ភ្នំពេញ៖ រសៀលថ្ងៃទី២១ ខែសីហា ឆ្នាំ២០២៥ នៅស្នាក់ការកណ្តាលសមាគមមិត្តភាពកម្ពុជា-ចិន មានរៀបចំកម្មវិធីប្រគល់-ទទួលរថយន្តពេទ្យចល័តដែលមានមុខងារជាគ្លីនិកវះកាត់និងព្យាបាលជំងឺបេះដូងពីកំណើត ក្រោមអធិបតីភាពឯកឧត្តម ឯក សំអុល ឧត្តមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា និងជាប្រធានសមាគមមិត្តភាពកម្ពុជា-ចិន និង ឯកឧត្តម Wang Wenbin ឯកអគ្គរដ្ឋទូតចិនប្រចាំកម្ពុជា។
អង្គពិធីទាំងមូលមានអ្នកចូលរួមសរុប១២០រូបដែលអញ្ជើញមកពីទីស្តីការគណៈរដ្ឋមន្ត្រី ក្រសួងមហាផ្ទៃ ក្រសួងសុខាភិបាល ក្រសួងសាធារណការនិងដឹកជញ្ជូន ក្រសួងអប់រំ យុវជននិងកីឡា ក្រុមប្រឹក្សាអភិវឌ្ឍកម្ពុជា សមាគមអ.ម.ត. សមាគមTYDA យុវជនស.ស.យ.ក. សមាគមអ្នកស្រាវជ្រាវវឌ្ឍនភាពកម្ពុជា-ចិន មូលនិធិចិនPEACELAN មូលនិធិចិនដើម្បីសន្តិភាពនិងការអភិវឌ្ឍ មូលនិធិចិនCare for Life អង្គការYUNDI មន្ទីរពេទ្យបេះដូងFuwai ខេត្តយូណាន វិទ្យុមិត្តភាពកម្ពុជា-ចិន។
ឯកឧត្តម ឡាវ វ៉ាន់ អនុប្រធានសមាគមមិត្តភាពកម្ពុជា-ចិន បានជម្រាបថា រថយន្តដែលមានតម្លៃ២ ៩២០ ០០០យាន់ចិននេះជាកិច្ចខិតខំប្រឹងប្រែងរួមគ្នារវាងសង្គមស៊ីវិលនៃប្រទេសយើងទាំងពីរក្រោមកិច្ចសហការយ៉ាងរឹងមាំពីសមាគមមិត្តភាពកម្ពុជា-ចិន និង មូលនិធិចិនPEACELAN ព្រមទាំងទទួលបាននូវកិច្ចគាំទ្រយ៉ាងពេញទំហឹងពីអង្គពាក់ព័ន្ធនានា ក្នុងគោលបំណងរួមគ្នាជួយវះកាត់និងព្យាបាលជំងឺបេះដូងពីកំណើតជូនដល់កុមារកម្ពុជា។
លោក Liu Wenzhi តំណាងមូលនិធិចិនPEACELANបានជម្រាបថា ដោយមានការគាំទ្រពីបណ្តាញសង្គមស៊ីវិលចិនCNIE សង្គមស៊ីវិលនៃប្រទេសយើងទាំងពីរបានឈានដល់ការឯកភាពក្នុងការនាំយករថយន្តនេះ ដែលដើរតួនាទីជាបន្ទប់វះកាត់ចល័ត និងជាគ្លិនិកដែលបំពាក់សម្ភារៈបរិក្ខាពេទ្យទំនើបសម្រាប់បម្រើការងារលើវិស័យសាធារណៈថែមទៀតផង។ លោកបានបន្ថែមថា សង្គមស៊ីវិលចិននឹងបន្តគាំទ្រដល់បេសកកម្មការងាររបស់សមាគមមិត្តភាពកម្ពុជា-ចិនក្នុងការជួយលើកកម្ពស់សុខុមាលភាពសាធារណៈជូនដល់ប្រជាជនកម្ពុជានៅជនបទ។
លោកស្រី Yang Lihua តំណាងអង្គការYUNDI និងជាតំណាងឱ្យមន្ទីរពេទ្យបេះដូងFuwai ខេត្តយូណាន បានជម្រាបថា ក្រោមកិច្ចសហការជាមួយអង្គពាក់ព័ន្ធនានា ជាពិសេសមន្ទីរពេទ្យមិត្តភាពកម្ពុជា-ចិន ព្រះកុសមៈ ទើបចាប់ពីឆ្នាំ២០១៨មក ភាគីយើងទាំងពីរបានរួមគ្នាចុះពិនិត្យសុខភាពជូនដល់កុមារកម្ពុជាចំនួនជាង៥ម៉ឺននាក់នៅតាមបណ្តាសាលាបឋមសិក្សានានាក្នុងរាជធានីភ្នំពេញ និងបណ្តាខេត្តមួយចំនួន ហើយបានរកឃើញកុមារចំនួន១៥០រូបមានជំងឺបេះដូងពីកំណើត ដែលក្នុងនោះ១២២រូបបានជាសះស្បើយក្រោយទទួលបានការវះកាត់និងព្យាបាលដោយឥតគិតថ្លៃនៅមន្ទីរពេទ្យបេះដូងFuwai ខេត្តយូណាន ២៣នាក់បានវះកាត់និងព្យាបាលនៅមន្ទីរពេទ្យមិត្តភាពកម្ពុជា-ចិន ព្រះកុសមៈ និងនៅមន្ទីរពេទ្យនានាដទៃទៀតក្នុងប្រទេសកម្ពុជា ហើយដោយឡែកនាដើមខែកញ្ញានេះ កុមារ៥រូបនឹងគ្រោងបញ្ជូនទៅវះកាត់និងព្យាបាលដោយឥតគិតថ្លៃនៅប្រទេសចិន។ លោកស្រីបានប្តេជ្ញាចិត្តនឹងបន្តសកម្មភាពក្រោមយន្តការដែលមានស្រាប់ក្នុងការសម្របសម្រួលដល់ការងាររបស់ក្រុមគ្រូពេទ្យកម្ពុជា-ចិនក្នុងការប្រើប្រាស់រថយន្តនេះប្រកបដោយប្រសិទ្ធភាពខ្ពស់ក្នុងការជួយដល់កុមារកម្ពុជាដែលមានជំងឺបេះដូងពីកំណើត។
ឯកឧត្តម Wang Wenbin បានមានប្រសាសន៍ថា រដ្ឋាភិបាលចិនជានិច្ចកាលតែងបានគាំទ្រយ៉ាងពេញទំហឹងដល់បេសកកម្មការងាររបស់សង្គមស៊ីវិលនៃប្រទេសយើងទាំងពីរក្នុងបុព្វហេតុជួយដល់ការអភិវឌ្ឍសង្គមសេដ្ឋកិច្ចក្នុងប្រទេសកម្ពុជានិយាយរួម ដល់ដំណើរការនៃការវះកាត់និងព្យាបាលជំងឺបេះដូងពីកំណើតរបស់កម្ពុជានិយាយដោយឡែក។
ឯកឧត្តម ឯក សំអុល បានថ្លែងនូវការដឹងគុណដល់រាជរដ្ឋាភិបាលកម្ពុជាក្រោមការដឹកនាំប្រកបដោយភាពវាងវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការគាំទ្រដល់បេសកកម្មការងាររបស់សមាគមមិត្តភាពកម្ពុជា-ចិន។
ឯកឧត្តមបានបន្ថែមថា ពិធីប្រគល់-ទទួលរថយន្តពេទ្យចល័តនាថ្ងៃនេះគឺជាគីឡូម៉ែត្រចេញដំណើរដ៏ប្រពៃនៃសង្គមស៊ីវិលរវាងប្រទេសយើងទាំងពីរ ក្រោមទម្រដ៏រឹងមាំនៃយន្តការសហការយ៉ាងជិតស្និទ្ធនៃអង្គពាក់ព័ន្ធនានាដែលបានចេញដំណើរតាំងពីរឆ្នាំ២០១៨ក្នុងការរួមចំណែកជួយដល់កុមារកម្ពុជាដែលមានជំងឺបេះដូងពីកំណើតឱ្យបានជាសះស្បើយនិងក្លាយជាធនធានដ៏សំខាន់សម្រាប់គ្រួសារ និងសង្គមជាតិ។ ឯកឧត្តមក៏បានលើកទឹកចិត្តបន្តទៀតដល់ស្ថានទូតចិនប្រចាំកម្ពុជា បណ្តាសង្គមស៊ីវិលនានា និងវិស័យឯកជនរបស់ប្រទេសចិនក្នុងកិច្ចប្រកៀកស្មាគ្នាជាមួយអង្គពាក់ព័ន្ធនានារបស់កម្ពុជាក្រោមកិច្ចសម្របសម្រួលពីសមាគមមិត្តភាពកម្ពុជា-ចិន លើបេសកកម្មបម្រើនិងបង្កើនការលើកកម្ពស់ ព្រមទាំងធ្វើទំនើបកម្មដល់សេវាសុខភាពសាធារណៈនៅក្នុងប្រទេសកម្ពុជា៕
