លោក Zelensky៖ អ៊ុយក្រែនត្រូវការកងរក្សាសន្តិភាព ២០០,០០០នាក់សម្រាប់ការធានាសន្តិសុខ
បរទេស៖ ទីភ្នាក់ងារសារព័ត៌មាន Interfax-Ukraine បានរាយការណ៍កាលពីថ្ងៃពុធថា ប្រធានាធិបតីអ៊ុយក្រែន លោក Volodymyr Zelensky បានបញ្ជាក់ថា ប្រទេសរបស់លោកនឹងត្រូវការទាហានរក្សាសន្តិភាពអឺរ៉ុបយ៉ាងហោចណាស់ ២០០,០០០នាក់ដែលជាផ្នែកមួយនៃការធានាសន្តិសុខសក្តានុពល។
ថ្លែងនៅក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) ឆ្នាំ២០២៥ នៅទីក្រុង Davos ប្រទេសស្វីស លោក Zelensky បានលើកឡើងថា លោកគាំទ្រគំនិតនៃកងកម្លាំងរក្សាសន្តិភាពអន្តរជាតិក្នុងប្រទេសអ៊ុយក្រែន ដើម្បីទប់ស្កាត់ការវាយប្រហារណាមួយរបស់រុស្ស៊ីនាពេលអនាគត បន្ទាប់ពីបទឈប់បាញ់ដែលអាចកើតមាន។
លោក Zelensky បានបន្តថា ប្រសិនបើពួកគេ (សហព័ន្ធរុស្ស៊ី) មានកងទ័ពចំនួន ១.៥លាននាក់ ហើយប្រសិនបើយើងមានត្រឹមតែពាក់កណ្តាលនៃចំនួននោះ យើងត្រូវការទាហានដែលមានចំនួនច្រើន។
កាលពីសប្តាហ៍មុន ប្រព័ន្ធផ្សព្វផ្សាយក្នុងស្រុកបានរាយការណ៍ថា ចក្រភពអង់គ្លេស និងបារាំងកំពុងពិចារណាលើការដាក់ពង្រាយកងទ័ពរក្សាសន្តិភាពរបស់ពួកគេទៅកាន់ប្រទេសអ៊ុយក្រែន បន្ទាប់ពីកិច្ចព្រមព្រៀងបទឈប់បាញ់ដែលអាចកើតមានរវាងទីក្រុងគៀវ និងទីក្រុងម៉ូស្គូ។
