កង្វះទឹកប្រើប្រាស់មិនមែនជាបញ្ហាចោទសម្រាប់អតីតយុទ្ធជននៅភូមិប៊ុនរ៉ានីសែនជ័យដំណាក់ទ្រយឹងទៀតឡើយ

ពោធិ៍សាត់៖ បច្ចុប្បន្នការផ្ដល់អណ្ដូងទឹកស្អាតជូនបងប្អូនអតីតយុទ្ធជនរស់នៅភូមិប៊ុនរ៉ានីសែនជ័យដំណាក់ទ្រយឹង មានចំនួនសរុប ៤០៥អណ្ដូង ដែលអាចផ្គត់ផ្គង់ទឹកសម្រាប់ប្រើប្រាស់ប្រចាំថ្ងៃ និងស្រោចស្រពដំណាំកសិកម្មយ៉ាងងាយស្រួល។ អណ្ដូងទឹកទាំងនេះ ជាអំណោយដ៏ថ្លៃថ្លារបស់សម្តេចតេជោ ហ៊ុន សែន ប្រធានសមាគមអតីតយុទ្ធជន និងនិវត្តជនកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងមានការជួយការឧបត្ថម្ភពីសប្បុរសជននានា សាងសង់ឡើងក្នុងគោលបំណងកាត់បន្ថយបញ្ហាកង្វះទឹក និងជួយលើកកម្ពស់សុខមាលភាពក្នុងការរស់នៅជនបទឱ្យមានប្រសើរឡើងជាលំដាប់។

តាមការបញ្ជាក់ពី ឯកឧត្តម ខូយ រីដា អភិបាលនៃគណៈអភិបាលខេត្តពោធិ៍សាត់ បានឱ្យដឹងថា កន្លងមកតម្រូវការនៃការប្រើប្រាស់ទឹកនៅទីនេះ មានការខ្វះខាតបន្តិចបន្ដួចនារដូវប្រាំងទៅលើការស្រោចស្រពដំណាំក្នុងការធ្វើកសិកម្មផ្សេងៗនៅក្នុងភូមិដ្ឋាន ប៉ុន្តែបញ្ហាទាំងនេះនឹងត្រូវដោះស្រាយជាបន្តបន្ទាប់មិនឱ្យបងប្អូនអតីតយុទ្ធជនជួបការលំបាកឡើយ។

ក្រៅពីនេះ នៅក្នុងភូមិក៏មានការតបណ្តាញទឹកស្អាតបន្ថែមទៀតសរុបចំនួន ១៥៣ គ្រួសារ ដែលបានផ្គត់ផ្គង់ទឹកតាមរយៈបណ្ដាញទឹកស្អាតដែលក្រសួងធនធានទឹកបាន និហកំពុងរៀបចំជូនទៅតាមខ្នងផ្ទះអតីតយុទ្ធជនប្រើប្រាស់ដោយទំនុកចិត្ត បន្ទាប់ពីមានការធ្វើតេស្តធានាសុវត្ថិភាពយ៉ាងត្រឹមត្រូវតាមលក្ខណៈបច្ចេកទេស។

សូមជម្រាបជូនថា នៅគ្រាដំបូងក្នុងភូមិដ្ឋានបង្កើតថ្មីនេះ ការផ្គត់ផ្គង់ទឹកសម្រាប់ប្រើប្រាស់ប្រចាំថ្ងៃពុំទាន់អាចឆ្លើយតបទៅនឹងតម្រូវការនៅឡើយ ប៉ុន្តែពេលនេះទឹកលែងជាបញ្ហាចោទសម្រាប់បងប្អូនអតីតយុទ្ធជនដែលរស់នៅទីនេះទៀតនោះទេ ព្រោះថារាជរដ្ឋាភិបាលបានរៀបចំទាំងប្រព័ន្ធធារាស្ត្រស្តុកទឹក ការតភ្ជាប់បណ្ដាញទឹកស្អាត និងអណ្ដូងទឹករាប់រយអណ្ដូង សម្រាប់បំពេញសេចក្ដីត្រូវការក្នុងជីវភាពរស់នៅប្រចាំថ្ងៃ៕