ខណ្ឌរដ្ឋបាលព្រៃឈើកំពង់ធំ ចុះហត្ថលេខាលើផែនការគ្រប់គ្រងព្រៃសហគមន៍ចំនួន ៦ ដែលមានគាំទ្រដោយAFoCO និង RECOFTC

ភ្នំពេញ៖ នាថ្ងៃសុក្រ ទី២៤ ខែមករា ឆ្នាំ២០២៥ ខណ្ឌរដ្ឋបាលព្រៃឈើកំពង់ធំ នៃមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ បានរៀបចំសិក្ខាសាលាផ្សព្វផ្សាយ និងចុះហត្ថលេខាផែនការគ្រប់គ្រងព្រៃសហគមន៍ចំនួន ៦ ក្នុងខេត្តកំពង់ធំ ដោយមានគាំទ្រដោយAFoCO និង RECOFTC ។

សិក្ខាសាលានេះ មានការចូលរួមបើកដោយលោក ហែម សារ៉ាវុធ ប្រធាននាយកដ្ឋានព្រៃឈើ និងសហគមន៍ព្រៃឈើ តំណាងរដ្ឋបាលព្រៃឈើ មន្រ្តីបង្គោលជាតិAFoCO និងតំណាងអង្គការRECOFTC មន្រ្តីរដ្ឋបាលព្រៃឈើថ្នាក់កណ្តាល តំណាងមន្ទីរកសិកម្ម រុក្ខាប្រមាញ់ និងនេសាទខេត្តកំពង់ធំ លោកនាយខណ្ឌរដ្ឋបាលព្រៃឈើកំពង់ធំ មន្រ្តីរដ្ឋបាលព្រៃឈើខេត្តកំពង់ធំ លោកមេឃុំចំនួន ៦ ប្រធាននិងគណៈកម្មាធិការគ្រប់គ្រងសហគមន៍ព្រៃឈើទាំង៦ សរុបប្រមាណ ៥៥ នាក់។

លោក ហែម សារ៉ាវុធ បានថ្លែងអំណរគុណដល់ខណ្ឌរដ្ឋបាលព្រៃឈើកំពង់ធំ និងអង្គការដៃគូរ ដែលបានខិតខំប្រឹងរៀបចំផែនការគ្រប់គ្រងព្រៃឈើចំនួន៦ រួមមាន៖សហគមន៍ព្រៃឈើ ពេជ្រតាជា , សហគមន៍ព្រៃឈើ ត្រពាំងត្រុំ-ត្រពាំងកែប, សហគមន៍ព្រៃឈើ ត្រពាំងអំពិល, សហគមន៍ព្រៃឈើ កន្សែងវាល, សហគមន៍ព្រៃឈើ តំបន់ព្រៃជាំស្មាច់ និងសហគមន៍ព្រៃឈើ ព្រៃត្បូងក្រពើ
និងបានរៀបចំសិក្ខាសាលាផ្សព្វផ្សាយ និងចុះហត្ថលេខា ដើម្បីបញ្ចប់នីតិវិធីនៃការរៀបចំផែនការគ្រប់គ្រង និងបន្តចាប់ផ្តើមអនុវត្តសកម្មភាពដែលបានលើកឡើង។ ជាមួយគ្នានេះដែរ រដ្ឋបាលព្រៃឈើនៃក្រសួងកសិកម្ម រុក្ខាប្រមាញ់ និងនេសាទ បាននឹងកំពុងខិតខំប្រឹងប្រែង និងគៀគរធនធាន ដោយបានដាក់ចេញនូវផែនការសកម្មភាពនានា ដើម្បីគាំទ្រដល់ការអនុវត្តឱ្យមានប្រសិទ្ធភាពនូវ ផែនការយុទ្ធសាស្ត្របញ្ចកោណដំណាក់កាលទី១ បញ្ចកោណទី៤ “ការអភិវឌ្ឍប្រកបដោយភាពធនចីរភាព និងបរិយាបន្ន” មុំទី២ “ការគ្រប់គ្រងធនធានធម្មជាតិ បេតិកភណ្ឌវប្បធម៌ និងទេសចរណ៍ប្រកបដោយចីរភាព” ផែនការសកម្មភាពអាទិភាពទី២: ការពង្រឹងការគ្រប់គ្រង ការអភិរក្ស ការការពារ និងការអភិវឌ្ឍប្រកបដោយសុខដុមនីយកម្ម និងចីរភាព នូវប្រព័ន្ធអេកូឡូស៊ីសំខាន់ៗ របស់កម្ពុជា តាមរយៈការ បន្តការគ្រប់គ្រងធនធានព្រៃឈើ និងសត្វព្រៃ និងការស្តារព្រៃឈើឡើងវិញ។

លោក ប៊ុន សុធី នាយខណ្ឌរដ្ឋបាលព្រៃឈើកំពង់ធំ បានថ្លែងអំណរគុណដល់រដ្ឋបាលព្រៃឈើថ្នាក់កណ្តាល និងអង្គការដៃគូរដែលបានជួយគាំទ្រដល់ដំណើរការរៀបចំផែនការគ្រប់គ្រងព្រៃសហគមន៍ និងសូមអំពាវនាវដល់អ្នកពាក់ព័ន្ធចូលរួមអនុវត្តផែនការគ្រប់គ្រងឱ្យទទួលបានជោគជ័យ។

ជាចុងបញ្ចប់នៃសិក្ខាសាលា លោក តុង យី អនុប្រធានមន្ទីរកសិកម្ម រុក្ខាប្រមាញ់ និងនេសាទ សូមអំពាវបងប្ងូនសហគមន៍ព្រៃឈើត្រូវសកម្ម និងមានឆន្ទះខ្ពស់ដើម្បីអនុវត្តផែនការគ្រប់គ្រងឱ្យទទួលបានជោគជ័យ ៕