អគ្គនាយកដ្ឋានរដ្ឋបាល ចេញលិខិតបដិសេធ និងបំភ្លឺជុំវិញខ្លឹមសារក្នុងពាក្យបណ្តឹងរបស់បុគ្គលឈ្មោះ ហេង សិទ្ធី ដោយបានចោទប្រកាន់លើ ឯកឧត្តមអភិសន្តិបណ្ឌិត ស សុខា បានគៀបសង្កត់មន្ត្រីថ្នាក់ក្រោមគ្រប់អគ្គនាយកដ្ឋាន

ភ្នំពេញ៖ នាពេលថ្មីៗនេះបុគ្គលឈ្មោះ ហេង សិទ្ធី បានធ្វើការចុះផ្សាយព័ត៌មានមិនពិតក្នុងគោលបំណងទុច្ចរិត បរិហារមួលបង្កាច់កេរ្តិ៍ ធ្វើឱ្យសាធារណជនមានការភ័ន្តច្រឡំតាមរយៈការចោទប្រកាន់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថា “បានគាបសង្កត់មន្ត្រីថ្នាក់ក្រោមគ្រប់អគ្គនាយកដ្ឋាន ដើម្បីរកលុយឱ្យខ្លួនក្នុងពេលបំពេញការងារ”។

ក្នុងនាមថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ នៃអគ្គនាយកដ្ឋានរដ្ឋបាល ក្រសួងមហាផ្ទៃ សូមបដិសេធទាំងស្រុងចំពោះការចោទប្រកាន់របស់បុគ្គលឈ្មោះ ហេង សិទ្ធី មកលើឯកឧត្តមអតិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់ឯកឧត្តម អតីសន្តិបណ្ឌិត និងក្រុមគ្រួសារ ព្រមទាំងស្ថាប័នសាធារណៈផងដែរ។ នៅក្នុងរាជរដ្ឋាភិបាល នីតិកាលទី៧ នៃ រដ្ឋសភា ក្រោមការដឹកនាំប្រកបដោយគតិបណ្ឌិត និងភាពឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តមអភិសន្តិបណ្ឌិត តែងតែប្រកាន់ភ្ជាប់នូវមនសិការស្នេហាជាតិ និងតម្កល់ផលប្រយោជន៍ជាតិនិងប្រជាជនជាធំ ព្រមទាំងខិតខំយកអស់កម្លាំងកាយចិត្ត ប្រាជ្ញា ស្មារតី ក្នុងការគ្រប់គ្រងដឹកនាំមន្ត្រីរាជការស៊ីវិល កងកម្លាំងនគរបាលជាតិ មន្ត្រីពន្ធនាគារក្រសួងមហាផ្ទៃ និងមន្ត្រីរដ្ឋបាល ថ្នាក់ក្រោមជាតិ ឱ្យសម្រេចបាននូវសមិទ្ធផលការងារជាច្រើនក្នុងរយៈពេលជាងមួយឆ្នាំកន្លងមកនេះ រួមមាន៖ ការថែរក្សាការពារនូវសុខសន្តិភាព ស្ថិរភាពនយោបាយ សន្តិសុខសណ្តាប់ធ្នាប់សាធារណៈ សុវត្ថិភាពសង្គម ការលើកកម្ពស់ការផ្តល់សេវាសាធារណៈ ការជំរុញការអភិវឌ្ឍមូលដ្ឋាន ការលើកស្ទួយសិទ្ធិសេរីភាពរបស់ប្រជា ពលរដ្ឋ និងការពង្រឹងពង្រីកលទ្ធិប្រជាធិបតេយ្យ សេរីពហុបក្សនៅកម្ពុជា។ ជាពិសេស ឯកឧត្តមអតីសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ តែងតែយកចិត្តទុកដាក់ឧបត្ថម្ភគាំទ្រចំពោះសុខទុក្ខរបស់មន្ត្រី រាជការ និងបានផ្តល់គោលការណ៍ណែនាំ តម្រង់ទិស និងអនុសាសន៍ដឹកនាំល្អៗដល់គ្រប់អគ្គនាយកដ្ឋាន និង អង្គភាពក្រោមឱវាទក្រសួងមហាផ្ទៃ ឱ្យខិតខំប្រឹងប្រែងបំពេញតួនាទី ភារកិច្ចឱ្យទទួលបានប្រសិទ្ធភាពខ្ពស់។

លើមូលដ្ឋាននេះ អគ្គនាយកដ្ឋានរដ្ឋបាល ក្រសួងមហាផ្ទៃ សូមអំពាវនាវដល់សាធារណជនទាំងអស់ មេត្តាជ្រាប និងកុំជឿតាមការផ្សព្វផ្សាយ និងការលើកឡើងបែបញុះញង់របស់ជនឆបោកឈ្មោះ ហេង សិទ្ធី ដែលជាជនល្មើសរត់គេចខ្លួននៅក្រៅប្រទេសដែលអាជ្ញាធរមានសមត្ថកិច្ចកម្ពុជាកំពុងតាមស្វែងរកចាប់ខ្លួន ហើយបានប្រឌិតព័ត៌មាន បំភ្លៃបំផ្លើសការពិត និងចោទប្រកាន់ដោយពុំមានភស្តុតាងច្បាស់លាស់ធ្វើឱ្យប៉ះ ដល់កិត្តិយស និងសេចក្តីថ្លៃថ្នូររបស់ថ្នាក់ដឹកនាំក្រសួង ស្ថាប័នមួយចំនួន។

ជាថ្មីម្តងទៀត ក្នុងនាមថ្នាក់ដឹកនាំគ្រប់លំដាប់ថ្នាក់ និងមន្ត្រីរាជការស៊ីវិលទាំងអស់ នៃអគ្គនាយកដ្ឋាន រដ្ឋបាល សូមថ្កោលទោសយ៉ាងដាច់អហង្ការចំពោះបុគ្គលឈ្មោះ ហេង សិទ្ធី និងសូមអាជ្ញាធរមានសមត្ថកិច្ចចាត់វិធានការតាមផ្លូវច្បាប់ឱ្យបានម៉ឺងម៉ាត់បំផុតចំពោះបុគ្គលរូបនេះ ៕