ឯកឧត្ដម យូ ឡាណា និងឯកឧត្ដម សរ សុពុត្រា អញ្ជើញសួរសុខទុក្ខ និងនាំអំណោយកាកបាទក្រហមកម្ពុជា ចែកជូនពលរដ្ឋរងគ្រោះដោយជំនន់ទឹកភ្លៀង ៣៤២គ្រួសារ រស់នៅឃុំចំនួន៦ ក្នុងស្រុកថាឡាបរិវ៉ាត់

ភ្នំពេញ៖ បន្ទាប់ពីទទួលបានរបាយការណ៍មានប្រជាពលរដ្ឋរងគ្រោះដោយជំនន់ទឹកភ្លៀង និងមានសំណើពីសាខាកាកបាទក្រហមកម្ពុជា ខេត្តស្ទឹងត្រែង, នៅថ្ងៃទី១៧-១៨ ខែសីហា ឆ្នាំ២០២៤ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ ឯកឧត្តម យូ ឡាណា អគ្គលេខាធិការរងទី២កាកបាទក្រហមកម្ពុជា និងមានការចូលរួមពីឯកឧត្តម សរ សុពុត្រា អភិបាលខេត្តស្ទឹងត្រែង និងលោកស្រី សន សុខា ប្រធានស្តីទី នៃគណៈកម្មាធិការសាខាកាកបាទក្រហមកម្ពុជា ខេត្តស្ទឹងត្រែង អញ្ជើញចុះសួរសុខទុក្ខ និងនាំយកអំណោយមនុស្សធម៌ ចែកជូនបងប្អូនប្រជាពលរដ្ឋរងគ្រោះដោយជំនន់ទឹកភ្លៀងចំនួន ៣៤២គ្រួសារ ដែលមាន៣ទីតាំងដូចខាងក្រោម ៖

ទីតាំងទី១ ៖ នៅក្នុងបរិវេណវត្តសោភ័ណ្ឌរង្សី មកពីឃុំចំការលើ ៦២គ្រួសារ និងឃុំអន្លង់ភេ ៣៤គ្រួសារ
(បញ្ជាក់ ៖ ឯកឧត្តមអគ្គលេខាធិការរងទី២ និងក្រុមការងារ បានប្រគេនទេយ្យវត្ថុនិងបច្ច័យ ជូនព្រះចៅអធិការវត្តសោភ័ណ្ឌរង្សី)
ទីតាំងទី២ ៖ នៅក្នុងបរិវេណប្រាសាទព្រះគោ មកពីឃុំថាឡាបរិវ៉ាត់ ៧១គ្រួសារ និងឃុំស្រែឫស្សី ៧៦គ្រួសារ
ទីតាំងទី៣ ៖ នៅក្នុងបរិវេណសាលាបឋមសិក្សាកាំងចាម មកពីឃុំកាំងចាម ៥២គ្រួសារ និងឃុំអូររៃ ៤៧គ្រួសារ (បញ្ជាក់ ៖ ក្រុមការងារចុះសួរសួរសុខទុក្ខនិងផ្តល់អំណោយនៅព្រឹកថ្ងៃទី១៨ ខែសីហា ឆ្នាំ២០២៤)។

ក្នុងឱកាសនោះ ឯកឧត្តមអគ្គលេខាធិការរងទី២ មានប្រសាសន៍ថា “កាកបាទក្រហមកម្ពុជា មានសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលតែងតែគិតគូរពីសុខទុក្ខ និងសុខភាពរបស់ប្រជានុរាស្ត្រនិងប្រជាពលរដ្ឋទាំងអស់ សូមថែរក្សាសុខភាពឱ្យបានល្អ ត្រូវបរិភោគទឹកស្អាត ទឹកដាំឆ្អិនល្អ ការរស់នៅមានអនាម័យ ប្រុងប្រយ័ត្នពីជំងឺឆ្លងនានា បច្ចុប្បន្ននេះរាជរដ្ឋាភិបាលនិងក្រសួងសុខាភិបាលបានយកចិត្តទុក្ខដាក់ខ្ពស់នូវជំងឺមិនឆ្លងធំៗចំនួន៤គឺ ជំងឺទឹកនោមផ្អែម ជំងឺមហារីក ជំងឺបេះដូងសរសៃឈាម និងជំងឺផ្លូវដង្ហើមរ៉ាំរ៉ៃជាដើម ដែលបណ្តាលមកពីការបរិភោគមិនបានត្រឹមត្រូវ មិនធ្វើលំហាត់ប្រាណ ជាពិសេសភេសជ្ជៈដែលមានជាតិផ្អែម និងសូមឪពុកម្តាយត្រូវនាំកូនស្រីដែលមានអាយុ៩ឆ្នាំទៅទទួលវ៉ាក់សាំងការពារមហារីមាត់ស្បូនឱ្យបានគ្រប់ៗគ្នា និងឥតគិតថ្លៃ”។

ឯកឧត្តម បានបន្តទៀតថា “បើតាមការសាកសួរប្រជាពលរដ្ឋ នៅក្នុងតំបន់នេះគឺមានអូរច្រើន ហើយនៅក្នុងរដូវស្សាតែងតែមានជំនន់ទឹកភ្លៀងរហ័សអាចកើតឡើង២ឬ៣ដងក្នុងមួយថ្ងៃ ដូច្នេះសូមបងប្អូនប្រុងប្រយ័ត្នជាពិសេសចាស់ជរានិងក្មេងតូចៗដែលប្រឈមខ្ពស់ការលង់ទឹកបណ្តាលឱ្យបាត់បងជីវិតបាន ហើយបច្ចុប្បន្ននេះបញ្ហាប្រឈមធំបំផុតរបស់ពិភពលោកគឺការប្រែប្រួលអកាសធាតុ យើងអាចកាត់បន្ថយការប្រែប្រួលអាកាសធាតុបាន យើងទាំងអស់គ្នាត្រូវចូលរួមដាំដើមឈើ និងសូមកាត់បន្ថយការប្រើប្រាស់ថង់ប្លាស្ទិក ព្រោះថង់ប្លាស្ទិកជាផ្នែកមួយក្នុងការបំពុលបរិស្ថាន និងសុខភាពបងប្អូនផងដែរ ហើយប្លាស្ទិកនេះអាចរលាយដោយខ្លួងឯងមានរយៈពេលពី៣០០ទៅ៤០០ឆ្នាំ”។

ជាចុងបញ្ចប់នេះ ឯកឧត្តម សុ សុពុត្រា អភិបាលខេត្តស្ទឹងត្រែង តំណាងឱ្យប្រជាពលរដ្ឋទាំងអស់ បានសម្តែងនូវក្តីរំភើបរីករាយ និងថ្លែងអំណរគុណយ៉ាងជ្រាលជ្រៅបំផុតចំពោះកាកបាទក្រហមកម្ពុជា ជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលតែងតែគិតគូរពីសុខទុក្ខ ការលំបាករបស់ប្រជាជនគ្រប់ពេលវេលា និងសូមជូនពរថ្នាក់ដឹកនាំ មន្ត្រី បុគ្គលិកទាំងអស់ ជាពិសេសសម្តេចកិត្តិព្រឹទ្ធបណ្ឌិតសូមជួបនូវតែពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

ឯកឧត្ដម សរ សុពុត្រា បានឱ្យដឹងថា សម្ភារអំណោយយកមកចែកជូននៅពេលនេះជាអំណោយទទួលបានពីសប្បុរសជននានា ដែលបានចូលរួមឧបត្ថម្ភ មកកាកបាទក្រហមកម្ពុជាថ្នាក់កណ្ដាល ដើម្បីប្រើប្រាស់ទៅតាមភាពជាក់ស្តែងសម្រាប់ជួយគ្រួសារ ដែលងាយរងគ្រោះ និងមានភាពខ្វះខាតខ្លាំងក្នុងជីវភាពប្រចាំថ្ងៃជាដើម។ ឯកឧត្ដមក៏បានពាំនាំនូវការផ្ដាំផ្ញើសួរសុខទុក្ខពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែយកចិត្តទុកដាក់គិតគូរចំពោះប្រជាពលរដ្ឋគ្រប់រូប មិនប្រកាន់វណ្ណ: ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។

គ្រួសារនីមួយៗទទួលបាន៖ អង្ករ ២៥គីឡូក្រាម, មី១កេស, ត្រីខ ១០កំប៉ុង, ទឹកស៊ីអ៊ីវ ៦ដប, ឃីត (មុង ភួយ សារុង ក្រមា) ១កញ្ចប់ និងថវិកា ២០.០០០រៀល។
ឆ្លៀតក្នុងឱកាសនេះដែរ ឯកឧត្តម យូ ឡាណា អគ្គលេខាធិការរងទី២ និងក្រុមការងារ បានចុះសុខទុក្ខនិងផ្តល់អំណោយមនុស្សធម៌ដល់ខ្នងផ្ទះប្រជាពលរដ្ឋចាស់ជរាចំនួន៣គ្រួសារ ដែលមិនអាចមកទទួលអំណោយនៅកន្លែងផ្តល់អំណោយបាន។

សូមបញ្ជាក់ថា ក្រៅពីអំណោយមនុស្សធម៌សម្រាប់ចែកជូនប្រជាពលរដ្ឋរងគ្រោះសរុប៣៤២គ្រួសារនេះ សម្តេចកិត្តិព្រឹទ្ធបណ្ឌិតប្រធាន ក៏បានសម្រេចផ្តល់អំណោយមនុស្សធម៌ ១០៨គ្រួសារទៀតជូនសាខាកាកបាទក្រហមកម្ពុជា ខេត្តស្ទឹងត្រែង ដើម្បីទុកឆ្លើយតបបន្ទាន់ពេលមានតម្រូវការ ៕