ទីភ្នាក់ងារអន្តោប្រវេសន៍របស់ UN ផ្តល់ជំនួយមនុស្សធម៌ឡើងវិញ ដល់ជនភៀសខ្លួនរ៉ូហ៊ីងយ៉ា នៅឥណ្ឌូណេស៊ី
ហ្សាការតា៖ ទីភ្នាក់ងារអន្តោប្រវេសន៍របស់អង្គការសហប្រជាជាតិ បានផ្តល់ជំនួយមនុស្សធម៌ឡើងវិញដល់ជនភៀសខ្លួនរ៉ូហ៊ីងយ៉ា នៅក្នុងប្រទេសឥណ្ឌូណេស៊ី។ នេះបើយោងតាមប្រធានទីភ្នាក់ងារ ប្រាប់សារព័ត៌មានរ៉យទ័រនៅថ្ងៃអង្គារទី១១ ខែមីនា។
ការផ្ដល់ជំនួយឡើងវិញនេះ ធ្វើឡើងបន្ទាប់ពីរបាយការណ៍របស់ភ្នាក់ងារព័ត៌មានរ៉យទ័រកាលពីសប្តាហ៍មុន ថាទីភ្នាក់ងារនេះត្រូវបានបង្ខំឱ្យកាត់បន្ថយជំនួយដល់ជនភៀសខ្លួនរ៉ូហ៊ីងយ៉ាជាង៩០០នាក់ ដោយសារតែការកាត់បន្ថយមូលនិធិយ៉ាងច្រើនពីម្ចាស់ជំនួយដ៏ធំបំផុតរបស់ខ្លួន គឺសហរដ្ឋអាម៉េរិក។ លោក ចេហ្វ ឡាបូវីត្ស (Jeff Labovitz) ប្រធានបេសកកម្មប្រចាំប្រទេសឥណ្ឌូណេស៊ី សម្រាប់អង្គការអន្តរជាតិនៃការធ្វើចំណាកស្រុក បញ្ជាក់ពីការផ្ដល់ជំនួយឡើងវិញដល់ជម្រកជនជាតិរ៉ូហ៊ីងយ៉ា នៅក្នុងទីក្រុង Pekanbaru ខាងលិចនៃកោះសូម៉ាត្រា។ លោកបានឱ្យដឹងថា៖«កម្មវិធីដ៏ធំបំផុតរបស់យើងក្នុងការផ្ដល់ជំនួយមនុស្សធម៌ ត្រូវបានចាប់ផ្តើមឡើងវិញ។ ខ្ញុំអាចបញ្ជាក់ថា មិនមានការកាត់បន្ថយសេវាដែលបានគ្រោងទុកនាពេលបច្ចុប្បន្ននេះទេ»។
ដោយឡែកពីគ្នា ទីភ្នាក់ងារបានបញ្ជាក់នៅក្នុងសេចក្តីថ្លែងការណ៍តាមអ៊ីមែលថា ខ្លួនបានស្វែងរកជម្រើសផ្សេងៗ ក្នុងការឆ្លើយតបទៅនឹងបញ្ហាប្រឈមនៃការផ្ដល់មូលនិធិ ហើយធនធានចាំបាច់នៅតែមាន ដែលអាចឱ្យវាបន្តកិច្ចខិតខំប្រឹងប្រែងមនុស្សធម៌របស់ខ្លួន។ អ.ស.ប. រាយការណ៍ថា មានជនជាតិរ៉ូហ៊ីងយ៉ាប្រហែល២៨០០នាក់ នៅក្នុងប្រទេសឥណ្ឌូណេស៊ី។ ជនជាតិភាគតិចរ៉ូហ៊ីងយ៉ាជាច្រើននាក់ ភាគច្រើនជាជនមូស្លីម ដើមកំណើតមកពីប្រទេសមីយ៉ាន់ម៉ា និងជាប្រជាជនគ្មានរដ្ឋច្រើនជាងគេលើលោក គេចចេញពីជំរំ និងការបៀតបៀនក្នុងប្រទេសមីយ៉ាន់ម៉ា និងបង់ក្លាដែសជារៀងរាល់ឆ្នាំ ដោយផ្សងព្រេងតាមទូកទៅកាន់ប្រទេសថៃ ឬឥណ្ឌូណេស៊ី និងម៉ាឡេស៊ី។
ផែនការកាត់បន្ថយជំនួយ បានធ្វើឡើងបន្ទាប់ពីមានភាពចលាចលជុំវិញវិស័យមនុស្សធម៌ពិភពលោក បន្ទាប់ពីប្រធានាធិបតីអាម៉េរិក លោក ដូណាល់ ត្រាំ ចូលកាន់តំណែងកាលពីខែមករា ដោយប្តេជ្ញាបញ្ឈប់ជំនួយបរទេសភាគច្រើនរបស់សហរដ្ឋអាម៉េរិក និងរុះរើទីភ្នាក់ងារសហរដ្ឋអាម៉េរិក សម្រាប់ការអភិវឌ្ឍអន្តរជាតិ (USAID)៕
