ភ្នំពេញ៖ សហភាពសហព័ន្ធយុវជនកម្ពុជា (ស.ស.យ.ក) នឹងរៀបចំសិក្ខាសាលាជាស៊េរីវគ្គទី៥ ស្តីពី ការជំរុញសហគ្រិនភាពជាយុវជនក្រោមប្រធានបទ ”ការធ្វើពាណិជ្ជកម្មតាមប្រព័ន្ធអេឡិចត្រូនិក (E-Commerce)” នៅថ្ងៃទី១០ ខែកក្កដា ឆ្នាំ២០២២ខាងមុខនេះ។
សិក្ខាសាលានេះរៀបចំឡើងដើម្បីឱ្យយុវជន ក៏ដូចជាសាធារណជនទូទៅស្វែងយល់កាន់តែច្បាស់អំពីការធ្វើអាជីវកម្មតាមប្រព័ន្ធ អេឡិចត្រូនិក ក៏ដូចជាការចាប់យកឱកាសក្នុងការចាប់ផ្តើមអាជីវកម្មតាមបែបផែនថ្មី។
សិក្ខាសាលាជាស៊េរីវគ្គទី៥ នេះត្រូវបានរៀបចំឡើងក្នុងគោលបំណងជំរុញ និងលើកទឹកចិត្តដល់យុវជន សិស្ស និស្សិត និងសាធារណៈជនដូចខាងក្រោម៖
– យល់ដឹងពីច្បាប់ បទប្បញ្ញត្តិ និងគោលនយោបាយ នានារបស់រាជរដ្ឋាភិបាលពាក់ព័ន្ធនឹងការធ្វើពាណិជ្ជកម្មតាមប្រព័ន្ធអេឡិចត្រូនិក
– ស្វែងយល់អំពីនីតិវិធីនៃការចុះបញ្ជីអាជីវកម្មក្នុងប្រព័ន្ធអេឡិចត្រូនិក
– ស្វែងយល់អំពីការចាប់ផ្តើមធ្វើអាជីវកម្មតាមប្រព័ន្ធអេឡិចត្រូនិក
– ការធ្វើពាណិជ្ជកម្មតាមប្រព័ន្ធអេឡិចត្រូនិកក្នុងយុគសម័យឌីជីថល
– យល់ដឹងអំពីបទពិសោធន៍ បញ្ហាប្រឈម ដំណោះស្រាយ និងភាពជោគជ័យពីការធ្វើពាណិជ្ជកម្មតាមប្រព័ន្ធអេឡិចត្រូនិក៕
