ឯកឧត្តម ហ៊ុន ម៉ានី៖ ស្គាល់ឱកាស ចាប់ឱកាស ប្រើឱកាស និងបង្កើតឱកាស ជាកត្តាសំខាន់ ដើម្បីឈានដល់ការសម្រេចភាពជោគជ័យសម្រាប់ខ្លួនឯង គ្រួសារ និងសង្គមជាតិ

ភ្នំពេញ៖ ប្រធានសហភាពសហព័ន្ធយុវជនកម្ពុជា ឯកឧត្តម ហ៊ុន ម៉ានី បានមានប្រសាសន៍ថា ស្គាល់ឱកាស ចាប់ឱកាស ប្រើឱកាស និងបង្កើតឱកាស គឺជាកត្តាមួយយ៉ាងសំខាន់ ដើម្បីឈានដល់ការសម្រេចភាពជោគជ័យសម្រាប់ខ្លួនឯង គ្រួសារ និងសង្គមជាតិ។

ឯកឧត្ដមបានលើកឡើងបែបនេះ ក្នុងពិធីបើកវគ្គបណ្តុះបណ្តាលអក្ខរកម្មឌីជីថលក្នុងវិស័យទេសចរណ៍សម្រាប់រាជធានីភ្នំពេញ និងខេត្តសៀមរាប នៅអគារ The Kampus នាថ្ងៃទី ២២ ខែសីហា ឆ្នាំ ២០២២។

ឯកឧត្តម ហ៊ុន ម៉ានី បានលើកឡើងថា បច្ចេកវិទ្យា និងអ៊ីនធឺណិតបានជ្រៀតចូលយ៉ាងជ្រៅក្នុងសកម្មភាពសេដ្ឋកិច្ច សង្គម នៅគ្រប់ផ្នែក និងគ្រប់វិស័យនៃជីវភាពរស់នៅប្រចាំថ្ងៃរបស់ប្រជាជន។ ដូច្នេះការចាប់យកបច្ចេកវិទ្យា និងរៀនសូត្រពីបច្ចេកវិទ្យា ពិតជាសំខាន់ ចំបាច់ និងចំពេលវេលា ស្របតាមទិសដៅរបស់រាជរដ្ឋាភិបាលក្នុងការអភិវឌ្ឍប្រទេសជាតិ និងការស្តារសេដ្ឋកិច្ច-សង្គម បន្ទាប់ពីវិបត្តិកូវីដ-១៩ បានវាយលុក។

ឯកឧត្តមបន្តទៀតថា ការអភិវឌ្ឍធនធានមនុស្ស គឺជាកត្តាចាំបាច់បំផុតមិនអាចខ្វះបាន ក្នុងការកំណត់ភាពជោគជ័យនៃការរីកចម្រើនរបស់បច្ចេកវិទ្យា។ ក្នុងន័យនេះ ការបណ្តុះបណ្តាល « អក្ខរកម្មឌីជីថល» ពិតជាជួយជំរុញដល់ការកសាងធនធានមនុស្សដែលប្រកបដោយសមត្ថភាព និងមានលទ្ធភាពគ្រប់គ្រាន់ក្នុងការធ្វើការជាមួយបច្ចេកវិទ្យាយ៉ាងពិតប្រាកដ។

ទន្ទឹមនឹងនោះ ឯកឧត្តម ហ៊ុន ម៉ានី ក៏បានចូលរួមអបអរសាទរ និងលើកទឹកចិត្តដល់សិក្ខាកាមអោយខិតខំស្វែងយល់ និងសិក្សារៀនសូត្រអំពីការវិវត្តនៃសង្គមឌីជីថលជាបន្តបន្ទាប់ ដើម្បីត្រៀមខ្លួនអោយរួចរាល់ក្នុងការអភិវឌ្ឍសង្គមជាតិស្របតាមបរិបទឧស្សាហកម្ម ៤.០៕