សម្ដេចធិបតី៖ រាជរដ្ឋាភិបាលនឹងបន្តពង្រឹង និងលើកកម្ពស់ពាណិជ្ជកម្មសេរីជាមួយប្រទេសជាដៃគូអភិវឌ្ឍន៍ទាំងអស់ ដោយឈរលើអភិក្រមរក្សាចាស់ បង្កើនថ្មី សម្រាប់ទីផ្សារ និងពាណិជ្ជកម្មរបស់កម្ពុជា

សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបញ្ជាក់ថា រាជរដ្ឋាភិបាលនឹងបន្តពង្រឹង និងលើកកម្ពស់ពាណិជ្ជកម្មសេរីជាមួយប្រទេសជាដៃគូអភិវឌ្ឍន៍ទាំងអស់ ដោយឈរលើអភិក្រមរក្សាចាស់ បង្កើនថ្មី សម្រាប់ទីផ្សារ និងពាណិជ្ជកម្មរបស់កម្ពុជា ពីព្រោះដើម្បីឈានទៅកម្ពុជាចាកចេញពីប្រទេសក្រីក្រ ចាំបាច់គឺត្រូវពង្រឹងផលិតផល និងសេវាខាងក្នុង និងពង្រីកទីផ្សារខាងក្រៅ។

ក្នុងឱកាសអញ្ជើញជាអធិបតីភាពក្នុងពិធីអបអរសាទរខួប២០ឆ្នាំ នៃកម្ពុជាចូលជាសមាជិកអង្គការពាណិជ្ជកម្មពិភពលោក (WTO) នាព្រឹកថ្ងៃទី១៤ ខែតុលា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានមានប្រសាសន៍ថា ទិសដៅ និងគោលនយោបាយរបស់រាជរដ្ឋាភិបាលអាណត្តិទី៧នេះ គឺបន្តអនុវត្តនូវទិសដៅ និងចក្ខុវិស័យច្បាស់របស់កម្ពុជា ដែលដឹកនាំដោយរាជរដ្ឋាភិបាលអាណត្តិមុន គ្រាន់តែពេលនេះ ដើម្បីឱ្យសម្រេចបានដល់គោលដៅដែលបានកំណត់ វិធីសាស្រ្ដមួយចំនួនគឺត្រូវប្រែប្រួល ប៉ុន្ដែទិសដៅរបស់យើងមិនប្រែប្រួលទេ។

សម្ដេចធិបតី ហ៊ុន ម៉ាណែត បានគូសបញ្ជាក់ថា ការបើកច្រកពាណិជ្ជកម្ម គឺជាការលំបាកមួយហើយ ប៉ុន្ដែការរក្សាបាននូវច្រកដែលបើកនោះ គឺរឹតតែលំបាកថែមទៀត ដូច្នេះហើយវិស័យឯកជន ដែលជាអ្នកផលិត ត្រូវតែធ្វើយ៉ាងណារក្សាឱ្យបាននូវស្ដង់ដា និងគុណភាពផលិតផលរបស់កម្ពុជា ឱ្យមានស្ដង់ដាល្អ និងមានទំនើបកម្មជានិច្ច ៕