ចិនវ៉ាដាច់អាម៉េរិក និងទទួលបានតំណែងជាម្ចាស់ជំនួយទ្វេភាគីធំបំផុតទីពីរ ដល់តំបន់ប៉ាស៊ីហ្វិក

ប៉េកាំង៖ ចិនបានវ៉ាដាច់សហរដ្ឋអាម៉េរិក និងទទួលបានតំណែងរបស់ខ្លួនវិញក្នុងនាមជាម្ចាស់ជំនួយទ្វេភាគីធំបំផុតទីពីរ ដល់តំបន់ប៉ាស៊ីហ្វិក នេះបើយោងតាមរបាយការណ៍ថ្មីមួយ ចេញផ្សាយកាលពីថ្ងៃពុធទី២០វិច្ឆិកា ដោយវិទ្យាស្ថាន Lowy ខណៈអូស្ត្រាលីនៅតែជាអ្នកផ្តល់ជំនួយធំជាងគេ។

ជារៀងរាល់ឆ្នាំ វិទ្យាស្ថាន Lowy ដែលជាក្រុមស្រាវជ្រាវមានមូលដ្ឋាននៅប្រទេសអូស្ត្រាលី បានចេញផ្សាយផែនទីជំនួយប៉ាស៊ីហ្វិក តាមដានប្រាក់កម្ចី និងជំនួយដល់តំបន់យ៉ាងលម្អិត។ ផែនទីឆ្នាំ២០២៤ រួមបញ្ចូលទាំងការចំណាយនៅប៉ាស៊ីហ្វិកពីឆ្នាំ២០០៨ ដល់ឆ្នាំ២០២២។ ក្នុងរយៈពេលមួយទសវត្សរ៍កន្លងមកនេះ ប្រទេសចិនបានបណ្តាក់ទុនរាប់ពាន់លានដុល្លារនៅក្នុងប្រទេសកោះប៉ាស៊ីហ្វិក ក្នុងគោលបំណងបង្កើនឥទ្ធិពលនៅក្នុងតំបន់ចំពេលមានការប្រកួតប្រជែងជាមួយសហរដ្ឋអាម៉េរិក និងសម្ព័ន្ធមិត្ត។ បន្ទាប់ពីការកាត់បន្ថយការវិនិយោគក្នុងអំឡុងពេលជំងឺរាតត្បាតកូវីដ-១៩ ក្នុងឆ្នាំ២០២០ ចិនបានបន្តផ្តោតលើគម្រោងនៅកោះប៉ាស៊ីហ្វិកឡើងវិញ ក្នុងឆ្នាំ២០២២ ជាឆ្នាំចុងក្រោយដែលមាននៅក្នុងរបាយការណ៍។

ខណៈដែលហិរញ្ញប្បទានអភិវឌ្ឍន៍សរុបពីប្រទេសទាំងអស់ទៅកាន់កោះ បានធ្លាក់ចុះ១៨ភាគរយក្នុងឆ្នាំ២០២២ នៅចំពេលជំងឺរាតត្បាតសកល យោងតាមរបាយការណ៍ មហាយក្សចិន បានបង្កើនហិរញ្ញប្បទានរបស់ខ្លួននៅឆ្នាំនោះ៦ភាគរយជាមួយនឹងការគាំទ្រចំនួន២៥៦លានដុល្លារ។ នោះ..គឺកើនឡើងជិត១៤ភាគរយធៀបនឹងឆ្នាំ២០១៩។ យ៉ាងណា អូស្ត្រាលី គឺជាអ្នកផ្តល់ហិរញ្ញប្បទានច្រើនជាងគេសម្រាប់ប្រជាជាតិកោះប៉ាស៊ីហ្វិក ដោយបានរួមចំណែកចំនួន១,៥ពាន់លានដុល្លារ ខណៈសហរដ្ឋអាម៉េរិកជាប់ចំណាត់ថ្នាក់លេខ៣ ដោយបានផ្តល់ហិរញ្ញប្បទានចំនួន២៤៩លានដុល្លារ។

ចាប់ពីឆ្នាំ២០០៨ ដល់២០១៦ ធនាគារចិនបានផ្តល់ប្រាក់កម្ចីជាង១,១ពាន់លានដុល្លារដល់តំបន់ បង្កឱ្យមានការព្រួយបារម្ភថា តំបន់នេះអាចនឹងកាន់តែងាយរងគ្រោះទៅនឹងសម្ពាធការទូតពីរដ្ឋធានីប៉េកាំង។ ថ្មីៗនេះ ប្រទេសចិនបានអនុវត្តវិធីសាស្ដ្រជាយុទ្ធសាស្ត្របន្ថែមទៀត ឆ្ពោះទៅរកការផ្ដល់ហិរញ្ញប្បទានរបស់ពួកគេ ដោយងាកចេញពីការផ្ដល់មូលនិធិតាមរយៈបំណុលឆ្ពោះទៅរកការផ្ដល់ហិរញ្ញប្បទានតាមរយៈជំនួយដ៏ធំ និងគម្រោងកម្រិតសហគមន៍។ យោងតាមរបាយការណ៍ ចិនបានជ្រើសរើសវិធីសាស្ដ្រថ្មីដោយពឹងផ្អែកលើការផ្ដល់ហិរញ្ញប្បទានឥតសំណងទ្រង់ទ្រាយធំ ជាជាងប្រាក់កម្ចី និងរៀបចំសកម្មភាពច្រើននៅស្ថានទូតក្នុងប្រទេសអាទិភាព។

មហាយក្សចិន មើលឃើញថា ខ្លួនជាដៃគូអភិវឌ្ឍន៍ជាមួយបណ្តាប្រទេសកោះប៉ាស៊ីហ្វិក ហើយធ្លាប់បានសង្កត់ធ្ងន់ថា ជំនួយរបស់ខ្លួនមកដោយគ្មានលក្ខខណ្ឌនយោបាយ។ យ៉ាងណាមិញ វិទ្យាស្ថាន Lowy បានលើកឡើងថា ហេតុផល ភូមិសាស្ត្រ នយោបាយ គឺជា កត្តា មួយ ដែល ចិន សម្រេច ផ្តល់ ជំនួយ។ របាយការណ៍របស់វិទ្យាស្ថានបានរាយរាប់ថា ការជំនួយច្រើនសន្ធឹករបស់ចិននៅប៉ាស៊ីហ្វិកបានរីកចម្រើន ដើម្បីបន្តគោលបំណងផ្សេងៗ ប៉ុន្តែការពង្រឹងគោលនយោបាយចិនតែមួយ នៅតែជាកត្តាដ៏សំខាន់។

របាយការណ៍បានបង្ហាញថា នៅឆ្នាំ២០២២ កោះតៃវ៉ាន់បានធ្លាក់ចេញពីបញ្ជីម្ចាស់ជំនួយកំពូលទាំង១០ដល់កោះប៉ាស៊ីហ្វិក ដោយចំណាយប្រាក់ចំនួន៧,២លានដុល្លារ បន្ទាប់ពីប្រទេសជាច្រើនបានផ្តាច់ទំនាក់ទំនងការទូតជាមួយក្រុងតៃប៉ិ ហើយប្តូរទៅជិតស្និទ្ធជាមួយរដ្ឋធានីប៉េកាំង៕