ឯកឧត្តម ចាយ បូរិន អញ្ជើញចូលរួមកាន់បិណ្ឌវេនទី៥ នៅវត្តខេមវ័ន ហៅវត្តបឹងស្នាយ នៅសង្កាត់សំបូរមាស ក្រុងកំពង់ចាម
ភ្នំពេញ៖ ឯកឧត្តម ចាយ បូរិន តំណាងរាស្ត្រមណ្ឌលខេត្តត្បូងឃ្មុំ និងលោកជំទាវ ព្រមទាំងក្រុមគ្រួសារ រួមជាមួយពុទ្ធបរិស័ទខេត្តកំពង់ចាម នៅព្រឹកថ្ងៃទី១៥ ខែកញ្ញា ឆ្នាំ២០២២ បានអញ្ជើញប្រារព្ធពិធីសូត្រមន្តកាន់បិណ្ឌវេនទី៥ នៃពិធីបុណ្យភ្ជុំបិណ្ឌ ទៅតាមគន្លងប្រពៃណីព្រះពុទ្ធសាសនាខ្មែរយើង នៅវត្តខេមវ័ន ហៅវត្តបឹងស្នាយ នៅសង្កាត់សំបូរមាស ក្រុងកំពង់ចាម ខេត្តកំពង់ចាម។
ឯកឧត្តមតំណាងរាស្រ្ត និងលោកជំទាវ ព្រមទាំងក្រុមគ្រួសារ រួមជាមួយពុទ្ធបរិស័ទដែលកាន់វេនទី៥ នៃពិធីបុណ្យភ្ជុំបិណ្ឌ បានអញ្ជើញអុជទៀនធូប ប្រគេនគន្ធពិដោរ ថ្វាយបង្គំព្រះពុទ្ធបដិមា និងព្រះសង្ឃ ព្រមទាំងសមាទានសីល ដើម្បីរម្លឹកដល់គុណបុណ្យព្រះរតនៈត្រៃយ៍ដ៏ខ្ពង់ខ្ពស់តាមគន្លងប្រពៃណីព្រះពុទ្ធសាសនា ជាពិសេសរម្លឹកដល់ព្រះសម្មាសម្ពុទ្ធព្រះបរមគ្រូនៃយើង ដែលព្រះអង្គបានត្រាស់ដឹងនូវអនុត្តរៈសម្មាសម្ពុទ្ធធិញាណ និងព្រះធម៌វិន័យដ៏វិសេសវិសាល បន្សល់ទុកឱ្យពុទ្ធបរិស័ទគ្រប់ជំនាន់ បានគោរពប្រតិបត្តិជារៀងដ៏រាប់រៀងមក។
សូមបញ្ជាក់ថា ពិធីបុណ្យកាន់បិណ្ឌ-ភ្ជុំបិណ្ឌ ជាពិធីបុណ្យប្រពៃណីជាតិដ៏ធំបំផុត សម្រាប់អ្នកកាន់ព្រះពុទ្ធសាសនាខ្មែរយើងគ្រប់ៗរូប ហើយពិធីបុណ្យនេះប្រារព្ធឡើងដើម្បីឧទ្ទិសកុសលផលបុណ្យជូនដល់ដួងវិញ្ញាណក្ខន្ធ ញាតិការទាំង៧សណ្តាន រួមមាន មាតា បិតា ជីដូន ជីតា បងប្អូនកូនចៅ គ្រូឧជ្ឈាយាចារ្យ បុព្វការីជន-បុព្វបុរសជាតិ និងបងប្អូនជនរួមជាតិទាំងឡាយ ដែលបានលាចាកលោកនេះទៅកាន់លោកខាងមុខ ហើយនោះសូមអញ្ជើញមកទទួលយកផល្លានិសង្ឃដែលកូនចៅបានបរិច្ចាគដោយសទ្ធាជ្រះថ្លាឧទ្ទិសជូន នាពេលនេះ ហើយកុំភ្លេចងាកក្រោយឱ្យពរជ័យ ទទួលបានសេចក្តីសុខចម្រុងចម្រើន ថ្កុំថ្កើងជារៀងរហូតតទៅ។
ក្នុងឱកាសចូលរួមពិធីកាន់បិណ្ឌវេនទី៥ នៃពិធីបុណ្យភ្ជុំបិណ្ឌ ឯកឧត្តម ចាយ បូរិន និងលោកជំទាវ ព្រមទាំងក្រុមគ្រួសារ រួមជាមួយពុទ្ធបរិស័ទ ដែលកាន់បិណ្ឌវេនទី៥ នៅវត្តខេមវ័ន ហៅវត្តបឹងស្នាយ បានអញ្ជើញរាប់បាត និងធ្វើពិធីវេរប្រគេនព្រះសង្ឃ ដែលគង់ចាំព្រះវស្សាអស់កាលត្រីមាស នៅវត្តខេមវ័ន ហៅវត្តបឹងស្នាយ រួមមាន ស្លាដក គ្រឿងឧបភោគបរិភោគ និងបច្ច័យមួយចំនួនសម្រាប់កសាងសិមិទ្ធផលនានានៅក្នុងវត្តខេមវ័ន ហៅវត្តបឹងស្នាយ ៕
