សម្ដេចធិបតី ហ៊ុន ម៉ាណែត៖ ខ្ញុំ មិនចង់ឃើញកូនខ្មែរ រៀននៅស្រុកខ្មែរ ហៅ ឪពុកម្ដាយថា «ល្ងីល្ងើ»
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានថ្លែងដោយសង្កត់ធ្ងន់ថា សម្ដេចមិនចង់ឃើញកូនខ្មែរ រៀននៅស្រុកខ្មែរ ហៅ ឪពុកម្ដាយ ដោយប្រើពាក្យ «ល្ងីល្ងើ» នោះទេ ។
ក្នុងឱកាសអញ្ជើញចុះពិនិត្យមើលសាលារៀនមួយកន្លែង នៅក្រុងឧដុង្គម៉ែជ័យ ខេត្តកំពង់ស្ពឺ នាថ្ងៃសៅរ៍ ទី២៤ ខែសីហា ឆ្នាំ២០២៤នេះ សម្ដេចធិបតី ហ៊ុន ម៉ាណែត មានប្រសាសន៍ថា «ខ្ញុំ មិនចង់ឃើញកូនខ្មែរ រៀននៅស្រុកខ្មែរ ហៅ ឪពុកម្ដាយ ហៅអី ហៅល្ងីល្ងើ អត់បានទេ រឿងនេះ ខ្ញុំបានឃើញកូនខ្មែរ នៅអាមេរិក។ ខ្ញុំមិនចង់ឱ្យឃើញកូនខ្មែរ នៅស្រុកខ្មែរ ហ៊ាន ទោះបីជា ឪពុកម្ដាយ របៀបរបបគាត់មិនចេះអង់គ្លេសក៏ដោយ មិនអាចកូនខ្មែរ ហាមាត់ ហៅ ឪពុកម្ដាយ បែបនេះ យើងត្រូវអប់រំគាត់» ។
សម្ដេចធិបតី បន្ថែមថា ទោះបី មានការវិវត្តន៍ចំណេះដឹងយ៉ាងណាក៏ដោយ ត្រូវមានអត្តសញ្ញាជាតិខ្មែរ។ សម្ដេច រំលឹកថា កាលសម្ដេច រស់នៅអាមេរិក ឬនៅអង់គ្លេស កូនខ្មែរមួយចំនួន កើតនៅបរទេសទាំងនោះ មានវប្បធម៌បរទេស ចេញមក ជេរ ឪពុកម្ដាយ របស់ខ្លួន។ ព្រោះថា ឪពុកម្ដាយ រស់នៅបរទេស របៀបរបបរបស់ពួកគាត់ គឺខ្មែរ ដូច្នេះក្មេងចេញមកឥរិយាបថ វប្បធម៌ បរទេស។
សម្ដេចធិបតីក៏បានផ្ដាំផ្ញើដល់លោកគ្រូ អ្នកគ្រូត្រូវអប់រំកូនសិស្ស ស្គាល់អត្តសញ្ញាជាតិខ្មែរ ព្រោះគ្រូមានតួនាទីយ៉ាងសំខាន់ ក្នុងការបណ្ដុះបណ្ដាលកូនសិស្ស។ សម្ដេច បានគូសបញ្ជាក់ថា កម្លាំងចិត្តជួយគ្នា ដើម្បីប្រៀនប្រដៅ និងអប់រំកូនសិស្ស គឺធំធេងខ្លាំងណាស់ កូនរៀនពូកែហើយ តែក៏ត្រូវតែមានអត្តចរិតល្អផង គោរព ឪពុកម្តាយ លោកគ្រូ អ្នកគ្រូ និងចាស់ព្រឹទ្ធាចារ្យ គឺជាកត្តាចាំបាច់បំផុត៕
