លោក វ៉ាង យី ប្រាប់សមភាគីបូលីវីថា ចិននឹងតែងតែជាមិត្ត និងជាដៃគូដ៏គួរឱ្យទុកចិត្តរបស់បណ្តាប្រទេសអាម៉េរិកឡាទីន
ប៉េកាំង៖ លោក វ៉ាង យី រដ្ឋមន្ត្រីការបរទេសចិន បានប្រាប់សមភាគីបូលីវីថា ចិននឹងតែងតែជាមិត្ត និងជាដៃគូដ៏គួរឱ្យទុកចិត្តរបស់បណ្តាប្រទេសអាម៉េរិកឡាទីន ខណៈរដ្ឋធានីប៉េកាំង និងរដ្ឋធានីវ៉ាស៊ីនតោន សម្លឹងមើលការពង្រឹងជំហររៀងៗខ្លួននៅក្នុងតំបន់ ដែលស្ថិតក្រោមឥទ្ធិពលរបស់សហរដ្ឋអាម៉េរិក។
រដ្ឋមន្ត្រីការបរទេសចិន លោក វ៉ាង យី បាននិយាយក្នុងអំឡុងកិច្ចប្រជុំនៅអង្គការសហប្រជាជាតិ កាលពីថ្ងៃទី១៨កុម្ភៈថា៖«អាម៉េរិកឡាទីន គឺជាផ្ទះរបស់ប្រជាជនអាម៉េរិកឡាទីន ហើយមិនមែនជាទីធ្លាបង្ហាញឥទ្ធិពលរបស់ប្រទេសណាមួយឡើយ»។
លោក វ៉ាង បានប្រាប់រដ្ឋមន្ត្រីការបរទេសបូលីវី លោកស្រី សេលីនដា សូសា ថា ចិនចង់បង្កើនភាពជាដៃគូយុទ្ធសាស្ត្រចិន-បូលីវីជាបន្តបន្ទាប់។ បូលីវី ដែលបានបង្កើតទំនាក់ទំនងការទូតជាមួយរដ្ឋធានីប៉េកាំង ក្នុងឆ្នាំ១៩៨៥ ស្ថិតក្នុងចំណោមប្រទេសជាច្រើននៅអាម៉េរិកខាងត្បូង មានទំនាក់ទំនងសេដ្ឋកិច្ចជាមួយប្រទេសចិនតាមរយៈបំណុល និងការវិនិយោគ។ បូលីវា ជំពាក់បំណុលចិន ជា ប្រទេស ផ្តល់ កម្ចី ទ្វេភាគី ធំ ជាង គេ របស់ ពិភពលោក ពោលកឺជាង១,៧ពាន់ លាន ដុល្លារ អាម៉េរិក នេះ បើ តាម ទិន្នន័យ របស់ ធនាគារ ពិភពលោក។ ក្រុមហ៊ុនចិនបានបណ្តាក់ទុនបន្ថែមចំនួន៦ពាន់លានដុល្លារអាម៉េរិក នៅក្នុងវិស័យលោហៈ ថាមពល និងដឹកជញ្ជូនរបស់ប្រទេសបូលីវី។
ទិន្នន័យរបស់ក្រសួងការបរទេសសហរដ្ឋអាម៉េរិក បង្ហាញថា ការវិនិយោគផ្ទាល់ពីបរទេសរបស់សហរដ្ឋអាម៉េរិក នៅក្នុងប្រទេសបូលីវីមានចំនួនប្រហែល៤៣០លានដុល្លារអាម៉េរិក នៅក្នុងវិស័យប្រេង និងឧស្ម័ន និងផលិតកម្ម។អាម៉េរិក និងចិន កំពុងប្រកួតប្រជែងគ្នាយ៉ាងស្វិតស្វាញនៅតំបន់អាម៉េរិក។
លោក វ៉ាង បានលើកឡើងថា៖ «ប្រទេសចិនគាំទ្រប្រទេសនៅអាម៉េរិកឡាទីន ក្នុងការការពារអធិបតេយ្យភាព ឯករាជ្យភាព និងសេចក្តីថ្លៃថ្នូររបស់ជាតិ»។
លោកក៏បានអបអរសាទរដល់បូលីវីដែល បានក្លាយជាសមាជិកនៃ BRICS ជាក្រុមប្រទេសកំពុងអភិវឌ្ឍដែលបង្កើតឡើងដោយប្រេស៊ីល រុស្ស៊ី ឥណ្ឌា និងចិន ដើម្បីប្រជែងនឹងសណ្តាប់ធ្នាប់ពិភពលោកដែលគ្រប់គ្រងដោយលោកខាងលិច។
ចាប់តាំងពីពេលនោះមក ក្រុមនេះបានពង្រីកសមាជិកភាព ដោយរួមបញ្ចូលអាហ្វ្រិកខាងត្បូង អេហ្ស៊ីប អេត្យូពី ឥណ្ឌូណេស៊ី អ៊ីរ៉ង់ អារ៉ាប៊ីសាអូឌីត និងអារ៉ាប់រួម។
លោក ត្រាំ បានព្រមានម្ដងហើយម្ដងទៀត លើ BRICS កុំឱ្យប្រកួតប្រជែងលើឥទ្ធិពលនៃប្រាក់ដុល្លារអាម៉េរិក ហើយបានគំរាមកំហែងសមាជិកក្រុមនេះ ជាមួយនឹងពន្ធ១០០ភាគរយ ប្រសិនបើពួកគេចង់ប្រជែងជាមួយប្រាក់ដុល្លារ៕
