លោក យូន ស៊ុកយ៉ុល បង្ហាញខ្លួនក្នុងអង្គសវនាការ នៃ តុលាការ ធម្មនុញ្ញ ជំនុំ ជម្រះ សម្រេចជោគវាសនារបស់លោក
សេអ៊ូល៖ ប្រធានាធិបតីជាប់បណ្តឹង លោក យូន ស៊ុកយ៉ុល កាលពីថ្ងៃអង្គារទី២១មករា បានបង្ហាញខ្លួនក្នុងអង្គសវនាការ នៃ តុលាការ ធម្មនុញ្ញ ជំនុំ ជម្រះ សម្រេចជោគវាសនារបស់លោក ថាត្រូវអស់តំណែងទាំងស្រុង ឬទទួលបានតំណែងវិញ ឬអាចនឹងមានទោសទណ្ឌ។
នៅពេលចាប់ផ្តើមសវនាការ លោក យូន បានអះអាងថា លោកបានធ្វើការនៅក្នុងសេវាសាធារណៈជាមួយការប្តេជ្ញាចិត្តយ៉ាងមុតមាំ ចំពោះលទ្ធិប្រជាធិបតេយ្យសេរី។
ស្លៀកពាក់ឈុតអាវធំពណ៌ទឹកប៊ិច ដោយមិនមែនពាក់ឈុតរបស់ ពន្ធនាគារ លោក យូន ដែលជារដ្ឋអាជ្ញាអាជីពមុនក្លាយប្រធានាធិបតី នៅឆ្នាំ២០២២ បានសន្យាថា នឹងឆ្លើយសំណួរដែលតុលាការបានសួរ។ ជាក់ស្តែង លោក យូន បានប្រាប់អង្គសវនាការថា កងកម្លាំងពិសេសដែលត្រូវបានបញ្ជូនទៅសភាកាលពីថ្ងៃទី៣ ខែធ្នូ ឆ្នាំមុន មិនបាននៅទីនោះរារាំងសមាជិកសភា មិន ឱ្យ ពួក គេ បោះឆ្នោត ប្រឆាំង នឹង ច្បាប់ អាជ្ញាសឹកទេ។
បន្ថែមលើនេះ លោក យូន ប្រាប់តុលាការថា៖«នៅក្នុងប្រទេសប្រជាធិបតេយ្យ សភា និងប្រព័ន្ធផ្សព្វផ្សាយព័ត៌មាន មានអំណាចជាងប្រធានាធិបតីឆ្ងាយណាស់»។ មេធាវីរបស់លោក យូន បានគូសបញ្ជាក់អំពីអំណះអំណាងក្នុងការការពារសេចក្តីប្រកាសច្បាប់អាជ្ញាសឹករបស់លោកយូន ដោយនិយាយថា៖«វាគឺដើម្បីបន្លឺសំឡេងរោទិ៍ជុំវិញការរំលោភបំពាន ដែលប្រព្រឹត្តដោយគណបក្សប្រជាធិបតេយ្យប្រឆាំង។ សកម្មភាព របស់ គណបក្ស ប្រឆាំង បាន ធ្វើ ឱ្យ រដ្ឋាភិបាល អសកម្ម ហើយ បាន រុញ ឱ្យ របប ប្រជាធិបតេយ្យ និង រដ្ឋធម្មនុញ្ញ របស់ ប្រទេស ឈាន ដល់ កម្រិត នៃ ការ ដួលរលំ»។ ការសម្រេចចិត្តរបស់ យូន ក្នុងការចូលរួមសវនាការលើការចោទប្រកាន់នេះ កើតឡើងបន្ទាប់ពីលោកបានបដិសេដមិន ចូល បង្ហាញ ខ្លួន អស់ ចំនួន ពី រលើកមកហើយ។
សន្តិសុខត្រូវបានពង្រឹងនៅតុលាការធម្មនុញ្ញកាលពីថ្ងៃអង្គារ បន្ទាប់ពីក្រុមអ្នកគាំទ្រលោក យូន ផ្ទុះកំហឹង សម្រុកចូលអគារតុលាការ កាលពីព្រឹកថ្ងៃអាទិត្យទី១៩មករា ដោយខ្លះវាយកញ្ចក់បង្អួច និងខ្លះទម្លុះវាយបំបែកចេញពីខាងក្នុង។ ភាពចលាចលនេះ ផុសឡើងភ្លាមៗបន្ទាប់ពីតុលាការបានសម្រេចបន្តឃុំខ្លួនប្រធានាធិបតីព្យួរតំណែងរហូតដល់២០ថ្ងៃ។
គួរជម្រាបថា លោក យូន ត្រូវជាប់ឃុំតាំងពីសប្តាហ៍មុន ក្រោមការស៊ើបអង្កេតឧក្រិដ្ឋកម្មពាក់ព័ន្ធនឹងការប្រើច្បាប់អាជ្ញាសឹកនៅដើមខែធ្នូ ឆ្នាំ២០២៤ ដែលបានទាញដៃប្រទេសកូរ៉េខាងត្បូង ចូលទៅក្នុងភាពចលាចល។ តុលាការធម្មនុញ្ញមានពេលរហូតដល់១៨០ថ្ងៃ ដើម្បីសម្រេចថា តើត្រូវដកលោក យូន ចេញពីតំណែងជាអចិន្ត្រៃយ៍ ឬត្រូវបន្តតំណែងរបស់លោកឡើងវិញ?៕
