សិង្ហបុរី៖ បើយោងតាមទិន្នន័យរបស់រដ្ឋាភិបាល បានបញ្ជាក់ថា ការនាំចេញរបស់សិង្ហបុរីបានកើនឡើង១៣ភាគរយនៅក្នុងខែមិថុនា ធៀបនឹងខែដូចគ្នាកាលពីឆ្នាំមុន លើសពីការប៉ាន់ស្មានរបស់អ្នកវិភាគ ដោយសារការនាំចេញកុំព្យូទ័រ បន្ទះសៀគ្វីអគ្គិសនី និងមាស ហក់ឡើងខ្លាំង។
ផលិតផលអេឡិចត្រូនិកដូចជាបន្ទះសៀគ្វីអគ្គិសនី និងកុំព្យូទ័របានកើនឡើង ៥៣,៨ភាគរយ និង១៧,៥ភាគរយរៀងគ្នា ខណៈផលិតផលមិនមែនជាឧបករណ៍អេឡិចត្រូនិកដូចជាមាស និងគ្រឿងម៉ាស៊ីនឯកទេសកើនឡើង២១១,៩ភាគរយ និង៣១,៤ភាគរយរៀងគ្នា។ ការនាំចេញទៅកាន់ហុងកុង តៃវ៉ាន់ និងកូរ៉េខាងត្បូងបានកើនឡើងក្នុងខែមិថុនា ខណៈការនាំចេញទៅកាន់ប្រទេសជប៉ុន ឥណ្ឌូណេស៊ី និងសហរដ្ឋអាម៉េរិកមានការថយចុះ។
យ៉ាងណា លោក ជូ ហានតេង (Chua Han Teng) សេដ្ឋវិទូជាន់ខ្ពស់របស់ធនាគារ DBS បានលើកឡើងថា ការនាំចេញទំនិញរបស់សិង្ហបុរីមានភាពធន់នៅក្នុងឆមាសទីមួយនៃឆ្នាំនេះ ប៉ុន្តែការនាំចេញទំនិញ នឹងដាំក្បាលចុះវិញដោយការធ្លាក់ចុះនៃពាណិជ្ជកម្ម និងផលិតកម្មនៅក្នុងពាក់កណ្តាលចុងក្រោយនៃឆ្នាំនេះ ដោយសារការរឹតត្បិតពាណិជ្ជកម្មសកល និងភាពមិនប្រាកដប្រជាជុំវិញពន្ធគយរបស់សហរដ្ឋអាម៉េរិក។ សម្រាប់រយៈពេល៦ខែដំបូង នៃឆ្នាំ២០២៥ ការនាំចេញដែលមិនរាប់បញ្ចូលប្រេងបានកើនឡើង៥,២ភាគរយ។
ទិន្នន័យបឋមបង្ហាញថា សេដ្ឋកិច្ចរបស់ប្រទេសសិង្ហបុរីកើនឡើងលឿនជាងការរំពឹងទុក៤,៣ភាគរយ នៅក្នុងត្រីមាសទី២ ធៀបនឹងឆ្នាំមុន បើទោះបីជាមានចក្ខុវិស័យធ្លាក់ចុះ ដោយសារតែភាពមិនប្រាកដប្រជានៃសេដ្ឋកិច្ចពិភពលោកក៏ដោយ។ រដ្ឋមន្ត្រីក្រសួងពាណិជ្ជកម្ម លោក ហ្គាន់ គឹមយ៉ុង (Gan Kim Yong) បានព្រមានថា ការអនុវត្តពន្ធគយរបស់សហរដ្ឋអាម៉េរិក នឹងបង្កផលប៉ះពាល់លើកំណើនក្នុងរយៈពេលពី៦ទៅ ១២ខែខាងមុខ។
ប្រធានាធិបតីអាម៉េរិក លោក ដូណាល់ ត្រាំ បានជូនដំណឹងដល់ប្រទេសមួយចំនួនថា ពន្ធពី២០ភាគរយទៅ៥០ភាគរយនឹងចាប់ផ្តើមប្រមូលពីថ្ងៃទី១ ខែសីហា។ សិង្ហបុរីមិនទាន់បានទទួលលិខិតពីរដ្ឋបាលលោក ត្រាំ នៅឡើយទេ ហើយការនាំចេញរបស់កូននាគអាស៊ីនេះ នៅតែជាកម្មវត្ថុនៃពន្ធមូលដ្ឋាន១០ភាគរយដែលបានប្រកាសកាលពីខែមេសា៕
