ប្រធានាធិបតីជាប់ឆ្នោតអាម៉េរិក លោក ដូណាល់ ត្រាំ នឹងដឹកនាំក្រសួងយុត្តិធម៌បន្តអនុវត្តទោសប្រហារជីវិត ដើម្បីការពារប្រជាជនអាម៉េរិកពីអ្នករំលោភដោយហិង្សា

វ៉ាស៊ីនតោន៖ ប្រធានាធិបតីជាប់ឆ្នោតរបស់សហរដ្ឋអាម៉េរិក លោក ដូណាល់ ត្រាំ បាននិយាយនៅថ្ងៃពុធទី២៥ ខែធ្នូនេះថា លោកនឹងដឹកនាំក្រសួងយុត្តិធម៌បន្តអនុវត្តទោសប្រហារជីវិត ដើម្បីការពារប្រជាជនអាម៉េរិកពីអ្នករំលោភដោយហិង្សា ឃាតក និងមនុស្សឃោរឃៅ នៅពេលដែលលោកឡើងកាន់អំណាចនៅថ្ងៃទី២០ ខែមករាឆ្នាំ២០២៥ ខាងមុខ។

សេចក្ដីថ្លែងការណ៍របស់លោក ត្រាំ នៅលើវេទិកាប្រព័ន្ធផ្សព្វផ្សាយសង្គម Truth Social គឺឆ្លើយតបទៅនឹងការប្រកាសរបស់លោកប្រធានាធិបតី ចូ បៃឌិន កាលពីថ្ងៃចន្ទថា លោកបានសម្រេច បន្ធូរ បន្ថយទោសប្រហារជីវិត ចំពោះ អ្នក ទោស ៣៧នាក់ ក្នុង ចំណោម៤០នាក់ ដែល ត្រូវ បានតុលាការ សហព័ន្ធ កាត់ទោស ប្រហារជីវិត។ ពួកគេទាំង៣៧នាក់ ត្រូវបន្ធូរបន្ថយមកត្រឹមទោសជាប់ពន្ធនាគារ ១ ជីវិតវិញ។

គួររំឭកថា កាលពីដើមខែនេះ លោក បៃឌិន ក៏បានបន្ធូរបន្ថយទោសដល់ទណ្ឌិតជិត១៥០០នាក់ និងបានលើកលែងទោសដល់ទណ្ឌិត៣៩នាក់ទៀត ដែលត្រូវបានកាត់ទោសពីបទឧក្រិដ្ឋកម្មអហិង្សា។ លោក ត្រាំ បានលើកឡើងថា៖«នៅពេលខ្ញុំស្បថឡើងកាន់តំណែង ខ្ញុំនឹងដឹកនាំក្រសួងយុត្តិធម៌ឱ្យបន្តការកាត់ទោសប្រហារជីវិតយ៉ាងខ្លាំងក្លា ដើម្បីការពារគ្រួសារ និងកុមារអាម៉េរិក ពីអ្នករំលោភបំពាន ឃាតក និងមនុស្សឃោរឃៅ»។

លោក បៃឌិន ដែលបានឈរឈ្មោះជាប្រធានាធិបតីប្រឆាំងនឹងការកាត់ទោសប្រហារជីវិត បានព្យួរការកាត់ទោសប្រហារជីវិតនៅពេលលោកចូលកាន់តំណែងក្នុងខែមករាឆ្នាំ២០២១។ ក្រុមផ្លាស់ប្ដូរអំណាចរបស់លោក ត្រាំ កាលពីថ្ងៃចន្ទបានបរិហារការសម្រេចចិត្តរបស់លោក បៃឌិន ដោយហៅវាថា ជារឿងគួរឱ្យស្អប់ខ្ពើម និងបំពេញចិត្តនឹងទណ្ឌិត ដែលជាឃាតកដ៏អាក្រក់បំផុតក្នុងពិភពលោក។

លោក ត្រាំ បានចាប់ផ្តើមការប្រហារជីវិតដែលត្រូវកាត់ក្ដីដោយ តុលាការ សហព័ន្ធឡើងវិញ ក្នុងអំឡុងពេលអាណត្តិដំបូងរបស់លោកនាអំឡុងឆ្នាំ២០១៧ ដល់ឆ្នាំ២០២១ បន្ទាប់ពីផ្អាកជិត២០ឆ្នាំ។ មានការប្រហារជីវិតសហព័ន្ធចំនួន១៣ ក្នុងអំឡុងពេលអាណត្តិដំបូងរបស់លោក ត្រាំ ច្រើនជាងនៅក្រោមប្រធានាធិបតីណាមួយនៅក្នុងប្រវត្តិសាស្ត្រទំនើប។ នៅឆ្នាំ២០២០ ជាឆ្នាំចុងក្រោយនៃអាណត្តិដំបូងរបស់លោក ត្រាំ រដ្ឋាភិបាលសហព័ន្ធបានប្រហារជីវិតបុគ្គល១០នាក់ ដែលជាការប្រហារជីវិតច្រើនបំផុតដោយរដ្ឋាភិបាលសហព័ន្ធចាប់តាំងពីឆ្នាំ១៨៩៦ និងច្រើនជាងរដ្ឋទាំង៥០ រួមបញ្ចូលគ្នានៅឆ្នាំនោះ៕