ប៉ារីស៖ថ្ងៃទី ២១ ខែកញ្ញា – អ្នករៀបចំទីក្រុងប៉ារីសឆ្នាំ ២០២៤ បានប្រកាសព័ត៌មានលម្អិតនៃដំណាក់កាលទី ១ នៃការលក់សំបុត្រជាផ្លូវការសម្រាប់ការប្រកួតកីឡាអូឡាំពិករដូវក្តៅពីរឆ្នាំក្រោយ ខណៈដែលការចុះឈ្មោះចាប់ផ្តើមនៅក្នុងខែធ្នូ។
អ្នករៀបចំបានអោយដឹងកាលពីថ្ងៃអង្គារថាមានតែកញ្ចប់ “សំបុត្រច្រើន” ប៉ុណ្ណោះនឹងត្រូវបានផ្តល់ជូនក្នុងអំឡុងពេលដំណាក់កាលនេះ។ កញ្ចប់មួយមានវគ្គប្រកួតប្រជែងចំនួនបី ដែលមានន័យថាអ្នកគាំទ្រទាំងនេះអាចប្ដូរបទពិសោធន៍អូឡាំពិកផ្ទាល់ខ្លួនរបស់ពួកគេតាមចំណូលចិត្តរបស់ពួកគេ។
ការចុះឈ្មោះនឹងបើករយៈពេលពីរខែ ចាប់ពីថ្ងៃទី ១ ខែធ្នូ ឆ្នាំ ២០២២ ដល់ថ្ងៃទី ៣១ ខែមករា ឆ្នាំ ២០២៣។ លំដាប់នៃការចូលរួមនឹងមិនប៉ះពាល់ដល់លទ្ធផលនៃការចាប់ឆ្នោតនោះទេ។
អ្នកដែលមានសំណាងត្រូវបានជ្រើសរើសដោយចៃដន្យ នឹងទទួលបានអ៊ីមែលដែលមានកន្លែងទិញ ហើយការលក់ចាប់ផ្តើមពីថ្ងៃទី ១៥ ខែកុម្ភៈ ឆ្នាំ ២០២៣។
ទីក្រុងប៉ារីសឆ្នាំ ២០២៤ នឹងបើកដំណាក់កាលលក់សំបុត្រតែមួយសម្រាប់ការប្រកួតកីឡាអូឡាំពិកក្នុងខែឧសភា ឆ្នាំ ២០២៣ និងសម្រាប់កីឡាប៉ារ៉ាឡាំពិកនៅរដូវស្លឹកឈើជ្រុះឆ្នាំ ២០២៣ ។
សំបុត្រជាង ១៣ លាននឹងត្រូវលក់សម្រាប់ការប្រកួតកីឡាអូឡាំពិក និងប៉ារ៉ាឡាំពិកនៅទីក្រុងប៉ារីស ហើយជិតពាក់កណ្តាលនៃសំបុត្រអូឡាំពិកដែលបានបម្រុងទុកសម្រាប់សាធារណៈជនមានតម្លៃ ៥០ អឺរ៉ូ ឬតិចជាងនេះ។
តម្លៃសម្រាប់ព្រឹត្តិការណ៍ប្រកួតប្រជែងមានចាប់ពី ២៤ អឺរ៉ូដល់អតិបរមា ៩៥០ អឺរ៉ូ ហើយតម្លៃខ្ពស់បំផុតនឹងមានត្រឹមតែ ០.៥ ភាគរយនៃបរិមាណសំបុត្រសរុបសម្រាប់សាធារណជនទូទៅ។
