ឯកឧត្តម ប៊ិន ត្រឈៃ អញ្ជើញបើកវេទិកាសាធារណៈជួបសំណេះសំណាលជាមួយប្រជាពលរដ្ឋ នៅឃុំសង្កែសាទប ស្រុកឱរ៉ាល់

ភ្នំពេញ៖ នៅថ្ងៃទី២៤ ខែតុលា ឆ្នាំ២០២៤ ឯកឧត្តម ប៊ិន ត្រឈៃ រដ្ឋមន្ត្រីក្រសួងផែនការ អនុប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ស្ពឺ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកឱរ៉ាល់ បានអញ្ជើញបើកវេទិកាសាធារណៈជួបសំណេះសំណាលជាមួយបងប្អូនប្រជាពលរដ្ឋ នៃភូមិចំនួន៧ នៃឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដែលក្នុងនោះរួមមាន៖ ភូមិគោក ភូមិផ្សារកន្តួត ភូមិកន្តួត ភូមិដំបងវេញ ភូមិក្រាំងពង្រ ភូមិជំនាប់ និងភូមិតាដែស។

វេទិកាសាធារណៈនេះ បានប្រព្រឹត្តទៅក្នុងបរិវេនវត្តកែវមុនីរស្មី (ឬហៅ វត្តកន្តួត) ដែលស្ថិតនៅក្នុងភូមិគោក ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល។ សមាសភាពចូលរួម រួមមាន៖ ក្រុមការងាររាជរដ្ឋាភិបាលថ្នាក់ជាតិ ថ្នាក់ខេត្ត ក្រុមប្រឹក្សាស្រុក គណៈអភិបាលស្រុក អង្គភាពជំនាញជុំវិញខេត្ត ស្រុក រដ្ឋបាលឃុំ និងបងប្អូនប្រជាពលរដ្ឋក្នុងភូមិទាំង៧ ប្រមាណ ២៦៦នាក់ អញ្ជើញចូលរួម។

ជាកិច្ចចាប់ផ្ដើម លោក ណន សារុន មេឃុំសង្កែសាទប បានមានរបាយការណ៍ស្វាគមន៍ជូនគណៈអធិបតី និងបងប្អូនប្រជាពលរដ្ឋទាំងអស់ក្នុងវេទិកាសាធារណៈ នាឱកាសនេះ។ លោកមេឃុំ បានរាយការណ៍ដោយសង្ខេបអំពីស្ថានភាពភូមិសាស្ត្រឃុំសង្កែសាទប ចំនួនប្រជាជន កម្រិតជីវភាពរស់នៅ និងសន្តិសុខសណ្ដាប់ធ្នាប់ភូមិឃុំ ជូនគណៈអធិបតី និងអង្គពិធីទាំងមូល។

បន្ទាប់ពីរបាយការណ៍របស់លោកមេឃុំ ឯកឧត្តមរដ្ឋមន្ត្រី បានអញ្ជើញមានប្រសាសន៍បើកវេទិកាសាធារណៈ ដែលក្នុងនោះវេទិកាសាធារណៈនាឱកាសនេះ ត្រូវបានប្រារព្ធឡើងក្នុងគោលបំណង សំខាន់ៗចំនួន២ គឺ (១) ដើម្បីជាការណែនាំខ្លួនក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានស្រុកឱរ៉ាល់ ជូនចំពោះបងប្អូនប្រជាពលរដ្ឋ ក្នុងភូមិទាំង៧នៃឃុំសង្កែសាទប និង (២) ដើម្បីស្វែងយល់ដោយផ្ទាល់ពីស្ថានភាព ជីវភាពរស់នៅ ការប្រកបរបរចិញ្ចឹមជីវិត ក្តីកង្វល់បញ្ហាប្រឈម សំណូមពរ និងតម្រូវការ របស់បងប្អូនប្រជាពលរដ្ឋនៅមូលដ្ឋាន ក៏ដូចជាផ្សារភ្ជាប់ទំនាក់ទំនងជិតស្និទ្ធរវាងរាជរដ្ឋាភិបាលនិងប្រជាជន សំដៅសម្រេចតាមគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ ប្រកបដោយប្រសិទ្ធភាព និងសាកសិទ្ធភាពខ្ពស់។

គួរបន្ថែមថា យុទ្ធសាស្ត្របញ្ចកោណ ដំណាក់កាលទី១ បានដាក់ចេញនូវអាទិភាពគន្លឹះចំនួន៥ គឺ មនុស្ស, ផ្លូវ, ទឹក, ភ្លើង និង បច្ចេកវិទ្យា។ ក្នុងន័យនេះ រាជរដ្ឋាភិបាល បានផ្ដោតលើ “មនុស្ស” គឺជាអាទិភាពគន្លឹះដំបូង ដើម្បីការកសាងមូលធនមនុស្សរឹងមាំ៕