍ឈ្នះ ឈ្នះ និងការរៀបចំតំបន់ប្រវត្តិសាស្ត្រយោធា ប្រកបដោយតម្លៃដ៏មហាសាលដែលកងយោធពលខេមរភូមិន្ទ ជាប្រតិបត្តិករស្នូលនៃនយោបាយឈ្នះ ឈ្នះ តាមរយៈកិច្ចខិតខំប្រឹងប្រែងអស់កម្លាំងកាយចិត្ត ប្រាជ្ញាស្មារតី ពុះពារគ្រប់ឧបសគ្គប្រកបដោយឆន្ទៈ មនសិការស្នេហាជាតិ និងគំរូវីរភាពខ្លាំងក្លាក្នុងបុព្វហេតុស្នេហាជាតិ រំដោះមាតុភូមិ ប្រជាជន ពីរបបប្រល័យពូជសាសន៍។
ឯកឧត្តម បន្តថា និងបង្ហាញនូវកិច្ចដំណើរការអនុវត្តនយោបាយឈ្នះ ឈ្នះ ដែលនាំមកនូវសន្តិភាពពេញលេញ ការបង្រួបបង្រួមជាតិ និងឯកភាពទឹកដីប្រកបដោយសុខសន្តិភាព និងការអភិវឌ្ឍរីកចម្រើន។
តាមរយៈសិក្ខាសាលាប្រវត្តិសាស្ត្រយោធានៅទិសយោធភូមិភាគទី៥ នេះដែរ សមាជិកអង្គសិក្ខាសាលាទាំងអស់ក៏បានតាមដានស្តាប់នូវបទបង្ហាញស្តីពី សមិទ្ធផល ជាមរតកនៃនយោបាយឈ្នះ ឈ្នះ សមិទ្ធផលរយៈពេល ៤០ឆ្នាំ របស់ទិសយោធភូមិភាគទី៥ និង ការអភិវឌ្ឍមូលដ្ឋានក្រោមឆ័ត្រសន្តិភាព តាមរយៈនយោបាយឈ្នះ ឈ្នះ ដែលដឹកនាំដោយ សម្តេចអគ្គមហាសេនាបតីតេជោ ហ៊ុន សែន៕
